Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "milan"

Nazm MATCHES FOR "milan"

Nazm

KHamosh aawaz

jaag uThaa hai saaraa 'aalam
jaag uThii hai raat milan kii
aa.o zamii.n kii god me.n saajan
sej sajii hai aaj dulhan kii

Jan Nisar Akhtar
Nazm

git

chalo phir se muskuraa.e.n
chalo phir se dil jalaa.e.n
jo guzar ga.ii.n hai.n raate.n
unhe.n phir jagaa ke laa.e.n
jo bisar ga.ii.n hai.n baate.n
unhe.n yaad me.n bulaa.e.n
chalo phir se dil lagaa.e.n
chalo phir se muskuraa.e.n
kisii shah-nashii.n pe jhalkii
vo dhanak kisii qabaa kii
kisii rag me.n kasmasaa.ii
vo kasak kisii adaa kii
ko.ii harf-e-be-muravvat
kisii kunj-e-lab se phuuTaa
vo chhanak ke shiisha-e-dil
tah-e-baam phir se TuuTaa
ye milan kii naa milan kii
ye lagan kii aur jalan kii
jo sahii hai.n vaardaate.n
jo guzar ga.ii.n hai.n raate.n
jo bisar ga.ii hai.n baate.n
ko.ii un kii dhun banaa.e.n
ko.ii un kaa giit gaa.e.n
chalo phir se muskuraa.e.n
chalo phir se dil jalaa.e.n

Faiz Ahmad Faiz
Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

kalpana

raat hai kitnii gahrii kaalii
dukh kii baat sujhaane vaalii
duur duur kii aavaazo.n ko
uj.De gharo.n me.n laane vaalii
sar par hai ghanghor badriyaa
dil me.n lagan piriitam ke milan kii
shor machaatii ba.Dhtii aa.e
tez havaa suune madhuuban kii
cha.Dhtaa saagar rasta roke
bairan bijlii jii ko Daraa.e
duur bahut hai pii kii nagariyaa
ham se to ab chalaa na jaa.e

Muneer Niyazi
Nazm

mujhe to intizar-e-ishq mein hi lutf aata hai

mujhe to intizaar-e-ishq me.n hii lutf aataa hai
kisii kii chaahato.n kaa rang har dha.Dkan pe taarii ho
ajab saa karb bechainii musalsal be-qaraarii ho
nigaahe.n muntazir furqat kasak aur aah-o-zaarii ho
mujhe to intizaar-e-ishq me.n hii lutf aataa hai
kabhii pahluu me.n miltaa hai kabhii vo duur jaataa hai
kisii ke jism o jaa.n ko ishq har lamha jalaataa hai
tasavvur kaise kaise dil-nashii.n manzar dikhaataa hai
mujhe to intizaar-e-ishq me.n hii lutf aataa hai
abhii to furqat-e-jaanaa.n ke qisse KHuub likhne hai.n
dabii chaahat ke naGme aur taraane KHuub likhne hai.n
rifaaqat me.n judaa.ii ke fasaane KHuub likhne hai.n
mujhe to intizaar-e-ishq me.n hii lutf aataa hai
'aliinaa' intizaar-e-ishq Gazlo.n ko sajaa degaa
visaal-e-yaar to bas chand lamho.n kaa mazaa degaa
milan ho phir judaa.ii aisaa pal har pal sazaa degaa
mujhe to intizaar-e-ishq me.n hii lutf aataa hai

