Sher on Judai

ab ke ham bichhḌe to shāyad kabhī ḳhvāboñ meñ mileñ

jis tarah sūkhe hue phuul kitāboñ meñ mileñ

ab ke hum bichhDe to shayad kabhi KHwabon mein milen

jis tarah sukhe hue phul kitabon mein milen

huā hai tujh se bichhaḌne ke baa'd ye mā'lūm

ki tū nahīñ thā tire saath ek duniyā thī

hua hai tujh se bichhaDne ke ba'd ye ma'lum

ki tu nahin tha tere sath ek duniya thi

kis kis ko batā.eñge judā.ī kā sabab ham

tū mujh se ḳhafā hai to zamāne ke liye aa

kis kis ko bataenge judai ka sabab hum

tu mujh se KHafa hai to zamane ke liye aa

aap ke ba.ad har ghaḌī ham ne

aap ke saath hī guzārī hai

aap ke baad har ghaDi hum ne

aap ke sath hi guzari hai

ab judā.ī ke safar ko mire āsān karo

tum mujhe ḳhvāb meñ aa kar na pareshān karo

ab judai ke safar ko mere aasan karo

tum mujhe KHwab mein aa kar na pareshan karo

vo aa rahe haiñ vo aate haiñ aa rahe hoñge

shab-e-firāq ye kah kar guzār dī ham ne

wo aa rahe hain wo aate hain aa rahe honge

shab-e-firaq ye kah kar guzar di hum ne

tum se bichhaḌ kar zinda haiñ

jaan bahut sharminda haiñ

tum se bichhaD kar zinda hain

jaan bahut sharminda hain

milnā thā ittifāq bichhaḌnā nasīb thā

vo utnī duur ho gayā jitnā qarīb thā

milna tha ittifaq bichhaDna nasib tha

wo utni dur ho gaya jitna qarib tha

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua

aa.ī hogī kisī ko hijr meñ maut

mujh ko to niiñd bhī nahīñ aatī

aai hogi kisi ko hijr mein maut

mujh ko to nind bhi nahin aati

kuchh ḳhabar hai tujhe o chain se sone vaale

raat bhar kaun tirī yaad meñ bedār rahā

kuchh KHabar hai tujhe o chain se sone wale

raat bhar kaun teri yaad mein bedar raha

nayā ik rishta paidā kyuuñ kareñ ham

bichhaḌnā hai to jhagḌā kyuuñ kareñ ham

naya ek rishta paida kyun karen hum

bichhaDna hai to jhagDa kyun karen hum

kitnī lambī ḳhāmoshī se guzrā huuñ

un se kitnā kuchh kahne kī koshish kī

kitni lambi KHamoshi se guzra hun

un se kitna kuchh kahne ki koshish ki

badan meñ jaise lahū tāziyāna ho gayā hai

use gale se lagā.e zamāna ho gayā hai

badan mein jaise lahu taziyana ho gaya hai

use gale se lagae zamana ho gaya hai

us ko ruḳhsat to kiyā thā mujhe ma.alūm na thā

saarā ghar le gayā ghar chhoḌ ke jaane vaalā

us ko ruKHsat to kiya tha mujhe malum na tha

sara ghar le gaya ghar chhoD ke jaane wala

guzar to jā.egī tere baġhair bhī lekin

bahut udaas bahut be-qarār guzregī

guzar to jaegi tere baghair bhi lekin

bahut udas bahut be-qarar guzregi

judā.iyoñ ke zaḳhm dard-e-zindagī ne bhar diye

tujhe bhī niiñd aa ga.ī mujhe bhī sabr aa gayā

judaiyon ke zaKHm dard-e-zindagi ne bhar diye

tujhe bhi nind aa gai mujhe bhi sabr aa gaya

jis kī āñkhoñ meñ kaTī thiiñ sadiyāñ

us ne sadiyoñ kī judā.ī dī hai

jis ki aankhon mein kaTi thin sadiyan

us ne sadiyon ki judai di hai

yuuñ lage dost tirā mujh se ḳhafā ho jaanā

jis tarah phuul se ḳhushbū kā judā ho jaanā

yun lage dost tera mujh se KHafa ho jaana

jis tarah phul se KHushbu ka juda ho jaana

rote phirte haiñ saarī saarī raat

ab yahī rozgār hai apnā

rote phirte hain sari sari raat

ab yahi rozgar hai apna

vo TūTte hue rishtoñ kā husn-e-āḳhir thā

ki chup sī lag ga.ī donoñ ko baat karte hue

wo TuTte hue rishton ka husn-e-aKHir tha

ki chup si lag gai donon ko baat karte hue

aa ki tujh bin is tarah ai dost ghabrātā huuñ maiñ

jaise har shai meñ kisī shai kī kamī paatā huuñ maiñ

aa ki tujh bin is tarah ai dost ghabraata hun main

jaise har shai mein kisi shai ki kami pata hun main

maiñ ne samjhā thā ki lauT aate haiñ jaane vaale

tū ne jā kar to judā.ī mirī qismat kar dī

main ne samjha tha ki lauT aate hain jaane wale

tu ne ja kar to judai meri qismat kar di

is qadar musalsal thiiñ shiddateñ judā.ī kī

aaj pahlī baar us se maiñ ne bevafā.ī kī

is qadar musalsal thin shiddaten judai ki

aaj pahli bar us se main ne bewafai ki

