Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "husuul"

Nazm MATCHES FOR "husuul"

Nazm

husul-e-azadi ki diqqaten

hind kaa aazaad ho jaanaa ko.ii aasaa.n nahii.n
dekhnaa tum ko abhii kyaa kyaa dikhaayaa jaa.egaa
dekhnaa tum se abhii kitne kiye jaa.e.nge makr
kis tarah tum ko abhii chakkar me.n laayaa jaa.egaa
tum me.n Daalaa jaa.egaa ik saKHt o naazuk tafraqa
tum ko shah de de ke aapas me.n la.Daayaa jaa.egaa
peshvaayaan-e-mazaahib ko mile.ngii rishvate.n
Dho.ng tabliiG aur shuddhii kaa rachaayaa jaa.egaa
dharm rakshaa ke liye tum se liye jaa.e.nge ahd
tum ko maz.hab apnaa KHatre me.n dikhaayaa jaa.egaa
leadero.n se ho.nge va.ade KHil.at-o-in.aam ke
qillat o kasrat kaa ha.ngaama uThaayaa jaa.egaa
tum ko parvaana ataa hogaa KHitaab o jaah kaa
tum ko ohde de ke laalach me.n pha.nsaayaa jaa.egaa
gar ye tadbiire.n muqaddar se na raas aa.e.n to phir
duusrii suurat se tum ko Dagmagaayaa jaa.egaa
intihaa.ii barbariyat se liyaa jaa.egaa kaam
band kar ke tum ko jailo.n me.n sa.Daayaa jaa.egaa
daana-paanii kar diyaa jaa.egaa bilkul tum pe band
tum ko bhuuko.n maar ke qabze me.n laayaa jaa.egaa
garm lohe se tumhaare jism daaGe jaa.e.nge
tum ko ko.De maar kar ulluu banaayaa jaa.egaa
jaa.edaade.n sab tumhaarii zabt kar lii jaa.e.ngii
baal-bachcho.n par tumhaare zulm Dhaayaa jaa.egaa
baavajuud us ke bhii tum qaa.em rahe zid par agar
be-ta.ammul tum ko phaa.nsii par cha.Dhaayaa jaa.egaa
is tarah bhii tum agar laa.e na abruu par shikan
sar tumhaare paa.nv par aaKHir jhukaayaa jaa.egaa

Ahmaq Phaphoondvi
Nazm

yas

barbat-e-dil ke taar TuuT ga.e
hai.n zamii.n-bos raahato.n ke mahal
miT ga.e qissa-haa-e-fikr-o-amal!
bazm-e-hastii ke jaam phuuT ga.e
chhin gayaa kaif-e-kausar-o-tasniim
zahmat-e-girya-o-bukaa be-suud
shikva-e-baKHt-e-naa-rasaa be-suud
ho chukaa KHatm rahmato.n kaa nuzuul
band hai muddato.n se baab-e-qubuul
be-niyaaz-e-du.aa hai rabb-e-kariim
bujh ga.ii sham-e-aarzuu-e-jamiil
yaad baaqii hai be-kasii kii daliil
intazaa-e-fuzuul rahne de
raaz-e-ulfat nibaahane vaale
baar-e-Gam se karaahne vaale
kaavish-e-be-husuul rahne de

Faiz Ahmad Faiz
Nazm

tawaif

tuu husuul-e-zar kii KHaatir kis qadar bechain hai
kasab-e-daulat zindagii kaa terii nasabulain hai