Aleena Itrat
Nazm

sunahri machhli

baat hai to kuchh aib sii
lekin phir bhii hai
ho ga.ii thii mohabbat
ek mard ko
ek sunahrii machhlii se
lahro.n se aTkheliyaa.n kartii
bal khaatii chamchamaatii machhlii
bhaa ga.ii thii mard ko
TukTukii baa.ndhe pahro.n
dekhtaa rahtaa vo
us shoKH kii aThkheliyaa.n
machhlii ko bhii achchhaa lagtaa thaa
mard kaa is tarah se nihaarnaa
ba.ndh ga.e dono.n pyaar ke bandhan me.n
milan kii KHvaahish fitrii thii
mard ne machhlii se iltijaa kii
ek baar sirf ek baar
paanii se baahar aane kii koshish karo
mohabbat kaa junuun
itnaa shadiid thaa ki
baGair kuchh soche-samjhe
machhlii paanii se baahar aa ga.ii
chhaT-paTaa ga.ii
bahut barii tarah se chhaT-paTaa ga.ii
lekin ab
vo apne mahbuub kii baa.nho.n me.n thii
mohabbat kii kaifiyat me.n
kuchh pal ko
saarii ta.Dap saarii chhaT-paTaahaT jaatii rahii
do badan ik jaan ho ga.e
sairaab ho kar mahbuub ne
mahbuuba ko paanii ke supurd kar diyaa
ba.Daa anokhaa ba.Daa masarrat-a.ngez
aur ba.Daa dardnaak thaa ye mel
har baar puurii taaqat baTor kar
chal pa.Dtii mahbuuba
mahbuub se milne
ta.Dpha.Daatii chhaT-paTaatii
pyaar detii pyaar paatii
sairaab kartii sairaab hotii
aur phir lauT aatii paanii me.n
ek din
machhlii ko jaane kyaa suujhii
us ne mard se kahaa
aaj tum aa.o
mai.n paanii me.n kaise aa.uu.n
kuchh pal apne saa.nse.n rok lo
machhlii ne kahaa
saa.ns rok luu.n
ya.anii jiinaa rok luu.n
kuchh pal jiine ke liye hii to aataa huu.n mai.n
tumhaare paas
saa.ns rok luu.ngaa to jiyuu.ngaa kaise
mard ne kahaa
machhlii sakte me.n thii
ek hii pal me.n:
mard kii fitrat aur mohabbat ke
baahamii rishte kii sachchaa.ii
us ke saamne thii
ab
kuchh jaan.ne paane aur chaahne ko
baaqii nahii.n bachaa thaa
machhlii ne be-kaif nigaaho.n se
mard ko dekhaa
aur Duub ga.ii
be-panaah gahraa.iyo.n me.n
udhar KHud se be-KHabar mard
jiine kii KHvaahish liye abhii tak vahii.n baiThaa hai
aur soch rahaa hai meraa qusuur kyaa hai

Deepti Mishra
Nazm

meri ramaen adhuri hai abhi

merii raamaa.en adhuurii hai abhii
merii siitaa
aur mujh me.n haa.il duurii hai abhii
merii siitaa udaas hai
rishto.n kaa phailaa ban-baas hai
phirnaa hai mujhe abhii
ja.ngal jangal sahraa sahraa saagar saagar
meraa hamza vahii meraa lachhman hai abhii
zamaana to ayyaar hai
sau bhes badal letaa hai
saadhuu.o.n ke bahruup me.n hai.n poshiida abhii
na jaane raakshash kitne
aaj phir
zamaane ne chhal liyaa hai mujhe
merii siitaa ko
haalaat ke raavan ne
har liyaa hai abhii
duur bahut duur
merii nigaaho.n se ojhal
saahil samundar kii ret par
vo be-sudh pa.Dii ro rahii hai abhii
taaham
apnii shikasta haalii se
is ne haar nahii.n maanii hai abhii
vaqt ke lankeshvar ke aage
us ne aatm samarpan kiyaa nahii.n hai abhii
riit me.n dha.nsii apnii nannhii sii kashtii ko
vo tak rahii hai Gaur se
apne raam ke qadmo.n kii aahaT
kii muntazir samaa.at ko sameTe hu.e
saraapaa-bagosh banii
dukh kii bhaTTii me.n tap ke nikhar rahii hai abhii
milan kii shubh gha.Dii kaa use abhii hai yaqiin
is ke KHushk ho.nTo.n pe hai meraa hii naam
raam raam raam
saahibo
haqiiqat to ye hai ki raakshas baahar nahii.n hai kahii.n
raakshas to KHud apne andar
daruun-e-KHaana-e-dil me.n ruu-posh hai kahii.n
merii siitaa
merii bholii bhaalii siitaa ko
intizaar us sunahre pul kaa hai
jab meraa Gussa shaant hogaa
aur mere andar se
mariyaada purush raam utpann ho.nge kabhii na kabhii
tab raavan apne aap hii paraast ho jaa.egaa
tabhii raam jii apnii siitaa ko
apne pahluu me.n uThaa kar le jaa.e.nge
apne dil ke singhaasan par biThaa.e.nge tabhii
tabhii diip jale.nge
ghar aa.ngan me.n uupar niiche chaaro.n aur
tabhii din dasahraa hogaa
tabhii raat diivaalii hogii

