Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "sataa"

Nazm MATCHES FOR "sataa"

Nazm

ammi

ba.De bhayyaa ko saada roTii prosai.n
sataa kar unhe.n khilkhilaatii hai.n ammii

Abdul Bari Arif Jamali
Nazm

muhibban-e-watan ka nara

shahiid-e-jaur-e-gulchii.n hai.n asiir-e-KHasta-tan ham hai.n
hamaaraa jurm itnaa hai havaa-KHvaah-e-chaman ham hai.n
sataane ko sataa le aaj zaalim jitnaa jii chaahe
magar itnaa kahe dete hai.n fardaa-e-vatan ham hai.n
hamaare hii lahuu kii buu sabaa le jaa.egii kan.aa.n
milegaa jis se yuusuf kaa pata vo pairahan ham hai.n
hame.n ye faKHr haasil hai payaam-e-nuur laa.e hai.n
zamii.n pahle-pahal chuumii hai jis ne vo kiran ham hai.n
sulaa legii hame.n KHaak-e-vatan aaGosh me.n apnii
na fikr-e-gor hai ham ko na muhtaaj-e-kafan ham hai.n
banaa le.nge tire zindaa.n ko bhii ham Gairat-e-mahfil
liye apnii nigaaho.n me.n jamaal-e-anjuman ham hai.n
nahii.n tesha to sar Takraa ke juu-e-shiir laa.e.nge
bayaabaan-e-junuu.n me.n jaanashiin-e-kohkan ham hai.n
zamaana kar rahaa hai koshishe.n ham ko miTaane kii
hilaa paataa nahii.n jis ko vo buniyaad-e-kuhan ham hai.n
na daulat hai na sarvat hai na ohda hai na taaqat hai
magar kuchh baat hai ham me.n ki jaan-e-anjuman ham hai.n
tire KHanjar se apne dil kii taaqat aazmaanaa hai
mohabbat ek apnii hai tiraa saaraa zamaana hai
fidaa-e-mulk honaa haasil-e-qismat samajhte hai.n
vatan par jaan dene hii ko ham jannat samajhte hai.n
kuchh aise aa ga.e hai.n ta.ng ham kunj-e-asiirii se
ki ab is se to behtar gosha-e-turbat samajhte hai.n
hamaare shauq kii vaaraftagii hai diid ke qaabil
pahu.nchtii hai agar iizaa use raahat samajhte hai.n
nigaah-e-qahr kii mushtaaq hai.n dil kii tamannaa.e.n
KHat-e-chiin-e-jabii.n hii ko KHat-e-qismat samajhte hai.n
vatan kaa zarra zarra ham ko apnii jaa.n se pyaaraa hai
na ham maz.hab samajhte hai.n na ham millat samajhte hai.n
hayaat-e-aarzii sadqe hayaat-e-jaavedaanii par
fanaa honaa hii ab ik ziist kii suurat samajhte hai.n
hame.n ma.aluum hai achchhii tarah taab-e-jafaa terii
magar is se sivaa apnii had-e-ulfat samajhte hai.n
Gam-o-Gussa dikhaanaa ik daliil-e-naa-tavaanii hai
jo ha.ns kar choT khaatii hai use taaqat samajhte hai.n
Gulaamii aur aazaadii bas itnaa jaante hai.n ham
na ham dozaKH samajhte hai.n na ham jannat samajhte hai.n
dikhaanaa hai ki la.Dte hai.n jahaa.n me.n baa-vafaa kyuu.nkar
nikaltii hai zabaa.n se zaKHm khaa kar marhabaa kyuu.nkar

Anand Narayan Mulla
Nazm

bambai

jagmagaate hu.e qumqume, park, baaGaat aur museum
sa.ng-e-marmar ke but, dhaat ke aadmii
sard o sa.ngiin azmat ke paikar
aa.nkhe.n be-nuur, lab be-sadaa, haath be-jaan
hind kii bebasii aur mahkuumii kii yaadgaare.n
saik.Do.n saal ke garm aatish-kade
zar o sandal kii aag
uud-o-ambar ke shole

