Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "Tik"

Nazm MATCHES FOR "Tik"

Nazm

mujhe apne jine ka haq chahiye

mujhe apne jiine kaa haq chaahiye
zamii.n jis pe mere qadam Tik sake.n
aur taaro.n bharaa kuchh falak chaahiye
mujhe apne jiine kaa haq chaahiye
nemate.n jo mere rab ne dhartii ko dii.n
saaf paanii havaa baarishe.n chaa.ndnii
ye to har ibn-e-aadam kii jaagiir hai.n
ye hamaarii tumhaarii kisii kii nahii.n
mujh ko ta.aliim sehat aur ummiid kii
saat ra.ngo.n bharii ik dhanak chaahiye
mujhe apne jiine kaa haq chaahiye
na havaa saaf hai na fazaa saaf hai
vo jo aab-e-baqaa thaa vo naa-saaf hai
zamii.n ho samundar ho yaa aasmaa.n
ik zaraa sochiye ab ki kyaa saaf hai
maut se pur-KHatar hai ye aaluudgii
dosto dil me.n tho.Dii kasak chaahiye
mujhe apne jiine kaa haq chaahiye

Amjad Islam Amjad
Nazm

shayad miTTi mujhe phir pukare

mere aa'zaa par e'tibaar kar
mai.n hairato.n kaa inkaar huu.n
muKHtalif rang ke charaaG
aur paaniyo.n kii zabaane.n
aadmii insaan hone chalaa thaa ki ku.aa.n suukh gayaa
kyaa aadmii ne ku.n.e.n me.n nafrat phe.nk dii thii
nahii.n
vo sadaa gumbad ko to.Dtii hu.ii
tho.Daa saa aasmaan bhii to.D laa.ii thii
chaadar aur aavaaz ko tah kar ke rakh do
lauTne tak merii aavaaz dhartii pe guu.njtii rahe
jaise jaise tum jaa.oge
KHatm hote jaa.oge
tum do aa.nkhe.n rakhnaa magar faasle ko bedaar mat karnaa
aa.nkho.n kii Tik-Tik saaraa jangal jaantaa hai

Sara Shagufta
Nazm

naya sal

phir vahii Tik-Tik gha.Dii kii aur puraane faasle
phir vahii office kii jaldii phir vahii shikve gile

Shahroz Khawar
Nazm

hamare kamre mein pattiyon ki mahak ne

cigarette ke raqs karte dhu.e.n se mil kar,
ajiib maahaul kar diyaa hai
aur is pe ab ye gha.Dii kii Tik-Tik ne,
dil udaasii se bhar diyaa hai
kisii zamaane me.n ham ne,
'naasir', 'faraaz', 'mohsin', 'jamaal', 'sarvat' ke sher apnii chahaktii diivaar par likhe the
ab is me.n siilan kyuu.n aa ga.ii hai....?
hamaaraa bistar ki jis me.n ko.ii shikan nahii.n hai, usii pe kab se,
(vo daa.e.n jaanib, mai.n baa.e.n jaanib....)
na jaane kab se daraaz hai.n ham....!!!
mai.n us se shaayad KHafaa nahii.n huu.n,
use bhii ko.ii gila nahii.n hai
magar hamaarii KHamiida pushte.n jo pichhlii kitnii hii saa.ato.n se
bas ek duuje ko tak rahii hai.n....
vo thak ga.ii hai

Fariha Naqvi
Nazm

panghaT ki rani

aa.ii vo panghaT kii devii, vo panghaT kii raanii
duniyaa hai matvaalii jis kii aur fitrat diivaanii
maathe par sinduurii Tiikaa ra.ngiin o nuuraanii
suuraj hai aakaash me.n jis kii zau se paanii-paanii
chham-chham us ke bachhve bole.n jaise gaa.e paanii
aa.ii vo panghaT kii devii vo panghaT kii raanii