Perwaiz Shaharyar
Nazm

milan ki raat

ai doshiiza! mat ghabraa
ab suuraj Duubne vaalaa hai
suuraj Duub ke ek a.ndherii kaalii raat ko laa.egaa
laakho.n an-honii baato.n kaa mela dhyaan me.n laa.egaa
phir baadal ghir kar aa.e.nge
garaj garaj kar chamak chamak kar teraa jii dahlaa.e.nge
barkhaa ke us sannaaTe me.n mukuT sajaa.e
ik matvaalaa aa.egaa
saath tujhe le jaa.egaa

Muneer Niyazi
Nazm

badalte pahlu

kitnii dilkash hotii hai.n KHush-fahmiyaa.n
KHatm hone se pahle
ba.De ra.ngiin hote hai.n KHvaab
bikharne se pahle
bahut hasiin hote hai.n phuul
murjhaane se pahle
behad KHuub-suurat hotii hai mohabbat
bevafaa.ii se pahle
har aaGaaz pahu.nchtaa hai anjaam ko
milan kaa piichhaa kartii hai judaa.ii
din ke pahluu me.n rahtii hai raat
aur zindagii kaa daaman thaame
saaya sii chaltii hai maut
zindagii ke utaar-cha.Dhaa.o
dil par chho.D jaate hai.n naqsh
agar insaan kaa bas chaltaa
kyaa vo KHushii ke pal hii nahii.n chuntaa

Elizabeth Kurian Mona
Nazm

eid milan

bichh.De hu.o.n ko bichh.De hu.o.n se milaa.e hai
har samt eid jashn-e-mohabbat manaa.e hai
insaaniyat kii pe.ng mohabbat ba.Dhaa.e hai
mausam har ik umiid ko jhuulaa jhulaa.e hai
baarish me.n khet aisii tarah se nahaa.e hai
raunaq har ik kisaan ke chehre pe aa.e hai
ham sab ko apne ghere me.n lene ke vaaste
chaaro.n taraf se ghir ke ghaTaa aaj aa.e hai
haivaaniyat ne KHuun ke dhabbe janam diye
barsaat aa ke KHuun ke dhabbe chhu.Daa.e hai
shahzaadii-e-bahaar kii aamad hai baaG me.n
har ek phuul raah me.n aa.nkhe.n bichhaa.e hai
hai kitnii pyaarii pyaar bharii eid kii adaa
apnaa samajh ke sab ko gale se lagaa.e hai
sach puuchhiye to ye bhii mohabbat kaa hai subuut
jo raa.e aap kii hai vahii merii raa.e hai
bauchhaare.n aa ke detii hai.n us ko salaamiyaa.n
bansii bajaa bajaa ke jo mela lagaa.e hai
mai.n jaa.uu.ngaa to phir kabhii vaapas na aa.uu.ngaa
kaalii ghaTaa to har baras aa.e hai jaa.e hai
eid-ul-fitar kii vaj.h-e-sharaafat to dekhiye
har saal aa ke sab ko gale se lagaa.e hai
diije du.aa.e.n eid kii tyauhaar ko 'naziir'
ik bhii.D aaj aap se milne ko aa.e hai

Nazeer Banarasi
Nazm

bachchon ki eid

eid bahut hii dhuum se aa.ii
baazaaro.n me.n raunaq laa.ii
pahan ke achchhe achchhe kap.De
bachche apne ghar se nikle
kap.De goTe aur phaTe ke
jhilmil karte jham jham karte
eid milan ko pahu.nche ghar ghar
kitne KHush the baaham mil kar
phenii aur miThaa.ii khaa.ii
miiThii miiThii eid manaa.ii
mile unhe.n eidii ke paise
khel khilaune KHuub KHariide
jaa kar baaG me.n jhuulaa jhuule
duniyaa ke saare Gam bhuule
sab ne dil se eid manaa.ii
magar hame.n to zaraa na bhaa.ii
tum jo nahii.n thii.n paas hamaare
dil bhar aayaa Gam ke maare
merii 'siimii.n' merii pyaarii
tum ko mubaarak eid tumhaarii
tum ne manaa.ii KHuub ye eid
hame.n tumhaarii hu.ii na diid
ham to jab tum ko dekhe.nge
eid usii din kii samjhe.nge