Ali Sardar Jafri
Nazm

hawa ruki hai to raqs-e-sharar bhi KHatm hua

qalam udaas hai lafzo.n me.n hashr barpaa hai
havaa rukii hai to raqs-e-sharar bhii KHatm hu.aa
junuun-e-shauq junuun-e-safar bhii KHatm hu.aa
furaat-e-jaa.n
tirii maujo.n me.n ab ravaanii nahii.n
ko.ii fasaana nahii.n ab ko.ii kahaanii nahii.n
simaT ga.e hai.n kinaare vo be-karaanii nahii.n
to kyaa ye nabz kaa chalnaa hii zindagaanii hai
nahii.n nahii.n ye ko.ii ziist kii nishaanii nahii.n
ki saa.ns lenaa faqat ko.ii zindagaanii nahii.n
kuchh aur rang me.n aa.ii hai ye KHizaa.n ab ke
hai simTii simTii sii KHud me.n hii Gairat-e-naahiid
miyaan-e-ahl-e-tariiqat bhii be-ridaa hai Gazal
hujuum-e-ahl-e-zabaa.n aur be-navaa hai Gazal
safar ye kaise kare KHaarzaar rasto.n par
thakan savaar hai is par barahna-paa hai Gazal
tumhaaraa saath jo chhuuTaa to ab pareshaa.n hai
ki is taGaaful-e-be-jaa pe saKHt hairaa.n hai
ye kis maqaam pe tum ne akelaa chho.D diyaa
tumhe.n KHabar hai ki tum se bahut KHafaa hai Gazal
ye be-makaanii
ye tanhaa.ii aur ye dar-ba-darii
sataa rahaa hai bahut ab KHayaal-e-ham-safarii
saliib-o-daar-o-rasan se guzar rahii hai Gazal
chale bhii aa.o kahaa.n ho ki mar rahii hai Gazal
siyah libaas me.n nauhe udaas baiThe hai.n
saro.n ko thaame qasiide udaas baiThe hai.n
hai marsiye kii nigaaho.n me.n abr Thahraa hu.aa
badan dariida latiife udaas baiThe hai.n
ubhar rahii hai ye kaisii sadaa-e-vaavailaa
sirhaane dekho rubaa.ii kaa bain hotaa hai
vo dekho
nazm-e-garebaan chaak karte hu.e
duhaa.ii detii hai maqtal ke isti.aaro.n kii
alaamato.n kii kinaayo.n kii aur ishaaro.n kii
bahut maluul hai.n shahr-e-suKHan kii tahriire.n
shab-e-alam ke hai.n qisse junuu.n kii tafsiire.n
varaq varaq hai pareshaa.n Gubaar-e-KHaatir kaa
hu.aa hai nasr ko ehsaas phir yatiimii kaa
havaa-e-shahr-e-sitam kis adaa se guzrii hai
dahan KHamosh hai.n
chup chup se hai.n suKHan ke charaaG
bujhii bujhii sii hai qindiil-e-KHaanqaah-e-adab
dhu.aa.n dhu.aa.n hai.n
KHitaabat ke fikr-o-fan ke charaaG
hai aasmaan adab pe vo dhu.nd chhaa.ii hu.ii
dikhaa.ii detaa nahii.n ab ko.ii sitaara-e-nuur
kalaam kaa vo qariina
vo guftuguu kaa shu.uur
kahaa.n se ab ko.ii laa.egaa saanii-e-manzuur
ajiib vaqt pa.Daa hai fan-e-nizaamat par
ki dam-ba-KHud se kha.De hai.n ab 'anvar'-o-'manzuur'
vaqaar kaise ataa ho shikasta lahjo.n ko
rafuu kare ko.ii kaise dariida jumlo.n ko
hai muskuraanaa zaruurii vaqaar-e-Gam ke liye
taraashe kaun zabaa.n hurmate-qalam ke liye
tumhaare jaane se viiraan ho ga.ii mahfil
uja.D gayaa hai ye dekho jahaan-e-shahr-e-adab
samajh me.n kuchh nahii.n aataa ki ab kahaa.n jaa.e.n
bhaTakte phirte hai.n ab saakinaan-e-shahr-e-adab
ye mai-kade kii udaasii
ye jaam ulTe hu.e
ki jaise ro.e ho.n shab-bhar ye saaGar-o-miinaa
ka.ii dino.n se ha.nsii hii nahii.n hai collage-girl
tumhaare hijr ne patthar banaa diyaa hai use
bahut udaas ba.Dii be-qaraar chup chup sii
ki huzn-o-yaas kaa manzar banaa diyaa hai use
vo dekho mez pe jitnii kitaabe.n rakkhii hai.n
tumhaarii gard rifaaqat hai sab ke chehre par
pukaartii hai.n tumhe.n ye adhuurii tahriire.n
bikharte TuuTte KHvaabo.n kii tishna ta.abiire.n
ye uj.Daa uj.Daa dabistaan Dhuu.nDhtaa hai tumhe.n
chale bhii aa.o ki imkaan Dhuu.nDhtaa hai tumhe.n
jo ho sake to chale aa.o tum malik-zaada
magar ye KHvaahish-e-bejaa
use KHabar hii nahii.n
ki jaane vaale kabhii lauT kar nahii.n aate
mahakte rahte hai.n gul-daan un kii yaado.n ke
sulagte rahte hai.n lobaan un kii yaado.n ke

