Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

رد کریں ڈاؤن لوڈ شعر

تلاش کے نتائج

تلاش کا نتیجہ "mor"

نظم کے متعلقہ نتیجہ "mor"

نظم

کیوں زیاں کار بنوں سود فراموش رہوں
فکر فردا نہ کروں محو غم دوش رہوں
نالے بلبل کے سنوں اور ہمہ تن گوش رہوں
ہم نوا میں بھی کوئی گل ہوں کہ خاموش رہوں
جرأت آموز مری تاب سخن ہے مجھ کو
شکوہ اللہ سے خاکم بدہن ہے مجھ کو
ہے بجا شیوۂ تسلیم میں مشہور ہیں ہم
قصۂ درد سناتے ہیں کہ مجبور ہیں ہم
ساز خاموش ہیں فریاد سے معمور ہیں ہم
نالہ آتا ہے اگر لب پہ تو معذور ہیں ہم
اے خدا شکوۂ ارباب وفا بھی سن لے
خوگر حمد سے تھوڑا سا گلہ بھی سن لے
تھی تو موجود ازل سے ہی تری ذات قدیم
پھول تھا زیب چمن پر نہ پریشاں تھی شمیم
شرط انصاف ہے اے صاحب الطاف عمیم
بوئے گل پھیلتی کس طرح جو ہوتی نہ نسیم
ہم کو جمعیت خاطر یہ پریشانی تھی
ورنہ امت ترے محبوب کی دیوانی تھی
ہم سے پہلے تھا عجب تیرے جہاں کا منظر
کہیں مسجود تھے پتھر کہیں معبود شجر
خوگر پیکر محسوس تھی انساں کی نظر
مانتا پھر کوئی ان دیکھے خدا کو کیونکر
تجھ کو معلوم ہے لیتا تھا کوئی نام ترا
قوت بازوئے مسلم نے کیا کام ترا
بس رہے تھے یہیں سلجوق بھی تورانی بھی
اہل چیں چین میں ایران میں ساسانی بھی
اسی معمورے میں آباد تھے یونانی بھی
اسی دنیا میں یہودی بھی تھے نصرانی بھی
پر ترے نام پہ تلوار اٹھائی کس نے
بات جو بگڑی ہوئی تھی وہ بنائی کس نے
تھے ہمیں ایک ترے معرکہ آراؤں میں
خشکیوں میں کبھی لڑتے کبھی دریاؤں میں
دیں اذانیں کبھی یورپ کے کلیساؤں میں
کبھی ایفریقا کے تپتے ہوئے صحراؤں میں
شان آنکھوں میں نہ جچتی تھی جہانداروں کی
کلمہ پڑھتے تھے ہمیں چھاؤں میں تلواروں کی
ہم جو جیتے تھے تو جنگوں کی مصیبت کے لیے
اور مرتے تھے ترے نام کی عظمت کے لیے
تھی نہ کچھ تیغ زنی اپنی حکومت کے لیے
سر بکف پھرتے تھے کیا دہر میں دولت کے لیے
قوم اپنی جو زرو و مال جہاں پر مرتی
بت فروشی کے عوض بت شکنی کیوں کرتی
ٹل نہ سکتے تھے اگر جنگ میں اڑ جاتے تھے
پاؤں شیروں کے بھی میداں سے اکھڑ جاتے تھے
تجھ سے سرکش ہوا کوئی تو بگڑ جاتے تھے
تیغ کیا چیز ہے ہم توپ سے لڑ جاتے تھے
نقش توحید کا ہر دل پہ بٹھایا ہم نے
زیر خنجر بھی یہ پیغام سنایا ہم نے
تو ہی کہہ دے کہ اکھاڑا در خیبر کس نے
شہر قیصر کا جو تھا اس کو کیا سر کس نے
توڑے مخلوق خدا وندوں کے پیکر کس نے
کاٹ کر رکھ دئیے کفار کے لشکر کس نے
کس نے ٹھنڈا کیا آتشکدۂ ایراں کو
کس نے پھر زندہ کیا تذکرۂ یزداں کو
کون سی قوم فقط تیری طلب گار ہوئی
اور تیرے لیے زحمت کش پیکار ہوئی
کس کی شمشیر جہانگیر جہاں دار ہوئی
کس کی تکبیر سے دنیا تری بیدار ہوئی
کس کی ہیبت سے صنم سہمے ہوئے رہتے تھے
منہ کے بل گر کے ہو اللہ احد کہتے تھے
آ گیا عین لڑائی میں اگر وقت نماز
قبلہ رو ہو کے زمیں بوس ہوئی ہوئی قوم حجاز
ایک ہی صف میں کھڑے ہو گئے محمود و ایاز
نہ کوئی بندہ رہا اور نہ کوئی بندہ نواز
بندہ و صاحب و محتاج و غنی ایک ہوئے
تیری سرکار میں پہنچے تو سبھی ایک ہوئے
محفل کون و مکاں میں سحر و شام پھرے
مئے توحید کو لے کر صفت جام پھرے
کوہ میں دشت میں لے کر ترا پیغام پھرے
اور معلوم ہے تجھ کو کبھی ناکام پھرے
دشت تو دشت ہیں دریا بھی نہ چھوڑے ہم نے
بحر ظلمات میں دوڑا دئیے گھوڑے ہم نے
صفحۂ دہر سے باطل کو مٹایا ہم نے
نوع انساں کو غلامی سے چھڑایا ہم نے
تیرے کعبے کو جبینوں سے بسایا ہم نے
تیرے قرآن کو سینوں سے لگایا ہم نے
پھر بھی ہم سے یہ گلہ ہے کہ وفادار نہیں
ہم وفادار نہیں تو بھی تو دل دار نہیں
امتیں اور بھی ہیں ان میں گنہ گار بھی ہیں
عجز والے بھی ہیں مست مئے پندار بھی ہیں
ان میں کاہل بھی ہیں غافل بھی ہیں ہشیار بھی ہیں
سیکڑوں ہیں کہ ترے نام سے بے زار بھی ہیں
رحمتیں ہیں تری اغیار کے کاشانوں پر
برق گرتی ہے تو بے چارے مسلمانوں پر
بت صنم خانوں میں کہتے ہیں مسلمان گئے
ہے خوشی ان کو کہ کعبے کے نگہبان گئے
منزل دہر سے اونٹوں کے حدی خوان گئے
اپنی بغلوں میں دبائے ہوئے قرآن گئے
خندہ زن کفر ہے احساس تجھے ہے کہ نہیں
اپنی توحید کا کچھ پاس تجھے ہے کہ نہیں