Saghar Nizami
Nazm

mujhe apne jine ka haq chahiye

mujhe apne jiine kaa haq chaahiye
zamii.n jis pe mere qadam Tik sake.n
aur taaro.n bharaa kuchh falak chaahiye
mujhe apne jiine kaa haq chaahiye
ne.amate.n jo mere rab ne dhartii ko dii.n
saaf paanii havaa baarishe.n chaa.ndnii
ye to har ibn-e-aadam kii jaagiir hai.n
ye hamaarii tumhaarii kisii kii nahii.n
mujh ko ta.aliim sehat aur ummiid kii
saat ra.ngo.n bharii ik dhanak chaahiye
mujhe apne jiine kaa haq chaahiye
na havaa saaf hai na fazaa saaf hai
vo jo aab-e-baqaa thaa vo naa-saaf hai
zamii.n ho samundar ho yaa aasmaa.n
ik zaraa sochiye ab ki kyaa saaf hai
maut se pur-KHatar hai ye aaluudgii
dosto dil me.n tho.Dii kasak chaahiye
mujhe apne jiine kaa haq chaahiye

Amjad Islam Amjad
Nazm

mohabbat

tum apne kamre me.n gahrii tanhaa.iyo.n me.n gum the
gha.Dii kii Tik-Tik jo su.ii ko Tekte guzartii
tumhe.n ye mahsuus hone lagtaa
ki jaise sar par ka.ii hathau.De baras rahe hai.n
tumhaarii kursii kii charcharaahaT
tumhaarii tanhaa.iyo.n pe lagtaa ki bain kartii ko.ii rudaalii

Ambareen Haseeb ambar
Nazm

baTla house

gha.Dii kii Tik-Tik bol rahii hai raat ke shaayad ek baje hai.n
baTla house kii ek galii me.n moTe kutte bhau.nk rahe hai.n
ek kha.nDar me.n tez raushnii chaaro.n jaanib phail rahii hai
baGal me.n leTaa saathii meraa ab tak pub jii khel rahaa hai
mai.n bhii ab tak jaag rahaa huu.n aa.nkhe.n muu.nde soch rahaa huu.n
niiche jaanaa kaisaa hogaa baahar kitnii sardii hogii
qutub sitaara kidhar ko hogaa raat kii raanii kaisii hogii
sub.h kaa suuraj kahaa.n pe hogaa abhii KHudaa kyaa kartaa hogaa
sa.Dak kinaare sone vaale jo.De kaise sote ho.nge
in ko machchhar kaaTte ho.nge
naum chomsky lawn me.n baiThe bachche aaKHir kaise ho.nge
un ko kutte chaaTte ho.nge
kyaa in bhuuk-zada bachcho.n ke KHvaab me.n pariyaa.n aatii ho.ngii
kaTe-phaTe haatho.n ke takiye ke niiche kuchh rakhtii ho.ngii
kaisii baate.n karte ho jii kyaa pariyo.n kaa kaam yahii hai
mahal saraa.e chho.D ke ab vo sa.Dak kinaare aa.e.ngii kyaa
raat ke shaayad De.Dh baje hai.n baTla house kaa chauk khulaa hai
raat ko job se aane vaale raat me.n job ko jaane vaale
ek haath me.n liye chaa.e cup ek haath me.n chhoTii cigarette
sa.Dak paar kyo.n dekh rahe hai.n
biryaanii ko Dhuu.nDh rahe hai.n
un ke piichhe sa.Dak kinaare qabristaan kaa gate khulaa hai
andar kutte ghuum rahe hai.n shaayad khaanaa Dhuu.nDh rahe hai.n
baahar cigarette aur coffee hai andar kaafii taariikii hai
mai.n bhii andar jhaa.nk rahaa huu.n haule haule soch rahaa huu.n
qabristaan ke andar me.n ye latrine kis ne banvaayaa
kyo.n banvaayaa
shaayad murde raat me.n uTh kar us ke andar jaate ho.nge
haajat puurii karte ho.nge
yaa phir cigarette piine vaale la.Dke andar jaate ho.nge
KHaakii vardii ghar vaalo.n se chhup kar cigarette piite ho.nge
ek kinaare adab kii malika sab kuchh baiThii dekh rahii hai
aag kaa dariyaa chaa.ndnii begam shiishe kaa ghar likhne vaalii
ainii aapaa soch rahii hai
meraa qaarii kyo.n aayaa hai
shaayad is ko gautam shankar tal.at ne uljhaayaa hogaa
yaa phir us ko KHayaabaa.n kii champaa ne paglaayaa hogaa
yaa phir is paagal la.Dke ne shu.uur kii rau ko chhe.Daa hogaa
yaa phir is ne aag kaa dariyaa aadhaa pa.Dh kar chho.Daa hogaa
falsafyaana baate.n sun kar saare murde sochte ho.nge
ko.ii apnii KHvaab-gaah ko chho.D ke aaKHir kyo.n aayaa hai
mai.n bhii baiThaa soch rahaa huu.n
itnii raat ko kyo.n aayaa huu.n