Tariq Qamar
Nazm

album

harii masjid kii halkii dhuup me.n
taaza vazuu se giile paa.nv
aur Tapaktii aastiino.n kii chamak me.n log the
jo saf-ba-saf
apnaa janaaza pa.Dh rahe the
sadar darvaaze se
ik baaruud me.n Duubaa hu.aa
jannat kaa saTTaa-baaz aur huuro.n kaa saudaagar
achaanak sahv kaa sajda adaa karne ko aayaa
aur harii masjid ne apnaa rang badlaa
qurmuzii dahliiz par jitne bhii juute the
vo taaza KHuun par pahle to tere
aur phir
jamte lahuu par jam ga.e

Waheed Ahmad
Nazm

bargad se wapsi

use buddhaa pe raham aayaa
vo bachchii haath me.n pencil paka.D kar sochtii hai
aur phir tasviir ke uupar
lakiire.n khii.nch kar mo.nchhe.n banaatii hai
aur is tabdiilii se andar hii andar muskuraatii hai
ki jaise us ne daanish kii sabhii kamzoriyaa.n
apnii lakiiro.n se chhupaa dii hai.n
use maaluum hii kab hai
ki us ke haath kii jumbish ne andar kii
sabhii aalaa.ishe.n chehre pe rakh dii hai.n
vo jin ko jism se aazaad kar ke ek arse se tyaagii thaa
ab aasaar-e-qadiima vaale safhe par 'danaayaa' aur 'sataa' ke ko.ii mafhuum hii baaqii nahii.n hai.n
zaraa mo.nchhe.n banaane se sabhii dukh miT ga.e hai.n
marg' kii ko.ii zaruurat hii nahii.n
buddhaa kapilvastu kaa shahzaada dobaara ban gayaa hai

Qasim Yaqub
Nazm

KHargosh ka gham

hariif kaun thaa Galiiz bad-numaa saa jaanvar
vo be-KHabar
jo re.ngtaa hu.aa chalaa
jo re.ngtaa chalaa gayaa
na jaane kis jahaan se tumhaarii rah me.n aa gayaa
usuul ban ke zindagii ke aasmaa.n pe chhaa gayaa

Balraj Komal
Nazm

ai urus-e-bambai

piir vo jo race ke gho.Do.n pe rakhte hai.n nazar
vahii naazil hotii hai saTTe kii jin ke qalb par