یہ شکایت نہیں ہیں ان کے خزانے معمور
نہیں محفل میں جنہیں بات بھی کرنے کا شعور
قہر تو یہ ہے کہ کافر کو ملیں حور و قصور
اور بے چارے مسلماں کو فقط وعدۂ حور
اب وہ الطاف نہیں ہم پہ عنایات نہیں
بات یہ کیا ہے کہ پہلی سی مدارات نہیں
کیوں مسلمانوں میں ہے دولت دنیا نایاب
تیری قدرت تو ہے وہ جس کی نہ حد ہے نہ حساب
تو جو چاہے تو اٹھے سینۂ صحرا سے حباب
رہرو دشت ہو سیلی زدۂ موج سراب
طعن اغیار ہے رسوائی ہے ناداری ہے
کیا ترے نام پہ مرنے کا عوض خواری ہے
بنی اغیار کی اب چاہنے والی دنیا
رہ گئی اپنے لیے ایک خیالی دنیا
ہم تو رخصت ہوئے اوروں نے سنبھالی دنیا
پھر نہ کہنا ہوئی توحید سے خالی دنیا
ہم تو جیتے ہیں کہ دنیا میں ترا نام رہے
کہیں ممکن ہے کہ ساقی نہ رہے جام رہے
تیری محفل بھی گئی چاہنے والے بھی گئے
شب کی آہیں بھی گئیں صبح کے نالے بھی گئے
دل تجھے دے بھی گئے اپنا صلہ لے بھی گئے
آ کے بیٹھے بھی نہ تھے اور نکالے بھی گئے
آئے عشاق گئے وعدۂ فردا لے کر
اب انہیں ڈھونڈ چراغ رخ زیبا لے کر
درد لیلیٰ بھی وہی قیس کا پہلو بھی وہی
نجد کے دشت و جبل میں رم آہو بھی وہی
عشق کا دل بھی وہی حسن کا جادو بھی وہی
امت احمد مرسل بھی وہی تو بھی وہی
پھر یہ آرزدگئ غیر سبب کیا معنی
اپنے شیداؤں پہ یہ چشم غضب کیا معنی
تجھ کو چھوڑا کہ رسول عربی کو چھوڑا
بت گری پیشہ کیا بت شکنی کو چھوڑا
عشق کو عشق کی آشفتہ سری کو چھوڑا
رسم سلمان و اویس قرنی کو چھوڑا
آگ تکبیر کی سینوں میں دبی رکھتے ہیں
زندگی مثل بلال حبشی رکھتے ہیں
عشق کی خیر وہ پہلی سی ادا بھی نہ سہی
جادہ پیمائی تسلیم و رضا بھی نہ سہی
مضطرب دل صفت قبلہ نما بھی نہ سہی
اور پابندی آئین وفا بھی نہ سہی
کبھی ہم سے کبھی غیروں سے شناسائی ہے
بات کہنے کی نہیں تو بھی تو ہرجائی ہے
سر فاراں پہ کیا دین کو کامل تو نے
اک اشارے میں ہزاروں کے لیے دل تو نے
آتش اندوز کیا عشق کا حاصل تو نے
پھونک دی گرمئ رخسار سے محفل تو نے
آج کیوں سینے ہمارے شرر آباد نہیں
ہم وہی سوختہ ساماں ہیں تجھے یاد نہیں
وادیٔ نجد میں وہ شور سلاسل نہ رہا
قیس دیوانۂ نظارۂ محمل نہ رہا
حوصلے وہ نہ رہے ہم نہ رہے دل نہ رہا
گھر یہ اجڑا ہے کہ تو رونق محفل نہ رہا
اے خوشا آں روز کہ آئی و بصد ناز آئی
بے حجابانہ سوئے محفل ما باز آئی
بادہ کش غیر ہیں گلشن میں لب جو بیٹھے
سنتے ہیں جام بکف نغمۂ کو کو بیٹھے
دور ہنگامۂ گلزار سے یکسو بیٹھے
تیرے دیوانے بھی ہیں منتظر ہو بیٹھے
اپنے پروانوں کو پھر ذوق خود افروزی دے
برق دیرینہ کو فرمان جگر سوزی دے
قوم آوارہ عناں تاب ہے پھر سوئے حجاز
لے اڑا بلبل بے پر کو مذاق پرواز
مضطرب باغ کے ہر غنچے میں ہے بوئے نیاز
تو ذرا چھیڑ تو دے تشنۂ مضراب ہے ساز
نغمے بیتاب ہیں تاروں سے نکلنے کے لیے
طور مضطر ہے اسی آگ میں جلنے کے لیے
مشکلیں امت مرحوم کی آساں کر دے
مور بے مایہ کو ہمدوش سلیماں کر دے
جنس نایاب محبت کو پھر ارزاں کر دے
ہند کے دیر نشینوں کو مسلماں کر دے
جوئے خوں می چکد از حسرت دیرینۂ ما
می تپد نالہ بہ نشتر کدۂ سینۂ ما
بوئے گل لے گئی بیرون چمن راز چمن
کیا قیامت ہے کہ خود پھول ہیں غماز چمن
عہد گل ختم ہوا ٹوٹ گیا ساز چمن
اڑ گئے ڈالیوں سے زمزمہ پرداز چمن
ایک بلبل ہے کہ ہے محو ترنم اب تک
اس کے سینے میں ہے نغموں کا تلاطم اب تک
قمریاں شاخ صنوبر سے گریزاں بھی ہوئیں
پتیاں پھول کی جھڑ جھڑ کے پریشاں بھی ہوئیں
وہ پرانی روشیں باغ کی ویراں بھی ہوئیں
ڈالیاں پیرہن برگ سے عریاں بھی ہوئیں
قید موسم سے طبیعت رہی آزاد اس کی
کاش گلشن میں سمجھتا کوئی فریاد اس کی
لطف مرنے میں ہے باقی نہ مزہ جینے میں
کچھ مزہ ہے تو یہی خون جگر پینے میں
کتنے بیتاب ہیں جوہر مرے آئینے میں
کس قدر جلوے تڑپتے ہیں مرے سینے میں
اس گلستاں میں مگر دیکھنے والے ہی نہیں
داغ جو سینے میں رکھتے ہوں وہ لالے ہی نہیں
چاک اس بلبل تنہا کی نوا سے دل ہوں
جاگنے والے اسی بانگ درا سے دل ہوں
یعنی پھر زندہ نئے عہد وفا سے دل ہوں
پھر اسی بادۂ دیرینہ کے پیاسے دل ہوں
عجمی خم ہے تو کیا مے تو حجازی ہے مری
نغمہ ہندی ہے تو کیا لے تو حجازی ہے مری