Mahirul Qadri
Nazm

dal badli

chalte chalte daf.atan paTrii badalne kaa chalan
thaa siyaasat ke qalaabaazo.n kaa yak mash.huur fan
faa.eda hotaa thaa vaqtii taur par is khel me.n
go sakaa hazraat kahte the use baazaar-pan
ahl-e-sheristaan ne bhii ab use apnaa liyaa
kaar-aamad dekh kar ye nusKHa-e-aahan-shikan
ho rahaa hai is qadar maqbuul ye nusKHa ki ab
dil badalte rahte hai.n din raat arbaab-e-suKHan
nit nayaa bahruup laazim hai pa.e iz.haar-e-zaat
jab nazar ke saamne ho fan baraa.e makr-o-fan
vo zamaana jab ki bazm-e-sher thii ik razm-gaah
chho.D dii thii har na.e shaa.ir ne raftaar-e-kuhan
gholte rahte the vo hazraat jaam-e-sher me.n
naGma-e-bulbul ke badle shorish-e-daar-o-rasan
hoTalo.n me.n baiTh kar hotaa thaa zikr-e-inqalaab
apne sar se baa.ndhe phirte the taKHayyul me.n kafan
in me.n kuchh leader sifat the aur kuchh volunteer
jhunD me.n surKHaab ke ho.n jis tarah zaaG-o-zaGan
na.ara baazii me.n agar hote the leader paav ser
in ke har volunteer kaa vazn hotaa De.Dh man
rafta rafta shor-e-GauGaa.ii suKHan kaa jab thamaa
lag gayaa jab maah-e-naKHshab me.n havaadis kaa gahan
aa ga.e kuchh aur kartab-baaz bazm-e-sher me.n
ik zaraa saa jaante the jo nazar-bandii kaa fan
suu.ngh kar mausam kii buu aur ruKH havaa kaa dekh kar
kechulii badlii har ik volunteer ne daf.atan
subah dam dekhaa to teddy suiT me.n malbuus hai.n
phe.nk kar chupke se apnaa inqilaabii pairahan
sar ke baalo.n kii safedii ho ga.ii Garq-e-KHizaab
tah-ba-tah Gaaza lagaa kar duur kii ruKH kii shikan
shaa.irii kii umr thii go biis yaa pachchiis saal
lekin apne fan me.n vo bil-qasd laa.e baal-pan
kar diyaa bahr-e-sadaarat pesh apne aap ko
jab banaa.ii chand nau-mashqo.n ne ko.ii anjuman
is liye ghuspaiTh karte ye sab volunteer
ban ga.e ab KHaam zehno.n ke imaam-e-fikr-o-fan
in kaa maqsad hai agar kuchh to husuul-e-manfa.at
inqilaabii shaa.irii ho yaa mu.ammatii suKHan

Raza Naqvi Vahi
Nazm

achchhe bachche

ustaado.n kii vaaldain kii
karte itaa.at achchhe bachche
KHuub husuul-e-ilm kii KHaatir
karte mehnat achchhe bachche

Mehdi Pratapgarhi
Nazm

ai nigar-e-gul

nigaar-e-gul tujhe vo din bhii yaad ho.n shaayad
ki jin ke zikr se ab dil pe taaziyaana lage
tirii talab me.n vo daar-o-rasan ke hangaame
ki jin kii baat kare.n bhii to ab fasaana lage
ba-qadr-e-zauq jalaate rahe lahuu ke charaaG
ki tuu jab aa.e to ye ghar nigaar-KHaana lage
isii KHayaal se har zaKHm apne dil pe sahaa
ki tujh ko gardish-e-ayyaam kii havaa na lage
magar jo guzrii hai ham par tire husuul ke baa'd
vo haal-e-Gam bhii kahe.n gar tujhe buraa na lage

