Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "chaltaa"

Nazm MATCHES FOR "chaltaa"

Nazm

KHun phir KHun hai

tum ne jis KHuun ko maqtal me.n dabaanaa chaahaa
aaj vo kuucha o baazaar me.n aa niklaa hai
kahii.n sho.ala kahii.n na.ara kahii.n patthar ban kar
KHuun chaltaa hai to ruktaa nahii.n sangiino.n se
sar uThaataa hai to dabtaa nahii.n aa.iino.n se

Sahir Ludhianvi
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

marhum aur mahrum

mai.n bojh kaa.ndho.n pe aise uThaa ke chaltaa huu.n
tumhaaraa jaise janaaza uThaa ke chaltaa thaa
yahaa.n pe merii pareshaanii sirf merii hai
vahaa.n ko.ii na ko.ii kaa.ndhaa to badaltaa thaa

Zubair Ali Tabish
Nazm

man ka KHwab

mai.n so.ii jo ik shab to dekhaa ye KHvaab
ba.Dhaa aur jis se miraa iztiraab
ye dekhaa ki mai.n jaa rahii huu.n kahii.n
a.ndheraa hai aur raah miltii nahii.n
laraztaa thaa Dar se miraa baal baal
qadam kaa thaa dahshat se uThnaa muhaal
jo kuchh hausla paa ke aage ba.Dhii
to dekhaa qataar ek la.Dko.n kii thii
zamurrad sii poshaak pahne hu.e
diye sab ke haatho.n me.n jalte hu.e
vo chup-chaap the aage piichhe ravaa.n
KHudaa jaane jaanaa thaa un ko kahaa.n
isii soch me.n thii ki meraa pisar
mujhe is jamaa.at me.n aayaa nazar
vo piichhe thaa aur tez chaltaa na thaa
diyaa us ke haatho.n me.n jaltaa na thaa
kahaa mai.n ne pahchaan kar merii jaa.n
mujhe chho.D kar aa ga.e tum kahaa.n
judaa.ii me.n rahtii huu.n mai.n be-qaraar
pirotii huu.n har roz ashko.n ke haar
na parvaa hamaarii zaraa tum ne kii
ga.e chho.D achchhii vafaa tum ne kii
jo bachche ne dekhaa miraa pech-o-taab
diyaa us ne mu.nh pher kar yuu.n javaab
rulaatii hai tujh ko judaa.ii mirii
nahii.n is me.n kuchh bhii bhalaa.ii mirii
ye kah kar vo kuchh der tak chup rahaa
diyaa phir dikhaa kar ye kahne lagaa
samajhtii hai tuu ho gayaa kyaa ise?
tire aa.n.su.o.n ne bujhaayaa ise!

Allama Iqbal
Nazm

clerk ka naghma-e-mohabbat

duniyaa ke rang anokhe hai.n
jo mere saamne rahtaa hai us ke ghar me.n ghar-vaalii hai
aur daa.e.n pahluu me.n ik manzil kaa hai makaa.n vo KHaalii hai
aur baa.e.n jaanib ik ayyaash hai jis ke haa.n ik daashta hai
aur in sab me.n ik mai.n bhii huu.n lekin bas tuu hii nahii.n
hai.n aur to sab aaraam mujhe ik gesu.o.n kii KHushbuu hii nahii.n
faariG hotaa huu.n naashte se aur apne ghar se nikaltaa huu.n
daftar kii raah par chaltaa huu.n
raste me.n shahr kii raunaq hai ik taa.nga hai do kaare.n hai.n
bachche maktab ko jaate hai.n aur taa.ngo.n kii kyaa baat kahuu.n
kaare.n to chhichhaltii bijlii hai.n taa.ngo.n ke tiiro.n ko kaise sahuu.n
ye maanaa in me.n shariifo.n ke ghar kii dhan-daulat hai maayaa hai
kuchh shoKH bhii hai.n ma.asuum bhii hai.n
lekin raste par paidal mujh se bad-qismat maGmuum bhii hai.n
taa.ngo.n par barq-e-tabassum hai
baato.n kaa miiThaa tarannum hai
uksaataa hai dhyaan ye rah rah kar qudrat ke dil me.n tarahhum hai
har chiiz to hai maujuud yahaa.n ik tuu hii nahii.n ik tuu hii nahii.n
aur merii aa.nkho.n me.n rone kii himmat hii nahii.n aa.nsuu hii nahii.n