علامہ اقبال
نظم

کیا سناتا ہے مجھے ترک و عرب کی داستاں
مجھ سے کچھ پنہاں نہیں اسلامیوں کا سوز و ساز
لے گئے تثلیث کے فرزند ميراث خليل
خشت بنیاد کلیسا بن گئی خاک حجاز
ہو گئی رسوا زمانے میں کلاہ لالہ رنگ
جو سراپا ناز تھے ہیں آج مجبور نياز
لے رہا ہے مے فروشان فرنگستاں سے پارس
وہ مے سرکش حرارت جس کی ہے مينا گداز
حکمت مغرب سے ملت کی یہ کیفیت ہوئی
ٹکڑے ٹکڑے جس طرح سونے کو کر دیتا ہے گاز
ہو گیا مانند‌ آب ارزاں مسلماں کا لہو
مضطرب ہے تو کہ تیرا دل نہیں دانائے راز
گفت رومی ہر بنائے کہنہ کآباداں کنند
می نداني اول آں بنیاد را ویراں کنند
ملک ہاتھوں سے گیا ملت کی آنکھیں کھل گئیں
حق ترا چشمے عطا کر دست غافل در نگر
مومیائی کی گدائی سے تو بہتر ہے شکست
مور بے‌ پر حاجتے پیش سلیمانے مبر
ربط و ضبط ملت بيضا ہے مشرق کی نجات
ایشیا والے ہیں اس نکتے سے اب تک بے خبر
پھر سیاست چھوڑ کر داخل حصار ديں میں ہو
ملک و دولت ہے فقط حفظ حرم کا اک ثمر
ایک ہوں مسلم حرم کی پاسبانی کے لئے
نیل کے ساحل سے لے کر تا‌‌ بخاک کاشغر
جو کرے گا امتياز رنگ و خوں مٹ جائے گا
ترک خرگاہی ہو یا اعرابیٔ والا گہر
نسل اگر مسلم کی مذہب پر مقدم ہو گئی
اڑ گیا دنیا سے تو مانند خاک رہ گزر
تا خلافت کی بنا دنیا میں ہو پھر استوار
لا کہیں سے ڈھونڈ کر اسلاف کا قلب و جگر
اے کہ نشناسی خفی را از جلی ہشیار باش
اے گرفتار‌‌ ابوبکر و علي ہشيار باش
عشق کو فریاد لازم تھی سو وہ بھی ہو چکی
اب ذرا دل تھام کر فریاد کی تاثیر دیکھ
تو نے دیکھا سطوت رفتار‌ دريا کا عروج
موج مضطر کس طرح بنتی ہے اب زنجیر دیکھ
عام حریت کا جو دیکھا تھا خواب اسلام نے
اے مسلماں آج تو اس خواب کی تعبیر دیکھ
اپنی خاکستر سمندر کو ہے سامان وجود
مر کے پھر ہوتا ہے پیدا یہ جہان پیر دیکھ
کھول کر آنکھیں مرے آئينۂ گفتار میں
آنے والے دور کی دھندلی سی اک تصویر دیکھ
آزمودہ فتنہ ہے اک اور بھی گردوں کے پاس
سامنے تقدیر کے رسوائی تدبير دیکھ
مسلم استی سینہ را از آرزو آباد دار
ہر زماں پیش نظر لایخلف المیعاد دار

علامہ اقبال
نظم

زمانہ آیا ہے بے حجابی کا عام دیدار یار ہوگا
سکوت تھا پردہ دار جس کا وہ راز اب آشکار ہوگا
گزر گیا اب وہ دور ساقی کہ چھپ کے پیتے تھے پینے والے
بنے گا سارا جہان مے خانہ ہر کوئی بادہ خوار ہوگا
کبھی جو آوارۂ جنوں تھے وہ بستیوں میں پھر آ بسیں گے
برہنہ پائی وہی رہے گی مگر نیا خارزار ہوگا
سنا دیا گوش منتظر کو حجاز کی خامشی نے آخر
جو عہد صحرائیوں سے باندھا گیا تھا پھر استوار ہوگا
نکل کے صحرا سے جس نے روما کی سلطنت کو الٹ دیا تھا
سنا ہے یہ قدسیوں سے میں نے وہ شیر پھر ہوشیار ہوگا
کیا مرا تذکرہ جو ساقی نے بادہ خواروں کی انجمن میں
تو پیر مے خانہ سن کے کہنے لگا کہ منہ پھٹ ہے خوار ہوگا
دیار مغرب کے رہنے والو خدا کی بستی دکاں نہیں ہے
کھرا جسے تم سمجھ رہے ہو وہ اب زر کم عیار ہوگا
تمہاری تہذیب اپنے خنجر سے آپ ہی خودکشی کرے گی
جو شاخ نازک پہ آشیانہ بنے گا ناپائیدار ہوگا
سفینۂ برگ گل بنا لے گا قافلہ مور ناتواں کا
ہزار موجوں کی ہو کشاکش مگر یہ دریا سے پار ہوگا
چمن میں لالہ دکھاتا پھرتا ہے داغ اپنا کلی کلی کو
یہ جانتا ہے کہ اس دکھاوے سے دل جلوں میں شمار ہوگا
جو ایک تھا اے نگاہ تو نے ہزار کر کے ہمیں دکھایا
یہی اگر کیفیت ہے تیری تو پھر کسے اعتبار ہوگا
کہا جو قمری سے میں نے اک دن یہاں کے آزاد پا بہ گل ہیں
تو غنچے کہنے لگے ہمارے چمن کا یہ رازدار ہوگا
خدا کے عاشق تو ہیں ہزاروں بنوں میں پھرتے ہیں مارے مارے
میں اس کا بندہ بنوں گا جس کو خدا کے بندوں سے پیار ہوگا
یہ رسم بزم فنا ہے اے دل گناہ ہے جنبش نظر بھی
رہے گی کیا آبرو ہماری جو تو یہاں بے قرار ہوگا
میں ظلمت شب میں لے کے نکلوں گا اپنے در ماندہ کارواں کو
شرر فشاں ہوگی آہ میری نفس مرا شعلہ بار ہوگا
نہیں ہے غیر از نمود کچھ بھی جو مدعا تیری زندگی کا
تو اک نفس میں جہاں سے مٹنا تجھے مثال شرار ہوگا
نہ پوچھ اقبالؔ کا ٹھکانا ابھی وہی کیفیت ہے اس کی
کہیں سر راہ گزار بیٹھا ستم کش انتظار ہوگا