Asim Badr
Nazm

chor

kisii kamre kisii viiraane me.n
kisii masjid kisii mai-KHaane me.n
kisii patthar ke sutuu.n se Tik kar
kisii diivaar ke siine se lagaa.e hu.e sar
so ga.ii raat bahut der hu.ii
chaa.nd bhii Duub gayaa
taare bad-KHvaah pa.Dosii kii tarah Gaur se dekh rahe hai.n
ki kisii aur pa.Dosii ke yahaa.n
raushnii kaisii hai kyaa hotaa hai
aa.o
aaise mai.n ne dekhe dekhegaa ko.ii
aa.o aur mujh ko churaa le jaa.o

Rahi Masoom Raza
Nazm

karachi ka traffic

chashm-e-bad-duur karachi me.n traffic kaa nizaam
uu.nT-gaa.Dii kii gadhaa-gaa.Dii kii Tik-Tik kaa nizaam
raahgiiro.n se police vaalo.n kii jhak jhak kaa nizaam
kitnaa choukas hai ye pasmaa.nda mamaalik kaa nizaam
raah roke hai police ''kaar-guzaarii'' dekho
kis tarah jaatii hai shaaho.n kii savaarii dekho

Syed Mohammad Jafri
Nazm

raushni ke minar

do samundar jahaa.n aapas me.n milaa karte hai.n
mai.n ne kitne sahar o shaam guzaare hai.n vahaa.n
mai.n ne dekhii hai nikalte hu.e suuraj kii kiran
aur kal hote hu.e din kii shafaq dekhii hai
mai.n ne maujo.n ke talaatum me.n guhar Dhuu.nDe hai.n
aur paa.e hai.n KHazaf reze bhii
jaal paanii se jab ik baar nikaalaa mai.n ne
ik gha.Daa ret bharaa haath aayaa
sabt thii mohr-e-sulaimaa.n jis par
aur kholaa to dhu.e.n kaa baadal
peT se us ke numuudaar hu.aa
aadmii ke liye ye behtar hai
ki muqaffal hii rahe.n kuchh chiize.n
ye fazaa.e.n ye sitaare ye falak
vaqt-e-gardaa.n kii musalsal Tik Tik
jaanvar kii.De mako.De hashraat
machhliyaa.n aur tuyuur
aur insaan jo pahle din se
aaKHirii roz talak
maut kii samt chalaa kartaa hai
justujuu par mujhe uksaate hai.n
aah lekin ye talaash
kar ga.ii aur bhii hairaa.n mujh ko
kyuu.n vo kashtii hu.ii suuraaKH-zada
jis me.n ham raat ko paar utre the
raah chalte hu.e muDbhe.D hu.ii thii jis se
kis KHataa par vo javaa.n qatl hu.aa
kitne be-bahra the tahziib se is shahr ke log
jin ko aate na the mehmaan-navaazii ke tariiq
phir bhalaa kis liye un kii KHaatir
ham ne girtii hu.ii diivaar ko taamiir kiyaa
raaz par raaz chhupaa rakkhe hai.n ik buu.Dhe ne
aur ham hai.n ki phiraa karte hai.n
har larazte hu.e saa.e kaa ta.aaqub karte
sham.a kii lau jise har aan badal detii hai