Izhaar Malihabadi
Nazm

kya wo main hi tha

khaane se pahle ye kabhii na sochaa
kyaa khaanaa hai
baad me.n kabhii KHayaal na aaya
kyaa aur kitnaa khaayaa
ganne ko daa.nto.n se chhiil ke khaa saktaa thaa
kachchaa saTTaa pakke chane chabaa saktaa thaa
shart lagaa kar aa.ngan me.n
jaamun ke pe.D kii sab se uu.nchii shaaKH ko chhuu aataa thaa
kyaa vo mai.n hii thaa

Basir Sultan Kazmi
Nazm

farisa mahdubani se

ki madhuubanii
chaqmaq kii chaTTaan ke piichhe raste jhilmilaate paaniyo.n ke jin chashmo.n se piitii hai vo amrit
aur jin jharno.n-bhare sarsabz kohistaano.n me.n
vo letii hai a.ng.Daa.iyaa.n apnii saheliyo.n ke saath
tum use lagaam de kar
kabhii vahaa.n tak nahii.n pahu.nch saktii.n
pas sivaa.e is ke
ki ban jaa.o tum bhii
us kii sakhii

Taimoor Shahid
Nazm

peD ki shaKHon par

pe.D kii shaaKHo.n par
aavezaa.n
kuchh lamhe pyaar ke
chhoTe chhoTe gulaabii ru.ii ke
gaalo.n kii tarah
ka.ii baar
apne lab-o-ruKHsaar se saTaa kar
un ke KHargoshii lams ko
mahsuus karnaa chaahaa hai
aur chaahaa hai
kaale dhabiile aakaash par
chhiTakte chamkiile daa.ero.n ko
aa.nkho.n me.n bharnaa
jab kabhii barastii barsaat me.n
dard kaa paimaana chhalkaa hai
tab aakaash ke dhabbe
ek duusre me.n mudGam ho ga.e hai.n
sofe par adh-leTii
coffee ke pyaale me.n
mai.n in sab ko
saaf saaf
Duubte ubharte dekh rahii huu.n

Asha Parbhat
Nazm

nind

dahr ne jin ko sataa rakkhaa hai
jin ko hai ziist kaa har lahza vabaal
jin ko naakaamiyo.n ne gheraa hai
jin ko duniyaa me.n na sarvat hai na maal
aiso.n kaa Gam Galat ik do gha.Dii kartii hai tuu
dast-e-shafqat dil-e-pazh-murda pe dhartii hai tuu

Azeemuddin Ahmad
Nazm

bhali si ek shakl thi

na ye ki vo chale to kahkashaa.n sii rahguzar lage
magar vo saath ho to phir bhalaa bhalaa safar lage

Ahmad Faraz
Nazm

ramz

in kitaabo.n ne ba.Daa zulm kiyaa hai mujh par
in me.n ik ramz hai jis ramz kaa maaraa hu.aa zehn
muzhda-e-ishrat-e-anjaam nahii.n paa saktaa
zindagii me.n kabhii aaraam nahii.n paa saktaa

Jaun Eliya
Nazm

saza

har baar mere saamne aatii rahii ho tum
har baar tum se mil ke bichha.Dtaa rahaa huu.n mai.n
tum kaun ho ye KHud bhii nahii.n jaantii ho tum
mai.n kaun huu.n ye KHud bhii nahii.n jaantaa huu.n mai.n
tum mujh ko jaan kar hii pa.Dii ho azaab me.n
aur is tarah KHud apnii sazaa ban gayaa huu.n mai.n

Jaun Eliya
Nazm

KHub-surat moD

tumhe.n bhii ko.ii uljhan roktii hai pesh-qadmii se
mujhe bhii log kahte hai.n ki ye jalve paraa.e hai.n
mire hamraah bhii rusvaa.iyaa.n hai.n mere maazii kii
tumhaare saath bhii guzrii hu.ii raato.n ke saa.e hai.n