Masooda Hayat
Nazm

pandrah august

ghaTaa hai ghanghor raat kaalii fazaa me.n bijlii chamak rahii hai
milan kaa siina ubhaar par hai birah kii chhaatii dha.Dak rahii hai
havaa jo mastii me.n chuur ho kar qadam qadam par bahak rahii hai
kamar hai har shaaKH-e-gul kii naazuk Thahar Thahar kar lachak rahii hai
havaa pe chaltaa hai hukm in kaa ghaTaa.e.n bhartii hai.n in kaa paanii
inhii.n se surKHii bahaar kii hai inhii.n se barsaat kii kahaanii
inhii.n se chashme inhii.n se jharne inhii.n se jharno.n kii naGma-KHvaanii
inhii.n se parbat inhii.n se dariyaa inhii.n se dariyaa.o.n kii ravaanii
fareb de kar chalii na jaa.e.n ba.Dii dhu.e.n-dhaar hai.n ghaTaa.e.n
jab aa ga.ii hai.n to jam ke barse baGair barse na lauT jaa.e.n
mile nayaa sab ko ek jiivan chaman khile.n khet lahlahaa.e.n
havaa mohabbat kaa raag alaape kisaan dhartii ke giit gaa.e.n
yahaa.n pe hai sab kaa ek darja ko.ii bhii chhoTaa ba.Daa nahii.n hai
jahaa.n pe ho imtiyaaz is kaa vo mai-kada mai-kada nahii.n hai
nikal zaraa ghar se Gam ke maare uruus-e-fitrat ke kar nazaare
sazaa samajh kar na kaaT pyaare ye zindagii hai sazaa nahii.n hai
kiyaa hai jis jis ne duur a.ndheraa use use raushnii me.n laa.o
jahaa.n jahaa.n dafn hai ujaalaa vahaa.n vahaa.n par diye jalaa.o
qasam hai aazaadii-e-vatan kii adaavat aapas kii bhuul jaa.o
kiyaa ho jis ne gilaa tumhaaraa use bhii ba.Dh kar gale lagaa.o
qadam jo aage ba.Dhaa.e sab kii zabaa.n se doharaa.o vo kahaanii
'naziir' pa.ndrah august se lo na.e iraade na.ii javaanii
havaa se kah do ki saaz chhe.De amar shahiido.n ke baa.nkpan kaa
sunaa.o yaaro vatan ke naGme ye din hai aazaadii-e-vatan kaa

Nazeer Banarasi
Nazm

ek suar se

aur milan kii us gha.Dii me.n
us sunahre din ke pas-manzar me.n
tum hairaa.n se
apnii dhun me.n
apnii jaavedaa.n bad-suuratii me.n
ek chiite kii tarah se KHuub-suurat lag rahe the

Saqi Faruqi
Nazm

baDa pyara mera hindostan hai

milan kii raag jantaa kii zabaa.n hai
ba.Daa pyaaraa miraa hindostaa.n hai

Ahmad Wasi
Nazm

diwali aur diwali milan

ghar kii qismat jagii ghar me.n aa.e sajan
aise mahke badan jaise chandan kaa ban
aaj dhartii pe hai sovarg kaa baa.nkpan
apsaraa.e.n na kyuu.n gaa.e.n ma.nglaacharan
zindagii se hai hairaan yamraaj bhii
aaj har diip a.ndhere pe hai KHanda-zan
un ke qadmo.n se phuul aur phul-vaariyaa.n
aagman un kaa madhumaas kaa aagman
us ko sab kuchh milaa jis ko vo mil ga.e
vo hai.n be-aas kii aas nirdhan ke dhan
hai diivaalii kaa tyauhaar jitnaa shariif
shahr kii bijliyaa.n utnii hii bad-chalan
un se achchhe to maaTii ke kore diye
jin se dahliiz raushan hai aa.ngan chaman
kau.Diyaa.n daa.nv kii chit pa.De.n chaahe paT
jiit to us kii hai jis kii pa.D jaa.e ban
hai diivaalii-milan me.n zaruurii 'naziir'
haath milne se pahle dilo.n kaa milan

Nazeer Banarasi
Nazm

megh dut

mai.n ki bint-e-jijr huu.n
mujh me.n aisii pyaas hai
mai.n ki mere vaaste
vasl bhii firaaq hai
mujh me.n aisii aag hai
megh-ras me.n bhiig kar
haa.nptii kha.Dii kha.Dii
kah rahaa hai dil meraa
yahii hai
madhur milan kii gha.Dii

Fahmida Riaz
Nazm

wahi hua na ki jis ka Dar tha

bichha.D ga.e tum badal ga.e tum
ye rut jo badlii badal gayaa sab
vafaa kii baate.n milan kii raate.n
vahii hu.aa naa ki jis kaa Dar thaa
udaasii aa.nkho.n me.n bas ga.ii hai
ra.ng saare pa.De hai.n phiike
tumhaare jazbe kii ik lahar se
uja.D ga.ii hai hamaarii duniyaa
vahii hu.aa hai ki jis kaa Dar thaa