Meeraji
Nazm

lakDi ki kaThi

gho.Daa apnaa tag.Daa hai dekho kitnii charbii hai
chaltaa hai mehraulii me.n par gho.Daa apnaa arabii hai
haath chhu.Daa ke dau.Daa gho.Daa dum uThaa ke dau.Daa

Gulzar
Nazm

jugnu

ye shaaKH-saar ke jhuulo.n me.n pe.ng pa.Dte hu.e
ye laakho.n pattiyo.n kaa naachnaa ye raqs-e-nabaat
ye be-KHudii-e-musarrat ye vaalihaana raqs
ye taal-sam ye chhamaa-chham ki kaan bajte hai.n
havaa ke dosh pe kuchh uudii uudii shaklo.n kii
nashe me.n chuur sii parchhaa.iyaa.n thiraktii hu.ii
ufuq pe Duubte din kii jhapaktii hai.n aa.nkhe.n
KHamosh soz-e-daruu.n se sulag rahii hai ye shaam!
mire makaan ke aage hai ek chau.Daa sahn vasii.a
kabhii vo ha.nstaa nazar aataa hai kabhii vo udaas
isii ke biich me.n hai ek pe.D piipal kaa
sunaa hai mai.n ne buzurgo.n se ye ki umr us kii
jo kuchh na hogii to hogii qariib chhiyaanve saal
chhi.Dii thii hind me.n jab pahlii ja.ng-e-aazaadii
jise dabaane ke baa'd us ko Gadr kahne lage
ye ahl-e-hind bhii hote hai.n kis qadar ma.asuum
vo daar-o-giir vo aazaadii-e-vatan kii ja.ng
vatan se thii ki Ganiim-e-vatan se Gaddaarii
biphar ga.e the hamaare vatan ke piir o javaa.n
dayaar-e-hind me.n ran pa.D gayaa thaa chaar taraf
usii zamaane me.n kahte hai.n mere daadaa ne
jab arz-e-hind si.nchii KHuun se ''sapuuto.n'' ke
miyaan-e-sahn lagaayaa thaa laa ke ik paudaa
jo aab-o-aatish-o-KHaak-o-havaa se paltaa hu.aa
KHud apne qad se ba-josh-e-numuu nikaltaa hu.aa
fusuun-e-ruuh banaatii rago.n me.n chaltaa hu.aa
nigaah-e-shauq ke saa.ncho.n me.n roz Dhaltaa hu.aa
sunaa hai raaviyo.n se diidanii thii us kii uThaan
har ik ke dekhte hii dekhte cha.Dhaa parvaan
vahii hai aaj ye chhitnaar pe.D piipal kaa
vo Tahniyo.n ke kamanDal liye jaTaadhaarii
zamaana dekhe hu.e hai ye pe.D bachpan se
rahii hai is ke liye daaKHlii kashish mujh me.n
rahaa huu.n dekhtaa chup-chaap der tak us ko
mai.n kho gayaa huu.n ka.ii baar is nazaare me.n
vo us kii gahrii ja.De.n thii.n ki zindagii kii ja.De.n?
pas-e-sukuun-e-shajar ko.ii dil dha.Daktaa thaa
mai.n dekhtaa thaa use hastii-e-bashar kii tarah
kabhii udaas kabhii shaadmaa.n kabhii gambhiir
fazaa kaa surma.ii rang aur ho chalaa gahraa
ghulaa ghulaa saa falak hai dhu.aa.n dhu.aa.n sii hai shaam
hai jhuTpuTaa ki ko.ii azhdahaa hai maa.il-e-KHvaab
sukuut-e-shaam me.n darmaandagii kaa aalam hai
rukii rukii sii kisii soch me.n hai mauj-e-sabaa