Sahir Ludhianvi
Nazm

shikwa

kyuu.n ziyaa.n-kaar banuu.n suud-faraamosh rahuu.n
fikr-e-fardaa na karuu.n mahv-e-Gam-e-dosh rahuu.n
naale bulbul ke sunuu.n aur hama-tan gosh rahuu.n
ham-navaa mai.n bhii ko.ii gul huu.n ki KHaamosh rahuu.n
jur.at-aamoz mirii taab-e-suKHan hai mujh ko
shikva allaah se KHaakam-ba-dahan hai mujh ko
hai bajaa sheva-e-tasliim me.n mash.huur hai.n ham
qissa-e-dard sunaate hai.n ki majbuur hai.n ham
saaz KHaamosh hai.n fariyaad se maamuur hai.n ham
naala aataa hai agar lab pe to ma.azuur hai.n ham
ai KHudaa shikva-e-arbaab-e-vafaa bhii sun le
KHuugar-e-hamd se tho.Daa saa gila bhii sun le
thii to maujuud azal se hii tirii zaat-e-qadiim
phuul thaa zeb-e-chaman par na pareshaa.n thii shamiim
shart insaaf hai ai saahib-e-altaaf-e-amiim
buu-e-gul phailtii kis tarah jo hotii na nasiim
ham ko jam.iiyat-e-KHaatir ye pareshaanii thii
varna ummat tire mahbuub kii diivaanii thii
ham se pahle thaa ajab tere jahaa.n kaa manzar
kahii.n masjuud the patthar kahii.n ma.abuud shajar
KHuugar-e-paikar-e-mahsuus thii insaa.n kii nazar
maantaa phir ko.ii an-dekhe KHudaa ko kyuu.nkar
tujh ko ma.aluum hai letaa thaa ko.ii naam tiraa
quvvat-e-baazu-e-muslim ne kiyaa kaam tiraa
bas rahe the yahii.n saljuuq bhii tuuraanii bhii
ahl-e-chii.n chiin me.n iiraan me.n saasaanii bhii
isii maamuure me.n aabaad the yuunaanii bhii
isii duniyaa me.n yahuudii bhii the nasraanii bhii
par tire naam pe talvaar uThaa.ii kis ne
baat jo big.Dii hu.ii thii vo banaa.ii kis ne
the hamii.n ek tire maarka-aaraa.o.n me.n
KHushkiyo.n me.n kabhii la.Dte kabhii dariyaa.o.n me.n
dii.n azaane.n kabhii europe ke kaliisaa.o.n me.n
kabhii africa ke tapte hu.e sahraa.o.n me.n
shaan aa.nkho.n me.n na jachtii thii jahaa.n-daaro.n kii
kalma pa.Dhte the hamii.n chhaa.nv me.n talvaaro.n kii
ham jo jiite the to jango.n kii musiibat ke liye
aur marte the tire naam kii azmat ke liye
thii na kuchh teGzanii apnii hukuumat ke liye
sar-ba-kaf phirte the kyaa dahr me.n daulat ke liye
qaum apnii jo zar-o-maal-e-jahaa.n par martii
but-faroshii ke evaz but-shikanii kyuu.n kartii
Tal na sakte the agar jang me.n a.D jaate the
paa.nv shero.n ke bhii maidaa.n se ukha.D jaate the
tujh se sarkash hu.aa ko.ii to biga.D jaate the
teG kyaa chiiz hai ham top se la.D jaate the
naqsh-e-tauhiid kaa har dil pe biThaayaa ham ne
zer-e-KHanjar bhii ye paiGaam sunaayaa ham ne
tuu hii kah de ki ukhaa.Daa dar-e-KHaibar kis ne
shahr qaisar kaa jo thaa us ko kiyaa sar kis ne
to.De maKHluuq KHudaa-vando.n ke paikar kis ne
kaaT kar rakh diye kuffaar ke lashkar kis ne
kis ne ThanDaa kiyaa aatish-kada-e-iiraa.n ko
kis ne phir zinda kiyaa tazkira-e-yazdaa.n ko
kaun sii qaum faqat terii talabgaar hu.ii
aur tere liye zahmat-kash-e-paikaar hu.ii
kis kii shamshiir jahaa.ngiir jahaa.n-daar hu.ii
kis kii takbiir se duniyaa tirii bedaar hu.ii
kis kii haibat se sanam sahme hu.e rahte the
mu.nh ke bal gir ke huu-allahu-ahad kahte the
aa gayaa ain la.Daa.ii me.n agar vaqt-e-namaaz
qibla-ruu ho ke zamii.n-bos hu.ii qaum-e-hijaaz