علامہ اقبال
نظم

اے عشق ازل گیر و ابد تاب
یہ خواب مرے خواب نہیں ہیں کہ مرے خواب ہیں کچھ اور
کچھ اور مرے خواب ہیں کچھ اور مرا دور
خوابوں کے نئے دور میں نے مور و ملخ نے اسد و ثور
نے لذت تسلیم کسی میں نہ کسی کو ہوس جور
سب کے نئے طور!

ن م راشد
نظم

مارے ہیں موج ڈابر دریا ڈونڈ رہے ہیں
مور‌ و پپہیے کوئل کیا کیا رمنڈ رہے ہیں
جھڑ کر رہی ہیں جھڑیاں نالے امنڈ رہے ہیں
برسے ہے منہ جھڑا جھڑ بادل گھمنڈ رہے ہیں
کیا کیا مچی ہیں یارو برسات کی بہاریں

نظیر اکبرآبادی
نظم

میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن
گل پوش تیری وادیاں
فرحت نشاں راحت رساں
تیرے چمن زاروں پہ ہے
گلزار جنت کا گماں
ہر شاخ پھولوں کی چھڑی
ہر نخل طوبیٰ ہے یہاں
کوثر کے چشمے جا بجا
تسنیم ہر آب رواں
ہر برگ روح تازگی
ہر پھول جان گلستاں
ہر باغ باغ دلکشی
ہر باغ باغ بے خزاں
دل کش چراگاہیں تری
ڈھوروں کے جن میں کارواں
انجم صفت گلہائے نو
ہر تختۂ گل آسماں
نقش ثریا جا بجا
ہر ہر روش اک کہکشاں
تیری بہاریں دائمی
تیری بہاریں جاوداں
تجھ میں ہے روح زندگی
پیہم رواں پیہم دواں
دریا وہ تیرے تند خو
جھیلیں وہ تیری بے کراں
شام اودھ کے لب پہ ہے
حسن ازل کی داستاں
کہتی ہے راز سرمدی
صبح بنارس کی زباں
اڑتا ہے ہفت افلاک پر
ان کارخانوں کا دھواں
جن میں ہیں لاکھوں محنتی
صنعت گری کے پاسباں
تیری بنارس کی زری
رشک حریر و پرنیاں
بیدر کی فن کاری میں ہیں
صنعت کی سب باریکیاں
عظمت ترے اقبال کی
تیرے پہاڑوں سے عیاں
دریاؤں کا پانی، تری
تقدیس کا اندازہ داں
کیا بھارتیندوؔ نے کیا
گنگا کی لہروں کا بیاں
اقبالؔ اور چکبستؔ ہیں
عظمت کے تیری نغمہ خواں
جوشؔ و فراقؔ و پنتؔ ہیں
تیرے ادب کے ترجماں
تلسیؔ و خسروؔ ہیں تیری
تعریف میں رطب اللساں
گاتے ہیں نغمہ مل کے سب
اونچا رہے تیرا نشاں
میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن
تیرے نظاروں کے نگیں
دنیا کی خاتم میں نہیں
سارے جہاں میں منتخب
کشمیر کی ارض حسیں
فطرت کا رنگیں معجزہ
فردوس بر روئے زمیں
فردوس بر روئے زمیں
ہاں ہاں ہمیں است و ہمیں
سر سبز جس کے دشت ہیں
جس کے جبل ہیں سرمگیں
میوے بہ کثرت ہیں جہاں
شیریں مثال انگبیں
ہر زعفراں کے پھول میں
عکس جمال حورعیں
وہ مالوے کی چاندنی
گم جس میں ہوں دنیا و دیں
اس خطۂ نیرنگ میں
ہر اک فضا حسن آفریں
ہر شے میں حسن زندگی
دل کش مکاں دل کش زمیں
ہر مرد مرد خوب رو
ہر ایک عورت نازنیں
وہ تاج کی خوش پیکری
ہر زاویے سے دل نشیں
صنعت گروں کے دور کی
اک یادگار مرمریں
ہوتی ہے جو ہر شام کو
فیض شفق سے احمریں
دریا کی موجوں سے الگ
یا اک بط نظارہ بیں
یا طائر نوری کوئی
پرواز کرنے کے قریں
یا اہل دنیا سے الگ
اک عابد عزلت گزیں
نقش اجنتا کی قسم
جچتا نہیں ارژنگ چیں
شان ایلورا دیکھ کر
جھکتی ہے آذر کی جبیں
چتوڑ ہو یا آگرہ
ایسے نہیں قلعے کہیں
بت گر ہو یا نقاش ہو
تو سب کی عظمت کا امیں
میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن
دل کش ترے دشت و چمن
رنگیں ترے شہر و چمن
تیرے جواں رعنا جواں
تیرے حسیں گل پیرہن
اک انجمن دنیا ہے یہ
تو اس میں صدر انجمن
تیرے مغنی خوش نوا
شاعر ترے شیریں سخن
ہر ذرہ اک ماہ مبیں
ہر خار رشک نستریں
غنچہ ترے صحرا کا ہے
اک نافۂ مشک ختن
کنکر ہیں تیرے بے بہا
پتھر ترے لعل یمن
بستی سے جنگل خوب تر
باغوں سے حسن افروز بن
وہ مور وہ کبک دری
وہ چوکڑی بھرتے ہرن
رنگیں ادا وہ تتلیاں
بابنی میں وہ ناگوں کے پھن
وہ شیر جن کے نام سے
لرزے میں آئے اہرمن
کھیتوں کی برکت سے عیاں
فیضان رب ذو المنن
چشموں کے شیریں آب سے
لذت کشاں کام و دہن
تابندہ تیرا عہد نو
روشن ترا عہد کہن
کتنوں نے تجھ پر کر دیا
قربان اپنا مال دھن
کتنے شہیدوں کو ملے
تیرے لیے دار و رسن
کتنوں کو تیرا عشق تھا
کتنوں کو تھی تیری لگن
تیرے جفا کش محنتی
رکھتے ہیں عزم کوہ کن
تیرے سپاہی سورما
بے مثل یکتائے زمن
بھیشمؔ سا جن میں حوصلہ
ارجنؔ سا جن میں بانکپن
عالم جو فخر علم ہیں
فن کار نازاں جن پہ فن
رائےؔ و بوسؔ و شیرؔگل
دنکرؔ، جگرؔ متھلیؔ شرن
ولاٹھولؔ، ماہرؔ، بھارتی
بچنؔ، مہادیویؔ، سمنؔ
کرشننؔ، نرالاؔ، پریمؔ چند
ٹیگورؔ و آزادؔ و رمنؔ
میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن
کھیتی تری ہر اک ہری
دل کش تری خوش منظری
تیری بساط خاک کے
ذرے ہیں مہر و مشتری
جہلم کاویری ناگ وہ
گنگا کی وہ گنگوتری
وہ نربدا کی تمکنت
وہ شوکت گوداوری
پاکیزگی سرجو کی وہ
جمنا کی وہ خوش گوہری
دلربہ آب نیلگوں
کشمیر کی نیلم پری
دل کش پپیہے کی صدا
کوئل کی تانیں مد بھری
تیتر کا وہ حق سرہ
طوطی کا وہ ورد ہری
صوفی ترے ہر دور میں
کرتے رہے پیغمبری
چشتیؔ و نانکؔ سے ملی
فقر و غنا کو برتری
عدل جہانگیری میں تھی
مضمر رعایا پروری
وہ نورتن جن سے ہوئی
تہذیب دور اکبری
رکھتے تھے افغان و مغل
اک صولت اسکندری
راناؤں کے اقبال کی
ہوتی ہے کس سے ہم سری
ساونت وہ یودھا ترے
تیرے جیالے وہ جری
نیتی ودر کی آج تک
کرتی ہے تیری رہبری
اب تک ہے مشہور زماں
چانکیہؔ کی دانش وری
ویاس اور وشوامتر سے
منیوں کی شان قیصری
پاتنجلی و سانکھ سے
رشیوں کی حکمت پروری
بخشے تجھے انعام نو
ہر دور چرخ چنبری
خوش گوہری دے آب کو
اور خاک کو خوش جوہری
ذروں کو مہر افشانیاں
قطروں کو دریا گستری
میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن
تو رہبر نوع بشر
تو امن کا پیغام بر
پالے ہیں تو نے گود میں
صاحب خرد صاحب نظر
افضل تریں ان سب میں ہے
باپو کا نام معتبر
ہر لفظ جس کا دل نشیں
ہر بات جس کی پر اثر
جس نے لگایا دہر میں
نعرہ یہ بے خوف و خطر
بے کار ہیں تیر و سناں
بے سود ہیں تیغ و تبر
ہنسا کا رستہ جھوٹ ہے
حق ہے اہنسا کی ڈگر
درماں ہے یہ ہر درد کا
یہ ہر مرض کا چارہ گر
جنگاہ عالم میں کوئی
اس سے نہیں بہتر سپر
کرتا ہوں میں تیرے لیے
اب یہ دعائے مختصر
رونق پہ ہوں تیرے چمن
سرسبز ہوں تیرے شجر
نخل امید بہتری
ہر فصل میں ہو بارور
کوشش ہو دنیا میں کوئی
خطہ نہ ہو زیر و زبر
تیرا ہر اک باسی رہے
نیکو صفت نیکو سیر
ہر زن سلیقہ مند ہو
ہر مرد ہو صاحب ہنر
جب تک ہیں یہ ارض و فلک
جب تک ہیں یہ شمس و قمر
میرے وطن، پیارے وطن
راحت کے گہوارے وطن
ہر دل کے اجیارے وطن
ہر آنکھ کے تارے وطن