Firaq Gorakhpuri
Nazm

bhuk

dopahar kii garmii me.n
be-iraada qadmo.n se
ik sa.Dak pe chaltaa huu.n
ta.ng sii sa.Dak par hai.n
dono.n samt dokaane.n
KHaalii KHaalii aa.nkho.n se
har dukaan kaa taKHta
sirf dekh saktaa huu.n
ab pa.Dhaa nahii.n jaataa
log aate jaate hai.n
paas se guzarte hai.n
phir bhii kitne dhu.ndle hai.n
sab hai.n jaise be-chehra
shor in dukaano.n kaa
raah chaltii ik gaalii
radio kii aavaaze.n
duur kii sadaa.e.n hai.n
aa rahii miilo.n se
jo bhii sun rahaa huu.n mai.n
jo bhii dekhtaa huu.n mai.n
KHvaab jaisaa lagtaa hai
hai bhii aur nahii.n bhii hai
dopahar kii garmii me.n
be-iraada qadmo.n se
ik sa.Dak pe chaltaa huu.n
saamne ke nukka.D par
nal dikhaa.ii detaa hai
saKHt kyuu.n hai ye paanii
kyuu.n gale me.n pha.nstaa hai
mere peT me.n jaise
ghuu.nsa ek lagtaa hai
aa rahaa hai chakkar saa
jism par pasiina hai
ab sakat nahii.n baaqii
aaj tiisraa din hai
aaj tiisraa din hai

Javed Akhtar
Nazm

uljhan

karo.Do.n chehre
aur un ke piichhe
karo.Do.n chehre
ye raaste hai.n ki bhi.D ke chhatte
zamiin jismo.n se Dhak ga.ii hai
qadam to kyaa til bhii dharne kii ab jagah nahii.n hai
ye dekhtaa huu.n to sochtaa huu.n
ki ab jahaa.n huu.n
vahii.n simaT ke kha.Daa rahuu.n mai.n
magar karuu.n kyaa
ki jaantaa huu.n
ki ruk gayaa to
jo bhii.D piichhe se aa rahii hai
vo mujh ko pairo.n tale kuchal degii piis degii
to ab jo chaltaa huu.n mai.n
to KHud mere apne pairo.n me.n aa rahaa hai
kisii kaa siina
kisii kaa baazuu
kisii kaa chehra
chaluu.n
to auro.n pe zulm Dhaa.uu.n
rukuu.n
to auro.n ke zulm jheluu.n
zamiir
tujh ko to naaz hai apnii munsifii par
zaraa sunuu.n to
ki aaj kyaa teraa faisla hai

Javed Akhtar
Nazm

janam din

saal me.n ik baar aataa hai
aate hii mujh se kahtaa hai
''kaise ho
achchhe to ho
laa.o is baat pe cake khilaa.o
raat ke khaane me.n kyaa hai
aur kaho kyaa chaltaa hai''
phir idhar udhar kii baate.n kartaa rahtaa hai
phir gha.Dii dekh ke kahtaa hai
''achchhaa to mai.n jaataa huu.n
pyaare ab mai.n
ek saal ke baa'd aa.uu.ngaa
cake banaa ke rakhnaa
saath me.n machhlii bhii khaa.u.ngaa''
aur chalaa jaataa hai!
us se mil kar
tho.Dii der mazaa aataa hai!
lekin phir mai.n sochtaa huu.n
KHaas mazaa to tab aa.egaa
jab vo aa kar
mujh ko Dhuu.nDhtaa rah jaa.egaa!!

Mohammad Alvi
Nazm

walid ke intiqal par

vo chaaliis raato.n se soyaa na thaa
vo KHvaabo.n ko uu.nTo.n pe laade hu.e
raat ke regzaaro.n me.n chaltaa rahaa
chaandnii kii chitaa.o.n me.n jaltaa rahaa
mez par
kaa.nch ke ik pyaale me.n rakkhe hu.e
daa.nt ha.nste rahe
kaalii ainak ke shiisho.n ke piichhe se phir
motiye kii kalii sar uThaane lagii
aa.nkh me.n tiirgii muskuraane lagii
ruuh kaa haath
chhalnii hu.aa suu.ii kii nok se
KHvaahisho.n ke diye
jism me.n bujh ga.e
sabz paanii kii sayyaal parchhaa.iyaa.n
lamha lamha band me.n utarne lagii.n
ghar kii chhat me.n ja.De
das sitaaro.n ke saayo.n tale
aks dhundlaa ga.e
aks murjhaa ga.e