Asra Rizvi
Nazm

diwali

aa.ii divaalii aa.ii divaalii giit KHushii ke gaa.o
a.ndhiyaare ko duur karo tum ghar ghar diip jalaa.o
siitaa raam kii raaho.n ko ab phuulo.n se mahkaa.o
chaudah baras me.n lauTe ghar ko lachhman siitaa raam
aaj har ik nar-naarii ke lab par hai unhii.n kaa naam
baazaaro.n me.n lagaa hu.aa hai diivaalii kaa mela
ko.ii KHariide bartan bhaanDe ko.ii shaal doshaalaa
ko.ii KHariide aatish-baazii ko.ii gulo.n kii maalaa
chaudah baras me.n lauTe ghar ko lachhman siitaa raam
aaj har ik nar-naarii ke lab par hai unhii.n kaa naam
dulhan kii maanind saje hai.n mandir aur shivaale
puujaa kaa saamaan sajaa.e aa.e hai.n matvaale
dayaa dharm kaa daan kare.nge aaj yahaa.n dil vaale
chaudah baras me.n lauTe ghar ko lachhman siitaa raam
aaj har ik nar-naarii ke lab par hai unhii.n kaa naam
har maz.hab har dharm ke bande gale milan ko aa.e.n
zaat-paat ke mat-bhedo.n ko dil se aaj miTaa.e.n
ek hai.n saare bhaarat-vaasii duniyaa ko dikhlaa.e.n
chaudah baras me.n lauTe ghar ko lachhman siitaa raam
aaj har ik nar-naarii ke lab par hai unhii.n kaa naam

Masooda Hayat
Nazm

pardesi ka KHat

hamaarii duurii ke mausamo.n ko
ai jaan-e-jaanaa.n nisaab rakhnaa
mai.n tum se milne ko aa.uu.ngaa jab
varaq varaq tum kitaab rakhnaa
sabhii shikaayaat yaad kar ke
sazaa.o.n kaa bhii hisaab rakhnaa
KHalish hai jo bhii tumhaare dil me.n
mire liye intisaab rakhnaa
savaal jitne ho.n dil me.n chubhte
unhe.n faraaGat se puuchh lenaa
mirii mohabbat kaa paas karnaa
mujhe mukammal javaab rakhnaa
uThaanaa parde haqiiqato.n se
faqat na mahv-e-saraab rakhnaa
bichha.D ke tum se milan kii lazzat
thakan hamaarii sameT lenaa
firaaq me.n phir jo de.n sahaaraa
hamaare hissa ye KHvaab rakhnaa
na duur jaanaa na hijr denaa
na mujh ko Garq-e-azaab rakhnaa
hamaare lafzo.n pe Gaur karnaa
bichha.D ke tum se na chain paayaa
KHamoshiyo.n ko na raah denaa
na dil ko KHaana-KHaraab rakhnaa
rafaaqato.n ke bha.nvar me.n mujh ko
Dubo Dubo ke ubhaar denaa
har ek lamha navaaz denaa
na mujh se ko.ii hijaab rakhnaa
tumhaarii furqat ke karb kaaTe
mai.n qatra qatra bikhar rahaa huu.n
tum apnii chaahat ko merii KHaatir
ba-suurat-e-injezaab rakhnaa
jhulas chuke hai.n tamaam jazbe
unhe.n mohabbat se sii.nch denaa
zaraa sii saKHtii zaraa sii narmii
misaal-e-aab-o-turaab rakhnaa
tumhaare jazbaat kii sadaaqat
vajuud par abr ban ke barse
nikhar sake zindagii kaa mausam
mire liye ye savaab rakhnaa

Asra Rizvi
Nazm

surKH gulabon ke mausam mein

bahut be-rang se din hai.n
tire gulnaar gaalo.n ke gulaabii phuul khilte hai.n
na tere phuul ho.nTo.n se
milan kii shoKH baato.n ke sunahrii rang me.n lipTii
ko.ii titlii hii u.Dtii hai
na din ke zard kaaGaz par tirii tasviir bantii hai
na shab kii kaalii chaadar par tirii aa.nkhe.n chamaktii hai.n
na terii muskuraahaT kii kiran milne ko aatii hai
rago.n ke sard Gaaro.n me.n
udaasii jamtii jaatii hai

Shahzad Nayyar
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now