عرش ملسیانی
نظم

اوروں کا ہے پیام اور میرا پیام اور ہے
عشق کے درد مند کا طرز کلام اور ہے
طائر زیر دام کے نالے تو سن چکے ہو تم
یہ بھی سنو کہ نالہ طائر بام اور ہے
آتی تھی کوہ سے صدا راز حیات ہے سکوں
کہتا تھا مور ناتواں لطف خرام اور ہے
جذب حرم سے ہے فروغ انجمن حجاز کا
اس کا مقام اور ہے اس کا نظام اور ہے
موت ہے عیش جاوداں ذوق طلب اگر نہ ہو
گردش آدمی ہے اور گردش جام اور ہے
شمع سحر یہ کہہ گئی سوز ہے زندگی کا ساز
غم کدۂ نمود میں شرط دوام اور ہے
بادہ ہے نيم رس ابھی شوق ہے نارسا ابھی
رہنے دو خم کے سر پہ تم خشت کلیسیا ابھی

علامہ اقبال
نظم

گرمی کی تپش بجھانے والی
سردی کا پیام لانے والی
قدرت کے عجائبات کی کاں
عارف کے لیے کتاب عرفاں
وہ شاخ و درخت کی جوانی
وہ مور و ملخ کی زندگانی
وہ سارے برس کی جان برسات
وہ کون خدا کی شان برسات
آئی ہے بہت دعاؤں کے بعد
وہ سیکڑوں التجاؤں کے بعد
وہ آئی تو آئی جان میں جاں
سب تھے کوئی دن کے ورنہ مہماں
گرمی سے تڑپ رہے تھے جان دار
اور دھوپ میں تپ رہے تھے کہسار
بھوبل سے سوا تھا ریگ صحرا
اور کھول رہا تھا آب دریا
سانڈے تھے بلوں میں منہ چھپائے
اور ہانپ رہے تھے چارپائے
تھیں لومڑیاں زباں نکالے
اور لو سے ہرن ہوئے تھے کالے
چیتوں کو نہ تھی شکار کی سدھ
ہرنوں کو نہ تھی قطار کی سدھ
تھے شیر پڑے کچھار میں سست
گھڑیال تھے رود بار میں سست
ڈھوروں کا ہوا تھا حال پتلا
بیلوں نے دیا تھا ڈال کندھا
بھینسوں کے لہو نہ تھا بدن میں
اور دودھ نہ تھا گئو کے تھن میں
گھوڑوں کا چھٹا تھا گھاس دانہ
تھا پیاس کا ان پہ تازیانہ
گرمی کا لگا ہوا تھا بھبکا
اور انس نکل رہا تھا سب کا
طوفان تھے آندھیوں کے برپا
اٹھتا تھا بگولے پر بگولا
آرے تھے بدن پہ لو کے چلتے
شعلے تھے زمین سے نکلتے
تھی آگ کا دے رہی ہوا کام
تھا آگ کا نام مفت بد نام
رستوں میں سوار اور پیدل
سب دھوپ کے ہاتھ سے تھے بے کل
گھوڑوں کے نہ آگے اٹھتے تھے پاؤں
ملتی تھی کہیں جو روکھ کی چھاؤں
تھی سب کی نگاہ سوئے افلاک
پانی کی جگہ برستی تھی خاک