Adil Mansuri
Nazm

ek gae aur bakri

zor chaltaa nahii.n Gariibo.n kaa
pesh aayaa likhaa nasiibo.n kaa

Allama Iqbal
Nazm

naya janm

abhii ik saal guzraa hai yahii mausam yahii din the
magar mai.n apne kamre me.n bahut afsurda baiThaa thaa
na ko.ii saa.nvle mahbuub kii yaado.n kaa afsaana
na aivaan-e-zamistaa.n kii taraf jaane kii kuchh KHvaahish
kisii ne haal puuchhaa to bahut hii be-niyaazii se
kahaa jii haa.n KHudaa kaa shukr hai mai.n KHairiyat se huu.n
ko.ii ye puuchhtaa kyuu.n aaj kal ko.ii Gazal likkhii
na jaane baat kyaa hai in dino.n kuchh aisaa lagtaa hai
tumhaarii har Gazal me.n miir kaa andaaz miltaa hai
har ik misre se jaise dhiimii dhiimii aa.nch uThtii hai
tumhaare sher pa.Dh kar jaane kyuu.n mahsuus hotaa hai
ki ko.ii saaz par maddham suro.n me.n gungunaataa hai
magar ik baat puuchhuu.n tum KHafaa to ho na jaa.oge
ye aaKHir kyaa sabab hai aaj kal nazme.n nahii.n likhte
tumhaarii aap-biitii bhii abhii tak naa-mukammal hai
ise to naaqidaan-e-fan ne sunte hii saraahaa hai
mai.n sab suntaa magar ye dil hii dil me.n sochtaa rahtaa
mire ahbaab kyaa jaane.n ki mujh par kyaa guzartii hai
mire afkaar pe ye kaisii viiraanii sii chhaa.ii hai
bahut kuchh sochtaa huu.n phir bhii ab sochaa nahii.n jaataa
bahut kuchh chaahtaa huu.n phir bhii ko.ii bas nahii.n chaltaa
magar is bebasii me.n bhii mire dil kii ye haalat thii
kabhii jab ko.ii achchhii chiiz pa.Dhne ke liye miltii
to pahro.n ruuh par ik vajd kii sii kaifiyat hotii
rago.n me.n merii jaise KHuu.n kii gardish tez ho jaatii
lahuu kaa ek ik qatra ye kahtaa mai.n to zinda huu.n
mirii paamaaliyo.n me.n pal rahii hai ik tavaanaa.ii
yahii aalam rahaa to jaane mai.n kis roz uTh baiThuu.n
basant aayaa to yuu.n aayaa ki mai.n bhii jaise uTh baiThaa
saveraa hote hii har samt se jho.nke havaa.o.n ke
na.ii KHushbuu liye mujh ko jagaane ke liye aa.e
jidhar bhii aa.nkh uThaataa huu.n shafaq kii muskuraahaT hai
vahii suuraj hai lekin aur hii kuchh jagmagaahaT hai
na jaane kaise kaise phuul ab mujh ko bulaate hai.n
na jaane kitne kitne rang se dil ko lubhaate hai.n
fazaa me.n duur tak phaile hu.e vo khet sarso.n ke
ye kahte hai.n ki ab armaa.n nikaalo apne barso.n ke
tumhaare saamne phailaa hu.aa maidaan saaraa hai
ko.ii aavaaz detaa hai ki aa.o tum hamaare ho
mirii dhartii ke beTe merii duniyaa ke dulaare ho
tumhaarii aa.nkh me.n jo KHvaab so.e hai.n vo mere hai.n
tumhaare ashk ne jo biij bo.e hai.n vo mere hai.n
isii vaadii me.n phir se lauT kar ab tum ko aanaa hai
tumhaarii hii ye bastii hai tumhii.n ko phir basaanaa hai
ab is bastii me.n rakhte hii qadam kuchh aisaa lagtaa hai
ki is kaa zarra zarra patta patta kuchh nayaa saa hai
har ik raste pe jaise kuchh na.e chehre se milte hai.n
yahii jii chaahtaa hai jo mile ab us se ye puuchhe.n
tumhaaraa naam kyaa hai? tum kahaa.n ke rahne vaale ho
kuchh aisaa jaan pa.Dtaa hai ki pahle bhii mile hai.n ham
rahe hai.n saath yaa ik duusre ko jaante hai.n ham
agar tum saath the to tum bhii shaayad dost the mere
mujhe yaad aayaa dono.n saath hii college me.n pa.Dhte the
vo saare dosto.n kaa jam.a honaa mere kamre me.n
vo gap shap qahqahe vo apne apne ishq ke qisse
vo miiras road kii baate.n vo charche KHuub-ruuyo.n ke
kabhii aavaaragardii apnii un viiraan sa.Dko.n kii
kabhii baato.n me.n raate.n kaaTnaa sunsaan jaa.Do.n kii
kabhii vo chaandnii me.n apnaa yuu.n hii ghuumte rahnaa
kabhii vo chaa.e kii mezo.n pe ghanTo.n baiThnaa sab kaa
vo baate.n ilm-o-hikmat kii kabhii shikve-shikaayat kii
tumhe.n to yaad hogaa un me.n hii ik dost shaa.ir thaa
zaraa dekho to mujh ko Gaur se shaayad vo mai.n hii thaa
bahut din me.n mile hai.n ham to aa.o aaj jii bhar kar
ha.nse.n bole.n kahii.n aavaaragardii ke liye nikle.n
chale.n aur chal ke saare dosto.n ko phir bulaa laa.e.n
sajaa.e.n aaj phir mahfil kahii.n piine pilaane kii
mai.n tum ko aaj apnii kuchh na.ii baate.n bataa.uu.ngaa
mai.n tum ko aaj apnii kuchh na.ii nazme.n sunaa.uu.ngaa