Ahmad Faraz
Nazm

wasl-e-shirin ke liye

duur takziib kaa farhaad huu.n merii KHaatir
haq kii aavaaz sadaaqat kii aur shiirii.n hai
meraa mansab hai husuul-e-shiirii.n
vasl-e-shiirii.n ke liye tesha uThaataa huu.n mai.n
tesha-e-azm-o-yaqii.n jo abhii kund nahii.n
siina-e-sa.ng abhii KHushk nahii.n
har rag sang me.n ik juu.e ravaa.n pinhaa.n hai
mai.n ki farhaad huu.n rag rag me.n mirii
sho.ala-e-qatra-e-KHuu.n jaulaa.n hai
merii gardan pe hai sarbaar amaanat kii tarah
mere hii teshe se kaT saktaa hai lekin ye kabhii
jhuk to saktaa hii nahii.n
juT ga.e haath uThe aur bane ek kamaa.n
TuuT saktii nahii.n haatho.n kii kamaa.n
chhuuT saktaa nahii.n tesha meraa
is kii har zarb-e-javaa.n se jab tak
reza reza nahii.n ho
zulm-o-takziib kaa ye koh-e-giraa.n

Zaheer Siddiqui
Nazm

karwan-e-hayat

na.ii umango.n kii raushnii me.n
Guruur-e-azm-e-javaan ko le kar
husuul-e-manzil kii aarzuu me.n
charaaG-e-ulfat kii lau ba.Dhaa.e
hisaar-e-sahraa ubuur karke
jo kaarvaan-e-hayaat pahu.nchaa
fazaa me.n jhamkaa vo nuur ban kar
ufuq pe ubhraa hilaal ban kar
hasiin raato.n kii chaa.ndnii me.n
chamak uThaa hai damak uThaa hai

Jameel Azimabadi
Nazm

hasil-e-mutala

vo jinhe.n mujh se mohabbat bhii hai hamdardii bhii hai
mere ilmii shauq ko kahte hai.n be-kaar-o-fuzuul
puuchhte hai.n vo mujhe kyo.n in kitaabo.n se hai ishq
ho na maalii manfa.at kaa jin ke pa.Dhne se husuul
jaantaa huu.n mai.n bhii maalii faa.eda in se nahii.n
phir bhii kartaa huu.n dil-o-jaa.n se kitaabo.n ko pasand
sarfaraazii de nahii.n saktii vo daulat se magar
mujh ko kar detii hai.n KHud apnii nigaaho.n me.n buland

Akhtar Bastavi
Nazm

qabristan mein KHud-kalami

mire paas
maut ke bahut se options hai.n
mai.n kisii bhii vaqt kahii.n bhii maaraa jaa saktaa huu.n
mobile chhiin.ne vaalaa naujavaan
mujhe TaKHne par golii maar saktaa hai
police ke naake par na rukne kii paadaash me.n
mujhe thaane ke andar maaraa jaa saktaa hai
raat ke pichhle pahar
ghar me.n ghusne vaalaa Daaku kaalii jeb hone ke jurm me.n
mujhe banduuq ke hiT-mark se halaak kar saktaa hai
jii pii fund ke husuul kii KHaatir
mai.n
a-g office kii sii.Dhiyaa.n cha.Dhte cha.Dhte
dil ke daure se bhii mar saktaa huu.n
aur
kisii gunjaan market yaa masjid me.n hone vaale dhamaake me.n baa-aasaanii
shahaadat paa saktaa huu.n
ab to
Gurbat kii lakiir se laTak kar
mere bhuuk se marne ke imkaanaat bhii paidaa hone lage hai.n
agarche ja.ng me.n kaam aane kaa zamaana guzar chukaa hai
magar ba.az muqaddas dushman
merii maut ke evaz jannat ke talabgaar hai.n
merii samaajii maut se ab kisii ko ko.ii faa.eda nahii.n
hattaa ki mujhe bhii nahii.n
magar plot mafiyaa ke alaava zaKHiira-andoz aur saTTe-baaz
merii maut ke muntazir hai.n
aur
unho.n ne mujhe be-tauqiir kar ke
sa.Dak par merii KHud-sozii kaa raasta kushaada kar diyaa hai
jamhuuriyat aur insaanii huquuq kii baazyaaft ke liye marnaa meraa KHvaab thaa
magar
bachcho.n kii feese.n adaa karne ke liye aur Time lagaane ke baa.is
mere paas aisii ayyaashii ke liye vaqt nahii.n
so
mai.n ba-qaa.emii hosh-o-havaas aise farsuuda nazriyaat ko mustarad kartaa huu.n
raat der ga.e
ghar lauTte hu.e
raah-giirii maut maare jaanaa merii hargiz tarjiih nahii.n
magar us me.n harj bhii kyaa hai
ki us ke evaz sarkaarii KHazaane se paa.nch laakh ruupa.e milte hai.n
mai.n
zinda rahne ke imkaanaat se taqriiban mahruum kiyaa jaa chukaa huu.n
magar na-jaane kyuu.n
mai.n zinda rahnaa chaahtaa huu.n