ek hii saf me.n kha.De ho ga.e mahmuud o ayaaz
na ko.ii banda rahaa aur na ko.ii banda-navaaz
banda o saahab o mohtaaj o Ganii ek hu.e
terii sarkaar me.n pahu.nche to sabhii ek hu.e
mahfil-e-kaun-o-makaa.n me.n sahar o shaam phire
mai-e-tauhiid ko le kar sifat-e-jaam phire
koh me.n dasht me.n le kar tiraa paiGaam phire
aur ma.aluum hai tujh ko kabhii naakaam phire
dasht to dasht hai.n dariyaa bhii na chho.De ham ne
bahr-e-zulmaat me.n dau.Daa diye gho.De ham ne
safha-e-dahr se baatil ko miTaayaa ham ne
nau-e-insaa.n ko Gulaamii se chhu.Daayaa ham ne
tere ka.abe ko jabiino.n se basaayaa ham ne
tere qur.aan ko siino.n se lagaayaa ham ne
phir bhii ham se ye gila hai ki vafaadaar nahii.n
ham vafaadaar nahii.n tuu bhii to dildaar nahii.n
ummate.n aur bhii hai.n un me.n gunahgaar bhii hai.n
ijz vaale bhii hai.n mast-e-mai-e-pindaar bhii hai.n
un me.n kaahil bhii hai.n Gaafil bhii hai.n hushyaar bhii hai.n
saik.Do.n hai.n ki tire naam se be-zaar bhii hai.n
rahmate.n hai.n tirii aGyaar ke kaashaano.n par
barq girtii hai to bechaare musalmaano.n par
but sanam-KHaano.n me.n kahte hai.n musalmaan ga.e
hai KHushii un ko ki ka.abe ke nigahbaan ga.e
manzil-e-dahr se uu.nTo.n ke hudii-KHvaan ga.e
apnii baGlo.n me.n dabaa.e hu.e qur.aan ga.e
KHanda-zan kufr hai ehsaas tujhe hai ki nahii.n
apnii tauhiid kaa kuchh paas tujhe hai ki nahii.n
ye shikaayat nahii.n hai.n un ke KHazaane maamuur
nahii.n mahfil me.n jinhe.n baat bhii karne kaa shu.uur
qahr to ye hai ki kaafir ko mile.n huur o qusuur
aur bechaare musalmaa.n ko faqat vaada-e-huur
ab vo altaaf nahii.n ham pe inaayaat nahii.n
baat ye kyaa hai ki pahlii sii mudaaraat nahii.n
kyuu.n musalmaano.n me.n hai daulat-e-duniyaa naayaab
terii qudrat to hai vo jis kii na had hai na hisaab
tuu jo chaahe to uThe siina-e-sahraa se habaab
rah-rav-e-dasht ho sailii-zada-e-mauj-e-saraab
taan-e-aGyaar hai rusvaa.ii hai naadaarii hai
kyaa tire naam pe marne kaa evaz KHvaarii hai
banii aGyaar kii ab chaahne vaalii duniyaa
rah ga.ii apne liye ek KHayaalii duniyaa
ham to ruKHsat hu.e auro.n ne sa.nbhaalii duniyaa
phir na kahnaa hu.ii tauhiid se KHaalii duniyaa
ham to jiite hai.n ki duniyaa me.n tiraa naam rahe
kahii.n mumkin hai ki saaqii na rahe jaam rahe
terii mahfil bhii ga.ii chaahne vaale bhii ga.e
shab kii aahe.n bhii ga.ii.n sub.h ke naale bhii ga.e
dil tujhe de bhii ga.e apnaa sila le bhii ga.e
aa ke baiThe bhii na the aur nikaale bhii ga.e
aa.e ushshaaq ga.e vaada-e-fardaa le kar
ab unhe.n Dhuu.nD charaaG-e-ruKH-e-zebaa le kar
dard-e-lailaa bhii vahii qais kaa pahluu bhii vahii
najd ke dasht o jabal me.n ram-e-aahuu bhii vahii
ishq kaa dil bhii vahii husn kaa jaaduu bhii vahii
ummat-e-ahmad-e-mursil bhii vahii tuu bhii vahii
phir ye aazurdagi-e-Gair sabab kyaa ma.anii
apne shaidaa.o.n pe ye chashm-e-Gazab kyaa ma.anii
tujh ko chho.Daa ki rasuul-e-arabii ko chho.Daa
but-garii pesha kiyaa but-shikanii ko chho.Daa
ishq ko ishq kii aashufta-sarii ko chho.Daa
rasm-e-salmaan o uvais-e-qaranii ko chho.Daa