Khalilur Rahman Azmi
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

rishwat

log ham se roz kahte hai.n ye aadat chho.Diye
ye tijaarat hai KHilaaf-e-aadmiyat chho.Diye
is se bad-tar lat nahii.n hai ko.ii ye lat chho.Diye
roz aKHbaaro.n me.n chhaptaa hai ki rishvat chho.Diye

Josh Malihabadi
Nazm

ek mohre ka safar

jab vo kam-umr hii thaa
us ne ye jaan liyaa thaa ki agar jiinaa hai
ba.Dii chaalaakii se jiinaa hogaa
aa.nkh kii aaKHirii had tak hai bisaat-e-hastii
aur vo maamuulii saa ik mohra hai
ek ik KHaana bahut soch ke chalnaa hogaa
baazii aasaan nahii.n thii us kii
duur tak chaaro.n taraf phaile the
mohre
jallaad
nihaayat hii saffaak
saKHt be-rahm
bahut hii chaalaak
apne qabze me.n liye
puurii bisaat
us ke hisse me.n faqat maat liye
vo jidhar jaataa
use miltaa thaa
har nayaa KHaana na.ii ghaat liye
vo magar bachtaa rahaa
chaltaa rahaa
ek ghar
duusraa ghar
tiisraa ghar
paas aayaa kabhii auro.n ke
kabhii duur hu.aa
vo magar bachtaa rahaa
chaltaa rahaa
go ki maamuulii saa mohara thaa magar jiit gayaa
yuu.n vo ik roz ba.Daa mohara banaa
ab vo mahfuuz hai ik KHaane me.n
itnaa mahfuuz hai ik KHaane me.n
itnaa mahfuuz ki dushman to alag
dost bhii paas nahii.n aa sakte
us ke ik haath me.n hai jiit us kii
duusre haath me.n tanhaa.ii hai

Javed Akhtar
Nazm

taaqub

kaun dau.Daaye hu.e hai kis ko
kaun ab kis kaa shikaarii hai pata hii nahii.n chaltaa