Zahid Masood
Nazm

mohabbat

mohabbat jis me.n laGzish bhii husuul-e-kaamraanii hai
mohabbat jis kii har kaavish suruur-e-jaavedaanii hai
mohabbat jis me.n Gam bhii intihaa-e-shaadmaanii hai
mohabbat jis kii tafsiir-o-vazaahat be-zabaanii hai

Rishi Patialvi
Nazm

aarzu

ye razaa-e-rabb-e-jaliil thii
ki nabii ne sair kii arsh kii
ko.ii soyaa saaya-e-teG me.n
to razaa-e-rabb-e-jalii milii
kabhii tuur pe hu.ii intihaa
ki KHudaa bhii jalva-numaa hu.aa
kabhii rahmato.n kaa nuzuul thaa
kabhii ishq kaa ye husuul thaa
ki nihaayat us kii husain thaa
kahii.n aarzuu-e-vatan hu.ii
kahii.n KHaamushii bhii suKHan hu.ii
kahii.n chaahato.n kaa KHiraaj thaa

Farrukh Zohra Gilani
Nazm

sukh ka husul

sukh kaa husuul
aur dukh se najaat
sirf do hii to mas.ale nahii.n hai.n zindagii ke
sukh aur dukh ke biich bhii to mas.ale hai.n

Javed Nadeem
Nazm

peshawar ki sair

ye KHush-libaas la.Dkiyaa.n
hasii.n hasii.n javaa.n javaa.n
husuul-e-‘ilm ke liye
qadam qadam ravaa.n-davaa.n
KHushii se dil mahak uThe
nazar pa.Dii jahaa.n-jahaa.n
khulii hu.ii kitaab me.n
sharaafato.n kii daastaa.n
haqiiqate.n simaT ga.ii.n
Thahar ke dam liyaa jahaa.n
sharaab kii misaal hai.n
shabaab kii ye surKHiyaa.n
ye inqalaab kii adaa
mai.n dekhtaa chalaa gayaa

Abul Fitrat Meer Zaidi
Nazm

harakat-e-makus

global village kii aazaad-market me.n
husuul-e-insaaf anqaa ho chukaa hai
aazaadii-e-raa.e ke naam par pechiida afkaar pak rahe hai.n
kahii.n pe science fat.h ke na.are lagaa rahii hai
kahii.n pe insaaniyat apnaa chehra chhupaa rahii hai
ajiib ja.ngii junuu.n kaa duniyaa ko saamnaa hai
fan-e-tash.hiir ne masnuu.aat-e-naaqis ko bhii
kaamiliyyat kaa darja ataa kiyaa hai
ye daur-e-irtiqaa to harakat-e-ma.akuus ban chukaa hai

Tasneem Abidi
Nazm

hain KHwab mein hunuz

har ik naf.a jaa.ez nuqsaan ke batn se hai
unho.n ne jo haasil kiyaa vo ziyaada thaa
aur aaKHir shab ke kuchh KHvaab ko jo ga.nvaayaa
vo kam thaa
isii naa-tanaasub husuul-o-KHasaara kaa radd-e-amal hai
ki manzil kii aaGosh me.n bhii
unhe.n sukh nahii.n hai