aag takbiir kii siino.n me.n dabii rakhte hai.n
zindagii misl-e-bilaal-e-habashii rakhte hai.n
ishq kii KHair vo pahlii sii adaa bhii na sahii
jaada-paimaali-e-tasliim-o-razaa bhii na sahii
muztarib dil sifat-e-qibla-numaa bhii na sahii
aur paabandi-e-aa.iin-e-vafaa bhii na sahii
kabhii ham se kabhii Gairo.n se shanaasaa.ii hai
baat kahne kii nahii.n tuu bhii to harjaa.ii hai
sar-e-faaraa.n pe kiyaa diin ko kaamil tuu ne
ik ishaare me.n hazaaro.n ke liye dil tuu ne
aatish-andoz kiyaa ishq kaa haasil tuu ne
phuu.nk dii garmi-e-ruKHsaar se mahfil tuu ne
aaj kyuu.n siine hamaare sharer-aabaad nahii.n
ham vahii soKHta-saamaa.n hai.n tujhe yaad nahii.n
vaadii-e-najd me.n vo shor-e-salaasil na rahaa
qais diivaana-e-nazzaara-e-mahmil na rahaa
hausle vo na rahe ham na rahe dil na rahaa
ghar ye uj.Daa hai ki tuu raunaq-e-mahfil na rahaa
ai KHushaa aa.n roz ki aa.ii o ba-sad naaz aa.ii
be-hijaabaana suu-e-mahfil-e-maa baaz aa.ii
baada-kash Gair hai.n gulshan me.n lab-e-juu baiThe
sunte hai.n jaam-ba-kaf naGma-e-kuu-kuu baiThe
daur ha.ngaama-e-gulzaar se yaksuu baiThe
tere diivaane bhii hai.n muntazir-e-huu baiThe
apne parvaano.n ko phir zauq-e-KHud-afrozii de
barq-e-deriina ko farmaan-e-jigar-sozii de
qaum-e-aavaara inaa.n-taab hai phir suu-e-hijaaz
le u.Daa bulbul-e-be-par ko mazaaq-e-parvaaz
muztarib-e-baaG ke har Gunche me.n hai buu-e-niyaaz
tuu zaraa chhe.D to de tishna-e-mizraab hai saaz
naGme betaab hai.n taaro.n se nikalne ke liye
tuur muztar hai usii aag me.n jalne ke liye
mushkile.n ummat-e-marhuum kii aasaa.n kar de
mor-e-be-maaya ko ham-dosh-e-sulaimaa.n kar de
jins-e-naayaab-e-mohabbat ko phir arzaa.n kar de
hind ke dair-nashiino.n ko musalmaa.n kar de
juu-e-KHuu.n mii chakad az hasrat-e-dairiina-e-maa
mii tapad naala ba-nishtar kada-e-siina-e-maa
buu-e-gul le ga.ii bairuun-e-chaman raaz-e-chaman
kyaa qayaamat hai ki KHud phuul hai.n Gammaaz-e-chaman
ahd-e-gul KHatm hu.aa TuuT gayaa saaz-e-chaman
u.D ga.e Daaliyo.n se zamzama-pardaaz-e-chaman
ek bulbul hai ki mahv-e-tarannum ab tak
us ke siine me.n hai naGmo.n kaa talaatum ab tak
qumriyaa.n shaaKH-e-sanobar se gurezaa.n bhii hu.ii.n
pattiyaa.n phuul kii jha.D jha.D ke pareshaa.n bhii hu.ii.n
vo puraanii raushe.n baaG kii viiraa.n bhii hu.ii.n
Daaliyaa.n pairahan-e-barg se uryaa.n bhii hu.ii.n
qaid-e-mausam se tabii.at rahii aazaad us kii
kaash gulshan me.n samajhtaa ko.ii fariyaad us kii
lutf marne me.n hai baaqii na maza jiine me.n
kuchh maza hai to yahii KHuun-e-jigar piine me.n
kitne betaab hai.n jauhar mire aa.iine me.n
kis qadar jalve ta.Dapte hai.n mire siine me.n
is gulistaa.n me.n magar dekhne vaale hii nahii.n
daaG jo siine me.n rakhte ho.n vo laale hii nahii.n
chaak is bulbul-e-tanhaa kii navaa se dil ho.n
jaagne vaale isii baa.ng-e-daraa se dil ho.n
ya.anii phir zinda na.e ahd-e-vafaa se dil ho.n
phir isii baada-e-dairiina ke pyaase dil ho.n
ajamii KHum hai to kyaa mai to hijaazii hai mirii
naGma hindii hai to kyaa lai to hijaazii hai mirii