Gulzar
Nazm

aaghaz ki tariKH

ik musaafir huu.n
ba.Dii duur se chaltaa hu.aa aayaa huu.n yahaa.n
raah me.n mujh se judaa ho ga.ii suurat merii
apne chehre kaa bas ik dhundlaa tasavvur hai mirii aa.nkho.n me.n
raaste me.n mire qadmo.n ke nishaa.n bhii ho.nge
ho jo mumkin to unhii.n se
mire aaGaaz kii taariiKH suno

Farhat Ehsas
Nazm

jatri

ek aayaa gayaa duusraa aa.egaa der se dekhtaa huu.n yuu.nhii raat us kii guzar jaa.egii
mai.n kha.Daa huu.n yahaa.n kis liye mujh ko kyaa kaam hai yaad aataa nahii.n yaad bhii TimTimaataa
hu.aa ik diyaa ban ga.ii jis kii ruktii hu.ii aur jhijaktii hu.ii har kiran be-sadaa qahqaha hai
magar mere kaano.n ne kaise use sun liyaa ek aa.ndhii chalii chal ke miT
bhii ga.ii aaj tak mere kaano.n me.n maujuud hai saa.e.n saa.e.n machaltii hu.ii aur
ubaltii hu.ii phailtii phailtii der se mai.n kha.Daa huu.n yahaa.n ek aayaa gayaa
duusraa aa.egaa raat us kii guzar jaa.egii ek ha.ngaama barpaa hai dekhe.n jidhar
aa rahe hai.n ka.ii log chalte hu.e aur Tahalte hu.e aur rukte hu.e phir se
ba.Dhte hu.e aur lapakte hu.e aa rahe jaa rahe hai.n idhar se udhar aur udhar se
idhar jaise dil me.n mire dhyaan kii lahar se ek tuufaan hai vaise aa.nkhe.n
mirii dekhtii hii chalii jaa rahii hai.n ki ik TimTimaate diye kii kiran zindagii ko phisalte
hu.e aur girte hu.e Dhab se zaahir kiye jaa rahii hai mujhe dhyaan
aataa hai ab tiirgii ik ujaalaa banii hai magar is ujaale se ristii chalii jaa rahii
hai.n vo amrit kii buu.nde.n jinhe.n mai.n hathelii pe apnii sambhaale rahaa huu.n hathelii
magar TimTimaataa hu.aa ik diyaa ban ga.ii thii lapak se ujaalaa hu.aa lau girii phir a.ndheraa saa
chhaane lagaa baiThtaa baiThtaa baiTh kar ek hii pal me.n uThtaa hu.aa jaise aa.ndhii ke
tiikhe thape.Do.n se darvaaze ke taaq khulte rahe.n band hote rahe.n
pha.D.pha.Daate hu.e taa.ir-e-zaKHm-KHurda kii maanind mai.n dekhtaa hii rahaa ek aayaa
gayaa duusraa aa.egaa soch aa.ii mujhe paa.nv ba.Dhne se inkaar karte
ga.e mai.n kha.Daa hii rahaa dil me.n ik buu.nd ne ye kahaa raat yuu.nhii guzar jaa.egii
dil kii ik buu.nd ko aa.nkh me.n le ke mai.n dekhtaa hii rahaa pha.D.pha.Daate hu.e taa.ir
zaKHm-KHurda kii maanind darvaaze ke taaq ik baar jab mil ga.e mujh ko aahista aahista
ehsaas hone lagaa ab ye zaKHmii parinda na ta.Dpegaa lekin mire dil ko har vaqt
ta.Dpaa.egaa mai.n hathelii pe apnii sambhaale rahuu.ngaa vo amrit kii buu.nde.n jinhe.n aa.nkh
se merii risnaa thaa lekin mirii zindagii TimTimaataa hu.aa ik diyaa ban ga.ii jis kii ruktii hu.ii
aur jhijaktii hu.ii har kiran be-sadaa qahqaha hai ki is tiirgii me.n ko.ii baat aisii nahii.n
jis ko pahle a.ndhere me.n dekhaa ho mai.n ne safar ye ujaale a.ndhere kaa chaltaa
rahaa hai to chaltaa rahegaa yahii rasm hai raah kii ek aayaa gayaa duusraa