الطاف حسین حالی
نظم

وہ باغوں میں کوئل وہ جنگل کے مور
وہ گنگا کی لہریں وہ جمنا کا زور
ہمارا وطن دل سے پیارا وطن

چکبست برج نرائن
نظم

چار باغ اسٹیشن دیکھو
شہر میں ایک نیا پن دیکھو
سجی سجائی دلہن دیکھو
قدم قدم پر فیشن دیکھو
آؤ تمہیں لکھنؤ دکھائیں
اور یہاں کی سیر کرائیں
کتنا اچھا چڑیا گھر ہے
شیر ہرن بھالو بندر ہے
مور کبوتر اور تیتر ہے
اندر مردہ عجائب گھر ہے
آؤ تمہیں لکھنؤ دکھائیں
اور یہاں کی سیر کرائیں
حضرت گنج کی سیر کرائیں
قیصر باغ کی لاٹ دکھائیں
اور امین آباد گھمائیں
شام اودھ رنگین بنائیں
آؤ تمہیں لکھنؤ دکھائیں
اور یہاں کی سیر کرائیں
یہ پوری یوپی کا دل ہے
اس میں ایک چھتر منزل ہے
آرٹ اسکول لب ساحل ہے
ندوہ دیکھنے کے قابل ہے
آؤ تمہیں لکھنؤ دکھائیں
اور یہاں کی سیر کرائیں
چوک نخاس حسین آباد
گولا گنج نظیر آباد
پیار محبت میں آزاد
مرد و زن شیریں فرہاد
آؤ تمہیں لکھنؤ دکھائیں
اور یہاں کی سیر کرائیں
آؤ شہد اسمارک دکھائیں
جھنڈے والے پارک میں جائیں
بیلی گارد کو سمجھائیں
میڈیکل کالج دکھلائیں
آؤ تمہیں لکھنؤ دکھائیں
اور یہاں کی سیر کرائیں
یہ سب شہروں میں نیارا ہے
نام اس کا کتنا پیارا ہے
سب کی آنکھوں کا تارا ہے
امن و سکوں کا گہوارا ہے
آؤ تمہیں لکھنؤ دکھائیں
اور یہاں کی سیر کرائیں

جاوید اقبال
نظم

پہلے ایسا ہوتا تھا
بھانت بھانت کے بندر
شہر کی فصیلوں پر
محفلیں جماتے تھے
گھر میں کود آتے تھے
ہاتھ میں سے بچوں کے
روٹی نوچ جاتے تھے
اب تو وہ مداری بھی
خالی ہاتھ آتا ہے
بھیک مانگ کر گھر گھر
گھر کو لوٹ جاتا ہے
اب گھروں میں چڑیوں کا
شور کیوں نہیں ہوتا
رات کو کوئی الو
پیڑ پر نہیں روتا
پیڑ پر نہیں روتا
لڑتے لڑتے چڑیاں کیوں
فرش پر نہیں گرتیں
بلیاں چھتوں پر کیوں
گھومتی نہیں پھرتیں
اب نہ کوئی بلبل ہے
اور نہ کوئی مینا ہے
اب نہ کوئی تیتر ہے
اور نہ کوئی طوطا ہے
کس سے پوچھنے جائیں
مور کیسا ہوتا ہے
ٹولیاں کبوتر کی
کھو گئیں فضاؤں میں
تتلیوں کے رنگیں پر
بہہ گئے ہواؤں میں
منہ اندھیرے اب مرغا
بانگ کیوں نہیں دیتا
گھر میں کوئی بکری کا
نام کیوں نہیں لیتا
کیا ہوئے درختوں پر
گھونسلے پرندوں کے
کوئی بھی نہیں کہتا
قصے اب درندوں کے
ننھے ننھے چوزوں پر
چیل کا جھپٹنا اب
دیکھنے کہاں جائیں
راستے میں سانڈوں کا
پہروں لڑتے رہنا اب
دیکھنے کہاں جائیں
چھپکلی کی جیتی دم
اب تھرکتی کیا پائیں
رنگ بدلتے گرگٹ کو
مارتے کہاں جائیں
گائے بھینس کا ریوڑ
اب ادھر نہیں آتا
اونٹ ٹیڑھا‌ میڑھا سا
اب نظر نہیں آتا
اب نہ گھوڑے ہاتھی ہیں
اور نہ وہ براتی ہیں
اب گلی میں کتوں کا
بھونکنا نہیں ہوتا
رات چھت پہ سوتے ہیں
بھوت دیکھ کر کوئی
چونکنا نہیں ہوتا
اب جدھر بھی جاتے ہیں
آدمی کو پاتے ہیں