Zaheer Siddiqui
Nazm

hikayat-e-shab

chunaa.nche sar-e-shaam ham sab kisii KHaandaan-e-fara.ngii se bahr-e-mulaaqaat nikle
yahaa.n meraa ''ham sab'' se matlab hai vo duusre ham-vatan aur pa.Dosii ki jo mulk-e-afra.ng kii is ba.Dii
jaamia me.n husuul-e-zar-e-ilm-o-daanish ko aa.e hu.e the
''kisii'' se ye matlab hai ham ko KHabar tak nahii.n thii ki ham sab kahaa.n jaa rahe hai.n
kahaa.n kis ko kis shaKHs kii mezbaanii milegii
bahar-haal ye taa.ifa ajnabii mehmaano.n kaa ik darmiyaane se ghar mezbaano.n hii kii rahnumaa.ii me.n pahu.nchaa
vahaa.n ham se pahle bhii kuchh log maujuud the
rivaayaat-e-begaanagii fara.ngii me.n basta
tanaabo.n me.n barfiile ThiThure hu.e yaKH-zada mausamo.n me.n muqayyad
magar jin ke chehro.n pe un kii ma.iishat ke rasmii shaguufe khile the
ta.aaruf kii ik muKHtasar tez ThanDii sii gardaan
so aaKHirii naam ke aaKHirii harf kii Duubtii chand lahre.n
so aaKHirii haath ke khurdure chand reze
mire haafize me.n to kuchh bhii nahii.n rah gayaa thaa
chunaa.nche ta.aaruf ke sa.ngiin farsho.n ko ik baar phir se kuredaa to dekhaa
sat.h saKHt thii aur naaKHun ba.De narm the
is asnaa me.n ik KHaanam mezbaan dono.n haatho.n me.n sainii uThaa.e
nabiid-e-musaffaa o gul-ra.ng ke kuchh bilorii.n piyaale sajaa.e
ba-sad-naaz-o-andaaz aa.ii.n
abhii is nabiid-e-musaffaa ke do chaar chakkar hu.e the
ki bosiida rasmo.n kii uu.nchii fasle.n
ta.assub ke taariik zindaa.n
takalluf kii chiknii mu.nDere.n
tasanno kii pur-KHaar baa.Dhe.n
saraasar ye sab gir ga.ii.n aur ajnabii ham-vatan ban ga.e

Partav Rohila
Nazm

KHala

maah aur saal kitne biit ga.e
be-sabab be-husuul be-manshaa
haa.e lekin ye ek ik lamha
kuchh bhii kiije guzar nahii.n paataa
chubh rahaa hai jigar me.n ik kaa.nTaa
kaash meraa bhii ko.ii ho jaataa
kaash meraa bhii ko.ii ho jaataa
kaash meraa bhii ko.ii ho jaataa

Daud Ghazi
Nazm

justuju

haqiiqat kaa taqaazaa hai ho dil ko justujuu pahle
husuul-e-mudda.aa ko chaahiye kuchh aarzuu pahle
nigaahe.n KHud hii aa.e.ngii chaman me.n bahr-e-nazzaara
tire gulshan ke phuulo.n me.n magar ho ra.ng-o-buu pahle
agar shiishe me.n sahbaa hai to mai-kash mil hii jaa.e.nge
muhayyaa mai-kade me.n chaahiye jaam-o-subuu pahle
samaa jaa.egaa surma ban ke KHilqat kii nigaaho.n me.n
tuu apnii zaat me.n paidaa kare gar aabruu pahle
hare ho jaa.e.nge ik din tirii ummiid ke buuTe
chaman me.n aa.nsuu.o.n kii tuu bahaa de aabjuu pahle
garebaa.n chaak ho majnuu.n-sifat gar shauq-e-lailaa hai
phiraa kar dasht-e-vahshat me.n misaal-e-qais tuu pahle
KHudii ko gar miTaa.egaa KHudaa bhii mil hii jaa.egaa
uThaayaa chaahiye dil se hijaab-e-maa-o-tuu pahle
zaruurii hai ki khul jaa.e.n qubuuliyyat ke darvaaze
du.aa.o.n ko 'purii' dil se nikalne kii ho KHuu pahle