aa.egaa raat aise guzar jaa.egii TimTimaate sitaare bataate the raste kii
naddii bahii jaa rahii hai bahe jaa is uljhan se aise nikal jaa ko.ii siidhaa manzil pe jaataa
thaa lekin ka.ii qaafile bhuul jaate the anjum ke daur-e-yagaanaa ke mub.ham ishaare magar vo
bhii chalte hu.e aur ba.Dhte hu.e shaam se pahle hii dekh lete the maqsuud kaa band
darvaaza khulne lagaa hai magar mai.n kha.Daa huu.n yahaa.n mujh ko kyaa kaam hai meraa darvaaza
khultaa nahii.n hai mujhe phaile sahraa kii so.ii hu.ii reg kaa zarra zarra yahii kah rahaa hai
ke aise KHaraabe me.n suukhii hathelii hai ik aisaa talvaa ke jis ko kisii KHaar kii nok chubhne pe bhii
kah nahii.n saktii mujh ko ko.ii buu.nd apne lahuu kii pilaa do magar mai.n kha.Daa huu.n yahaa.n kis liye
kaam ko.ii nahii.n hai to mai.n bhii in aate hu.e aur jaate hu.e ek do tiin
laakho.n baguulo.n me.n mil kar yuu.nhii chalte chalte kahii.n Duub jaataa ke jaise yahaa.n
bahtii lahro.n me.n kashtii har ek mauj ko thaam letii hai apnii hathelii ke phaile ka.nval
me.n mujhe dhyaan aataa nahii.n hai ki is raah me.n to har ik jaane vaale ke bas
me.n hai manzil mai.n chal duu.n chaluu.n aa.iye aa.iye aap kyuu.n is jagah
aise chup-chaap tanhaa kha.De hai.n agar aap kahiye to ham ik achhuutii sii Tahnii se
do phuul bas bas mujhe is kii ko.ii zaruurat nahii.n hai mai.n ik
dost kaa raasta dekhtaa huu.n magar vo chalaa bhii gayaa hai mujhe phir bhii
taskiin aatii nahii.n hai ki mai.n ek sahraa kaa baashinda maaluum hone lagaa huu.n KHud
apnii nazar me.n mujhe ab ko.ii band darvaaza khultaa nazar aa.e ye baat mumkin nahii.n hai
mai.n ik aur aa.ndhii kaa mushtaaq huu.n jo mujhe apne parde me.n yaksar chhupaa le
mujhe ab ye mahsuus hone lagaa hai suhaanaa samaa.n jitnaa bas me.n thaa mere
vo sab ek bahtaa saa jho.nkaa banaa hai jise haath mere nahii.n rok sakte
ki merii hathelii me.n amrit kii buu.nde.n to baaqii nahii.n hai.n faqat ek phailaa hu.aa
KHushk be-barg be-ra.ng sahraa hai jis me.n ye mumkin nahii.n mai.n kahuu.n
ek aayaa gayaa duusraa aa.egaa raat merii guzar jaa.egii

Meeraji
Nazm

ibn-e-maryam

tum KHudaa ho
KHudaa ke beTe ho
yaa faqat amn ke payambar ho
yaa kisii kaa hasii.n taKHayyul ho
jo bhii ho mujh ko achchhe lagte ho
mujh ko sachche lagte ho
us sitaare me.n jis me.n sadiyo.n ke
jhuuT aur kizb kaa a.ndheraa hai
us sitaare me.n jis ko har ruKH se
re.ngtii sarhado.n ne gheraa hai
us sitaare me.n jis kii aabaadii
amn botii hai ja.ng kaaTtii hai
raat piitii hai nuur mukh.Do.n kaa
sub.h siino.n kaa KHuun chaaTtii hai
tum na hote to jaane kyaa hotaa
tum na hote to us sitaare me.n
devtaa raakshash Gulaam imaam
paarsaa ri.nd raahbar rahzan
barhaman shaiKH paadrii, bhikshuu
sabhii hote magar hamaare liye
kaun cha.Dhtaa KHushii se suulii par

Kaifi Azmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now