Muneebur Rahman
Nazm

tumhaare aane ke baad

tumhaare aane se pahle
kunjii taale me.n
ghuumtii hai
tumhaare daaKHil hone kii aavaaz aatii hai
tum dhamaake-daar paa.nv
rakhte hu.e
aahista se yaa kabhii tezii se
kamre me.n kahii.n kisii taraf
jaate hu.e
phir tho.Dii dair tak
vahii.n kha.De rahte ho
shaayad mere saakit jism ko
dekhte ho
jo tumhaarii harakat kii aavaaz par
kaan lagaa.e pa.Daa hotaa hai
kabhii be-KHabarii me.n
kabhii aagaah
phir tum paanii piite ho
yaa nahii.n piite
tho.De vaqfe tak
KHaamoshii rahtii hai
gha.Dii kii Tik Tik ke darmiyaan
tumhaare nivaale chabaane kii aavaaz
sunaa.ii detii hai
aur kabhii ye aavaaz mere jism ke
gard ghuumne lagtii hai
aur me.n be-KHabar
aur kabhii aagaah
tumhaarii nivaale chabaane kii aavaaz me.n
shaamil ho jaatii huu.n

Azra Abbas
Nazm

ghaDi

Tik-Tik kartii rahtii hai
dekho gha.Dii kyaa kahtii hai
chhuuT na jaa.e vaqt kii rail
pahle pa.Dhaa.ii piichhe khel
dekho gha.Dii kyaa kahtii hai
Tik-Tik kartii rahtii hai

Hashmat Kamal Pasha
Nazm

main sun nahin sakta

zindagii
bas kii qataar ke ishq kii tarah
sat.hii sahii lekin
be-kaif nahii.n
zindagii dilkash hai
shahr ke ha.ngaamo.n kii tarah
mai.n ha.ngaamo.n kaa
dil-daada huu.n
KHamoshii se nafrat hai mujhe
ki mai.n KHaamoshii me.n
biite kal kii Tik-Tik
gha.Dii kii tarah
sun nahii.n saktaa

Ehtisham Akhtar
Nazm

koh-e-nida

sub.h-savere
ek laraztii kaa.nptii sii aavaaz aatii hai
sone vaalo! tum maalik ko bhuul ga.e ho
tum maalik ko bhuul ga.e ho
phir chamkiilii mil kaa saa.eran
ek Galiiz Daraane vaalii tund sadaa ke ruup me.n Dhal kar
diivaaro.n se Takraataa hai
aur galiyo.n ke
ta.ng a.ndhere baa.De me.n kohraam machaa kar
bhe.Do.n ke galle ko haa.nk ke le jaataa hai
phir engine kii barham siiTii
meKH sii ban kar mere kaan me.n ga.D jaatii hai
aur shab bhar kii nuchii hu.ii ik rail kii bogii
apnii kalaa.ii engine ke panje me.n de kar
chal pa.Dtii hai
phir ik dam ik sannaaTaa saa chhaa jaataa hai
aur mai.n gha.Dii kii zaalim suu.iyo.n kii Tik Tik me.n
din ke zard pahaa.D pe cha.Dhne lagtaa huu.n

Wazir Agha
Nazm

tumhaare dard ko apne upar lene ke liye

mai.n mahsuus kar saktii huu.n
tumhaare dard ko
apne jism me.n utarte hu.e
magar yaqiin nahii.n kar paatii
ki ye tumhaaraa hii dard hai
gha.Dii kii Tik-Tik ke saath
mai.n sochtii rahtii huu.n
tumhaare bistar ke gird chakkar lagaa kar
mai.n is dard ko apne uupar lene ke liye
kyaa kyaa qurbaan kar saktii huu.n
jismaanii raahate.n
samaajii muraa.aat
jazbaatii masarrate.n
zehnii lataafate.n
yaa puurii zindagii bhii
jo bahut qiimtii hai
aur mujhe bahut pyaarii