محمد علوی
نظم

میرے پاس راتوں کی تاریکی میں
کھلنے والے پھول ہیں
اور بے خوابی
دنوں کی مرجھائی ہوئی روشنی ہے
اور بینائی
میرے پاس لوٹ جانے کو ایک ماضی ہے
اور یاد۔۔۔
میرے پاس مصروفیت کی تمام تر رنگا رنگی ہے
اور بے معنویت
اور ان سب سے پرے کھلنے والی آنکھ
میں آسماں کو اوڑھ کر چلتا
اور زمین کو بچھونا کرتا ہوں
جہاں میں ہوں
وہاں ابدیت اپنی گرہیں کھولتی ہے
جنگل جھومتے ہیں
بادل برستے ہیں
مور ناچتے ہیں
میرے سینے میں ایک سمندر نے پناہ لے رکھی ہے
میں اپنی آگ میں جلتا
اپنی بارشوں میں نہاتا ہوں
میری آواز میں
بہت سی آوازوں نے گھر کر رکھا ہے
اور میرا لباس
بہت سی دھجیوں کو جوڑ کر تیار کیا گیا ہے
میری آنکھوں میں
ایک گرتے ہوئے شہر کا سارا ملبہ ہے
اور ایک مستقل انتظار
اور آنسو
اور ان آنسوؤں سے پھول کھلتے ہیں
تالاب بنتے ہیں
جن میں پرندے نہاتے ہیں
ہنستے اور خواب دیکھتے ہیں
میرے پاس
دنیا کو سنانے کے لیے کچھ گیت ہیں
اور بتانے کے لیے کچھ باتیں
میں رد کیے جانے کی لذت سے آشنا ہوں
اور پذیرائی کی دل نشیں مسکراہٹ سے
بھرا رہتا ہوں
میرے پاس
ایک عاشق کی وارفتگی
در گذر اور بے نیازی ہے
تمہاری اس دنیا میں
میرے پاس کیا کچھ نہیں ہے
وقت اور تم پر اختیار کے سوا؟

ابرار احمد
نظم

پتہ نہیں وہ کون تھا
جو میرے ہاتھ
موگرے کی ڈال پنکھ مور کا تھما کے چل دیا
پتہ نہیں وہ کون تھا
ہوا کے جھونکے کی طرح جو آیا اور گزر گیا
نظر کو رنگ دل کو نکہتوں کے دکھ سے بھر گیا
میں کون ہوں
گزرنے والا کون تھا
یہ پھول پنکھ کیا ہیں کیوں ملے
یہ سوچتے ہی سوچتے تمام رنگ ایک رنگ میں اترتے گئے
۔۔۔۔۔۔سیاہ رنگ
تمام نکہتیں ادھر ادھر بکھر گئیں
۔۔۔۔۔۔۔۔۔خلاؤں میں
یقین ہے۔۔۔۔۔۔ نہیں نہیں گمان ہے
وہ کوئی میرا دشمن قدیم تھا
دکھا کے جو سراب میری پیاس اور بڑھا گیا
میں بے حساب آرزوؤں کا شکار
انتہائے شوق میں فریب اس کا کھا گیا
گمان۔۔۔ نہیں نہیں یقین ہے
وہ کوئی میرا دوست تھا
جو دو گھڑی کے واسطے ہی کیوں نہ ہو
نظر کو رنگ دل کو نکہتوں سے بھر گیا
پتہ نہیں کدھر گیا
میں اس کو ڈھونڈھتا ہوا
تمام کائنات میں
ادھر ادھر بکھر گیا

بشر نواز
نظم

آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں
مانا یہ چاندی کی دنیا حسین ہے
دھرتی کی حوروں کا جلوہ حسین ہے
اونچے اونچے محلوں کا نغمہ حسین ہے
کیسے یہاں گھوموں کہ زور نہیں پاؤں میں
آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں
چار طرف اپنی ترقی کا زور ہے
ناچ رہا جیسے کہ جنگل میں مور ہے
بڑی بڑی زندہ مشینوں کا شور ہے
سانس گھٹی جائے یہاں کی ہواؤں میں
آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں
سڑکوں پہ گلیوں میں فلمی ترانہ
یاد نہیں لیکن خوشی کا فسانہ
ان کو مبارک مہذب زمانہ
کون رہے سندر منوہر بلاؤں میں
آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں
انسان جیسے ہوں باسی مزار کے
پھر بھی ہنسیں ہم کو دیہاتی پکار کے
ٹوٹ گئے تار یہاں من کے ستار کے
جنت ہماری وہیں پیپل کی چھاؤں میں
آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں
ابا جی آئے ہیں روٹی کمانے
بیت رہی کیا ان پہ اللہ جانے
اپنے ملیں اس طرح جیسے بیگانے
جان نہیں کوئی بھی نقلی اداؤں میں
آؤ چلیں ماں ٹھنڈی فضاؤں میں
شہروں سے دور کہیں چھوٹے سے گاؤں میں

سلام مچھلی شہری
نظم

چھا گئی برسات کی پہلی گھٹا اب کیا کروں
خوف تھا جس کا وہ آ پہنچی بلا اب کیا کروں
ہجر کو بہلا چلی تھی گرم موسم کی سموم
ناگہاں چلنے لگی ٹھنڈی ہوا اب کیا کروں
آنکھ اٹھی ہی تھی کہ ابر لالہ گوں کی چھاؤں میں
درد سے کہنے لگا کچھ جھٹپٹا اب کیا کروں
اشک ابھی تھمنے نہ پائے تھے کہ بیدردی کے ساتھ
بوندیوں سے بوستاں بجنے لگا اب کیا کروں
زخم اب بھرنے نہ پائے تھے کہ بادل چرخ پر
آ گیا انگڑائیاں لیتا ہوا اب کیا کروں
آ چکی تھی نیند سی غم کو کہ موسم ناگہاں
بحر و بر میں کروٹیں لینے لگا اب کیا کروں
چرخ کی بے رنگیوں سے سست تھی رفتار غم
یک بیک ہر ذرہ گلشن بن گیا اب کیا کروں
قفل باب شوق تھیں ماحول کی خاموشیاں
دفعتاً کافر پپیہا بول اٹھا اب کیا کروں
ہجر کا سینے میں کچھ کم ہو چلا تھا پیچ و تاب
بال بکھرانے لگی کالی گھٹا اب کیا کروں
آنکھ جھپکانے لگی تھی دل میں یاد لحن یاد
مور کی آنے لگی بن سے صدا اب کیا کروں
گھٹ چلا تھا غم کی رنگیں بدلیوں کی آڑ سے
ان کا چہرہ سامنے آنے لگا اب کیا کروں
آ رہی ہیں ابر سے ان کی صدائیں جوشؔ جوشؔ
اے خدا اب کیا کروں بار خدا اب کیا کروں

جوش ملیح آبادی
نظم

جو نہر حسن کی ہے موج مار چلتی ہے
علم لئے ہوئے آگے بہار چلتی ہے
اگاڑی مست صف گلعذار چلتی ہے
پچھاڑی عاشقوں کی سب قطار چلتی ہے
بھول کے دل میں خوشی کا خیال ہولی میں