Allama Iqbal
Nazm

mujhse pahle

mujh se pahle tujhe jis shaKHs ne chaahaa us ne
shaayad ab bhii tiraa Gam dil se lagaa rakkhaa ho
ek be-naam sii ummiid pe ab bhii shaayad
apne KHvaabo.n ke jaziiro.n ko sajaa rakkhaa ho

Ahmad Faraz
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

kabhi kabhi

kabhii kabhii mire dil me.n KHayaal aataa hai
ki zindagii tirii zulfo.n kii narm chhaa.nv me.n
guzarne paatii to shaadaab ho bhii saktii thii
ye tiirgii jo mirii ziist kaa muqaddar hai
tirii nazar kii shu.aa.o.n me.n kho bhii saktii thii
ajab na thaa ki mai.n begaana-e-alam ho kar
tire jamaal kii ra.anaa.iyo.n me.n kho rahtaa
tiraa gudaaz-badan terii niim-baaz aa.nkhe.n
inhii hasiin fasaano.n me.n mahv ho rahtaa
pukaartii.n mujhe jab talKHiyaa.n zamaane kii
tire labo.n se halaavat ke ghuu.nT pii letaa
hayaat chiiKHtii phirtii barahna sar aur mai.n
ghanerii zulfo.n ke saa.e me.n chhup ke jii letaa
magar ye ho na sakaa aur ab ye aalam hai
ki tuu nahii.n tiraa Gam terii justujuu bhii nahii.n
guzar rahii hai kuchh is tarah zindagii jaise
ise kisii ke sahaare kii aarzuu bhii nahii.n
zamaane bhar ke dukho.n ko lagaa chukaa huu.n gale
guzar rahaa huu.n kuchh an-jaanii rahguzaaro.n se
muhiib saa.e mirii samt ba.Dhte aate hai.n
hayaat o maut ke pur-haul KHaarzaaro.n se
na ko.ii jaada-e-manzil na raushnii kaa suraaG
bhaTak rahii hai KHalaa.o.n me.n zindagii merii
inhii KHalaa.o.n me.n rah jaa.uu.ngaa kabhii kho kar
mai.n jaantaa huu.n mirii ham-nafas magar yuu.nhii
kabhii kabhii mire dil me.n KHayaal aataa hai

Sahir Ludhianvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now