Tanveer Anjum
Nazm

kaun

kis ke lab pe achaanak nazar Tik ga.ii
Thahre Thahre qadam kyuu.n lage bhaagne

Vinod Kumar Tripathi Bashar
Nazm

alag alag ikaiyan

sub.h se mai.n us gha.Dii kii Tik Tik sun rahaa huu.n
jo diivaar se achaanak Gaa.eb ho ga.ii hai
lekin har ghanTe ke iKHtitaam par
alarm dene lagtii hai
aur phir Tik Tik Tik
kabhii kabhii ye Tik Tik
mujhe apne siine me.n sunaa.ii detii hai
kabhii kalaa.ii kii nabz me.n
phir to jis chiiz ko uThaa kar kaan se lagaataa huu.n
vo Tik Tik karne aur alarm dene lagtii hai
achaanak mai.n apne aqab kii diivaar ko dekhtaa huu.n
vahaa.n mujhe ye gha.Dii
diivaar par au.ndhii chipkii dikhaa.ii detii hai
saamne kii diivaar se ye aqab kii diivaar par kaise aa ga.ii
aur us kii suu.iyaa.n aur Dial diivaar se chipak kaise ga.e
jaise us kaa vaqt diivaar ke us paar ke liye ho
mai.n baraabar ke kamre me.n jaataa huu.n
ab mujhe vaqt dikh rahaa hai
lekin gha.Dii Gaa.eb hai
ab na us kii Tik Tik hai na alarm
mai.n ne chaahaa ki chiizo.n ko chhuu kar dekhuu.n
Thiik us vaqt mujhe andaaza hu.aa
mai.n chiizo.n ko dekh saktaa huu.n
chhuu nahii.n saktaa
is kamre me.n to mai.n KHud ulTii hu.ii gha.Dii huu.n
ye kamra aur vo kamra
do alag alag ikaa.iyaa.n hai.n
unhe.n ek nahii.n kiyaa jaa saktaa
bas us kamre me.n tho.Dii der ke liye jhaa.nkaa jaa saktaa hai
mai.n vaapas apne kamre me.n aa jaataa huu.n
vahaa.n
jahaa.n mai.n har chiiz ko chhuu saktaa huu.n
aur har chiiz me.n
vaqt kii ye Tik Tik sun saktaa huu.n
chaahe saamne gha.Dii ho
yaa na ho

Saeeduddin
Nazm

KHamushi

KHizaa.n kii dastak
dhund me.n lipTe raste
sard havaa ke thape.Do.n se
nabard-aazmaa hai.n
alaav ke paas
shaal o.Dhe
kaaGaz ke Tuk.Do.n me.n
mataa-e-hayaat jalaatii hu.ii la.Dkii
daastaan-e-dil sunaate hu.e
aa.nsuu.o.n ke chand qatre gire
aag sisak uThii
sannaaTe kii dahshat
kisii tuufaa.n kaa pesh-KHema ho saktii hai
Tik Tik Tik
gha.Dii kii kuuk sunte
samaa.ate.n saath chho.Dne lagii.n
manzar dhu.ndlaa ga.e
vajuud ke sahraa me.n
ret u.Dne lagii
aur KHaamushii
us ke labo.n pe jaa kar so ga.ii

Omainuz Zahra Sayyad
Nazm

diwar

samundar KHaan ik pashtuu kaa shaa.ir
jaa rahaa thaa gaa.nv se duur ek viiraane me.n
yak dam ik jhapaakaa saa hu.aa
aur zehn ke parde pe ik dhu.ndlaa hayuulaa ban.ne aur miTne lagaa
par shuumii-e-qismat qalam hii jeb me.n thaa aur na kaaGaz kaa ko.ii purza
samundar KHaan ruk kar aur ik patthar pe Tik kar miich kar aa.nkho.n ko
duniyaa aur maa-fiihaa se begaana hu.aa

Zafar Sayyad
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now