Sher on Aazadi

chāhne vaalo pyaar meñ thoḌī āzādī bhī lāzim hai

dekho merā phuul ziyāda dekh-bhāl se TuuT gayā

chahne walo pyar mein thoDi aazadi bhi lazim hai

dekho mera phul ziyaada dekh-bhaal se TuT gaya

parinde sab nahīñ zindān meñ maare ga.e haiñ

qafas meñ kuchh to kuchh naql-e-makānī meñ mare haiñ

parinde sab nahin zindan mein mare gae hain

qafas mein kuchh to kuchh naql-e-makani mein mare hain

chheḌtī hai mujhe aa aa ke mirī āzādī

go maiñ qaidī huuñ mire paañv meñ zanjīr bhī hai

chheDti hai mujhe aa aa ke meri aazadi

go main qaidi hun mere panw mein zanjir bhi hai

band kamre meñ mujhe qaid kiyā hai kis ne

maiñ huuñ ik chīḳh fazāoñ meñ bikharne do mujhe

band kamre mein mujhe qaid kiya hai kis ne

main hun ek chiKH fazaon mein bikharne do mujhe

zindagī qaid-e-rivāyāt se ghabrātī hai

mauj-mastī meñ kināre se uchhal jaatī hai

zindagi qaid-e-riwayat se ghabraati hai

mauj-masti mein kinare se uchhal jati hai

tum ko ma.alūm kyā hai āzādī

tum parinde rihā nahīñ karte

tum ko malum kya hai aazadi

tum parinde riha nahin karte

tā-dam-e-marg tā.ir-e-hastī

dām-e-andoh se rihā na huā

ta-dam-e-marg tair-e-hasti

dam-e-andoh se riha na hua

khulī fazā mujhe 'azīz hai par is ko kyā karūñ

bichhā huā zamīñ se āsmāñ tak ek jaal hai

khuli faza mujhe 'aziz hai par is ko kya karun

bichha hua zamin se aasman tak ek jal hai

koī tadbīr-e-nau ai ahl-e-zindāñ

kahīñ zanjīr kaTtī hai du'ā se

koi tadbir-e-nau ai ahl-e-zindan

kahin zanjir kaTti hai du'a se