Narayan Das Puri
Nazm

shikayat

shafaq kii dulhan apne Gurfe se kab tak mujhe dekh kar muskuraatii rahegii
sunahrii libaade kii zar-kaar kirne.n kahaa.n tak yuu.nhii gungunaatii rahe.ngii
kahaa.n tak zamurrad ke parde pe ye surKH phuulo.n ke naGme machalte rahe.nge
ki aaKHir ko.ii chaa.nd ko.ii a.ndheraa kisii sharq-e-tiira ke dar se nikal kar
abhii us ko pahnaa.egaa tiirgii kaa vo jaama ki us kii javaa.n ret uma.nge.n
sitaare u.Daatii hu.ii Duub jaa.e.ngii maGrib kii KHaamosh KHuunii.n KHalaa me.n
shafaq kii dulhan jhaa.nk kar dekhtii hai
mujhe dekhtii hai
mire dil ke bujhte hu.e surKH sho.alo.n kii parvaaz-e-be-kaar ko dekhtii hai
ki ye zindagii jo vadii.at hu.ii thii ki har samt sailaab naGma bahaa de
husuul-e-musarrat kii KHaatir har ik sa.ng-e-KHaaraa ko ik marmarii.n but banaa de
vo but jo har ik taan par muskuraa de har ik samt sailaab-e-naGma bahaa de
har ik naGma taariik raato.n ke siino.n ko yuu.n gudgudaa de
ki taariikiyo.n se vo anvaar phuuTii.n jinhe.n aaftaab-e-sahar KHud sadaa de
magar ab yahii zindagii bujh rahii hai zamaane ke betaab aab-e-ravaa.n me.n
shafaq kii dulhan jhaa.nk kar dekhtii hai kise dekhtii hai mujhe dekhtii hai
mujhe dekhtii hai to mai.n apne Gurfe kii baa.nho.n ko milne kii taakiid kar duu.n
ki mai.n to usii haal me.n raat-din vaqt ke nuur-o-zulmat me.n ghultaa rahaa huu.n
mire paas ko.ii sunahrii-labaada nahii.n hai na ko.ii zamurrad ke parde
mujhe be-sabab dekhne me.n hai kyaa ab ki mai.n is ko haasil nahii.n kar sakuu.ngaa
mujhe apnii din-bhar kii thak-haar kar mere paas aane vaalii dulhan se Garaz hai
mirii zard-ruu multajii aur behis dulhan mujh ko aise kahaa.n dekhtii hai
use us se kyaa bujh rahaa huu.n damaa-dam damaa-dam piyaape piyaape o damaa-dam
use aisii baato.n se raGbat nahii.n hai
use to Garaz us se hai thak chukii hai ghareluu shab-o-roz kii uljhano.n se
ye us kaa taqaazaa hai le jaa.uu.n us ko kahii.n duur baadal se parbat se bhii duur
jahaa.n huu.n sunahrii libaado.n kii kirne.n vo zar-kaar kirne.n ki jo gungunaa.e.n
jahaa.n huu.n zamurrad ke pardo.n pe KHuu.n rang phuulo.n ke naGme ki jo muskuraa.e.n
jahaa.n nelmii sard Gurfe huu.n Gurfe
zaraa khol duu.n apne Gurfe kii baahe.n
shafaq kii dulhan jaa chukii hai har ik samt hai.n aasmaa.n parastaaro.n ke aa.nsuu
idhar aa idhar aa mirii zard-ruu merii behis dulhan merii aaGosh me.n aa
ki mai.n Dar rahaa thaa
mujhe dekhtii thii shafaq kii dulhan tere hote hu.e bhii mujhe dekhtii thii
mujhe ghuurtii thii

Yusuf Zafar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now