نظیر اکبرآبادی
نظم

طوطا چھیڑے تھپ تھپ طبلہ مینا گیت سنائے
الو جب مردنگ بجائے کوا شور مچائے
ککڑوں کوں کی تان لگا کے مرغا گائے خیال
قمری اپنی ٹھمری گائے مرغی دیوے تال
مور اپنی دم کو پھیلا کر کتھک ناچ دکھائے
طوطا چھیڑے تھپ تھپ طبلہ مینا گیت سنائے
چڑیا باجی سبھا میں ناچے خوشی سے چھم چھم چھم
موٹی بطخ چونچ سے ڈھولک پیٹے دھم دھم دھم
بیا بجائے منجیرے اور بھونرا بھجن اڑائے
طوطا چھیڑے تھپ تھپ طبلہ مینا گیت سنائے
بلبل گل کی یاد میں رو رو گائے دیپک راگ
مست پپیہا دور سے نغموں کی بھڑکائے آگ
کوئل پہن کے پائل ساری محفل میں اٹھلائے
طوطا چھیڑے تھپ تھپ طبلہ مینا گیت سنائے
رنگ برنگی چڑیاں اب چھیڑیں ایسی قوالی
پتا پتا بوٹا بوٹا تال میں دیوے تالی
پھوپھی چیل وجد میں آ کر اونچی تان لگائے
طوطا چھیڑے تھپ تھپ طبلہ مینا گیت سنائے
انگلستان کا سارس آ کر ناچے راک این رول
مرغابی سے بولے میڈم انگلش گانا بول
دیکھو دیکھو کتنی پیاری محفل ہے یہ ہائے
طوطا چھیڑے تھپ تھپ طبلہ مینا گیت سنائے

راجہ مہدی علی خاں
نظم

تمہاری آنکھیں
تمہاری کالی چمکتی آنکھیں
زمانے کے ساگر میں
دو آبنوسی کشتیاں
جن کی تہہ میں
تارے جڑے ہوئے ہیں
پلکوں کے مستول تھرتھراتے ہیں
ہر گھڑی ہر دم
ہلتی ڈولتی بہتی چلی جا رہی ہیں
مت روکو ان کو
انہیں لمبے دور دراز سفر کرنے دو
دکھ کی تلملاتی لہروں
آنسوؤں کے بھنور میں
پھنسنے دو ان کو
اور انہیں پھر
نت نئی انجانی آشاؤں کے
سنہرے ساحلوں سے
ٹکرانے دو
ایسے ویسوں کے پاس انہیں لے جاؤ
جہاں خوشیوں کے ہیرے
پتھر کے ساتھ ملے جلے
چٹئیل میدانوں میں
بکھرے پڑے ہوئے ہیں
اور جہاں اونچی نوکیلی سخت
چٹانوں کے سینے
چیر کر
نازک نایاب مہکتے پھول نکل آئے ہیں
گزرنے دو
ان مٹیالے بھورے سایوں کے
نیچے سے ان کو
جو دل کو ٹھہرا دیتے ہیں
اور ان آسمانی نیلی
روشنیوں کی ہلکی مدھم ضو
پڑنے دو ان پر
جن سے
من کے سب اندھیارے
دھل جاتے ہیں
آزاد رکھو
اپنی ان اچھی آنکھوں کو آزاد
برکھا میں بادل
صحرا میں آہو
بن میں جیسے مور پپیہے ہوں
پھر یہ تمہاری
کالی آنکھیں
آبنوس کی دو مہکتی بہکتی کشتیاں
اندر دھنش کے
ساتوں رنگوں سے بھر جائیں گی
اور ہم تم سے پوچھیں گے
بتاؤ
یہ دو آنکھیں تمہاری
ہمیں کیوں اتنی اچھی لگتی ہیں

سجاد ظہیر
نظم

سمندر چھیڑتا ہے ساحرانہ سمفنی جس میں
نواجل دیوتاؤں کے ازل آثار شنکھوں کی
نواجل دیویوں کے مور پنکھوں کی
صدا آپس میں دھکا مارتی منہ زور موجوں کی
صدا ساحل کی چٹانوں سے ٹکراتی ہوئی پر شور موجوں کی
صدا اس شہر کی جو نشے کے عالم میں جاری اور ساری ہے
صدا اس شہر کی جس کے مقدر میں ہے روز و شب کی بے داری
صدا اس شہر کی جس میں درختوں اور پرندوں سے زیادہ آدمی ہوں گے
صدا اس شہر کی جس میں کہ انسانوں کے چھتے آسماں چھوتے ہوئے معلوم ہوتے ہیں
ابل پڑتا ہے دروازوں سے گلیوں اور سڑکوں کے مہانوں سے
اک آدم زاد چیونٹی دل
جہاں ہر دم بلا رفتار کاروں اور بسوں کی ہم نوا بن کر
مشینیں عہد حاضر کا قصیدہ پڑھتی رہتی ہیں
سمندر کے کنارے کا مشینی شہر سازینہ ہے
جس پر آتش و آہن کے نغمے رقص کرتے ہیں
سمندر کے کنارے مرد و زن کا اک سمندر اور بھی ہے
سمندر کی صدا میں اس سمندر کی صدائیں ڈوب جاتی ہیں
بے کرانی کی صدا میں

عمیق حنفی
نظم

آسمان کا ایک حصہ میرے دیکھنے کے لیے ہے
اور زمین کا ایک حصہ تمہارے چلنے کے لیے
سورج تمہاری آنکھوں سے نکلتا اور چاند
میرے دل میں ڈوب جاتا ہے
سمندر کا شور تمہارے دل میں بند ہے اور
دریا کی خاموشی میری آنکھوں میں
تم ایک کشتی میں سفر کرتی ہو اور میں
اس کے ساتھ ساتھ اڑنے والے بادل میں
مجھے دیوار پر بیٹھا ہوا سفید کبوتر اچھا لگتا ہے
اور تمہیں پنجرے میں قید ایک کالی چڑیا
جو اندھیرے میں بارش کے بعد
نکلنے والی بیر بہوٹیوں کی طرح سرخ ہو جاتی ہے
تمہارا دل گرینائٹ سے بنا ایک مور ہے جو اپنے پیروں کو دیکھ کر رو نہیں سکتا
اور میرا دل مٹی میں دھنسی ہوئی ایک بارودی سرنگ
جو تمہیں راستے سے گزرتا دیکھ کر
دھماکے سے ٹکڑے ٹکڑے ہونا بھول جاتا ہے

ذیشان ساحل
Load More
Best poetry resource in urdu
تلاش
Get App
URD
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
بولیے