thī vasl meñ bhī fikr-e-judā.ī tamām shab

vo aa.e to bhī niiñd na aa.ī tamām shab

thi wasl mein bhi fikr-e-judai tamam shab

wo aae to bhi nind na aai tamam shab

ye Thiik hai nahīñ martā koī judā.ī meñ

ḳhudā kisī ko kisī se magar judā na kare

ye Thik hai nahin marta koi judai mein

KHuda kisi ko kisi se magar juda na kare

mujh se bichhaḌ ke tū bhī to ro.egā umr bhar

ye soch le ki maiñ bhī tirī ḳhvāhishoñ meñ huuñ

mujh se bichhaD ke tu bhi to roega umr bhar

ye soch le ki main bhi teri KHwahishon mein hun

talāq de to rahe ho itāb-o-qahr ke saath

mirā shabāb bhī lauTā do merī mahr ke saath

talaq de to rahe ho itab-o-qahr ke sath

mera shabab bhi lauTa do meri mahr ke sath

mahīne vasl ke ghaḌiyoñ kī sūrat uḌte jaate haiñ

magar ghaḌiyāñ judā.ī kī guzartī haiñ mahīnoñ meñ

mahine wasl ke ghaDiyon ki surat uDte jate hain

magar ghaDiyan judai ki guzarti hain mahinon mein

har mulāqāt kā anjām judā.ī kyuuñ hai

ab to har vaqt yahī baat satātī hai hameñ

har mulaqat ka anjam judai kyun hai

ab to har waqt yahi baat satati hai hamein

bichhaḌ ga.e to ye dil umr bhar lagegā nahīñ

lagegā lagne lagā hai magar lagegā nahīñ

bichhaD gae to ye dil umr bhar lagega nahin

lagega lagne laga hai magar lagega nahin

judā kisī se kisī kā ġharaz habīb na ho

ye daaġh vo hai ki dushman ko bhī nasīb na ho

juda kisi se kisi ka gharaz habib na ho

ye dagh wo hai ki dushman ko bhi nasib na ho

to kyā sach-much judā.ī mujh se kar lī

to ḳhud apne ko aadhā kar liyā kyā

to kya sach-much judai mujh se kar li

to KHud apne ko aadha kar liya kya

vasl meñ rañg uḌ gayā merā

kyā judā.ī ko muñh dikhā.ūñgā

wasl mein rang uD gaya mera

kya judai ko munh dikhaunga

kaav kāv-e-saḳht-jānī hā.e-tanhā.ī na pūchh

sub.h karnā shaam kā laanā hai jū-e-shīr kā

kaw kaw-e-saKHt-jaani hae-tanhai na puchh

subh karna sham ka lana hai ju-e-shir ka

usī maqām pe kal mujh ko dekh kar tanhā

bahut udaas hue phuul bechne vaale

usi maqam pe kal mujh ko dekh kar tanha

bahut udas hue phul bechne wale

yaad hai ab tak tujh se bichhaḌne kī vo añdherī shaam mujhe

tū ḳhāmosh khaḌā thā lekin bāteñ kartā thā kājal

yaad hai ab tak tujh se bichhaDne ki wo andheri sham mujhe

tu KHamosh khaDa tha lekin baaten karta tha kajal

bichhaḌ ke tujh se na dekhā gayā kisī kā milāp

uḌā diye haiñ parinde shajar pe baiThe hue

bichhaD ke tujh se na dekha gaya kisi ka milap

uDa diye hain parinde shajar pe baiThe hue

mar jaatā huuñ jab ye sochtā huuñ

maiñ tere baġhair jī rahā huuñ

mar jata hun jab ye sochta hun

main tere baghair ji raha hun

mahsūs ho rahā hai ki maiñ ḳhud safar meñ huuñ

jis din se rail par maiñ tujhe chhoḌne gayā

mahsus ho raha hai ki main KHud safar mein hun

jis din se rail par main tujhe chhoDne gaya

ye ġham nahīñ hai ki ham donoñ ek ho na sake

ye rañj hai ki koī darmiyān meñ bhī na thā

ye gham nahin hai ki hum donon ek ho na sake

ye ranj hai ki koi darmiyan mein bhi na tha

firāq-e-yār ne bechain mujh ko raat bhar rakkhā

kabhī takiya idhar rakkhā kabhī takiya udhar rakkhā

firaq-e-yar ne bechain mujh ko raat bhar rakkha

kabhi takiya idhar rakkha kabhi takiya udhar rakkha

us se milne kī ḳhushī ba.ad meñ dukh detī hai

jashn ke ba.ad kā sannāTā bahut khaltā hai

us se milne ki KHushi baad mein dukh deti hai

jashn ke baad ka sannaTa bahut khalta hai

ābād mujh meñ tere sivā aur kaun hai?

tujh se bichhaḌ rahā huuñ tujhe kho nahīñ rahā

aabaad mujh mein tere siwa aur kaun hai?

tujh se bichhaD raha hun tujhe kho nahin raha

tujh se qismat meñ mirī sūrat-e-qufl-e-abjad

thā likhā baat ke bante hī judā ho jaanā

tujh se qismat mein meri surat-e-qufl-e-abjad

tha likha baat ke bante hi juda ho jaana

judā the ham to mayassar thiiñ qurbateñ kitnī

baham hue to paḌī haiñ judā.iyāñ kyā kyā

juda the hum to mayassar thin qurbaten kitni

baham hue to paDi hain judaiyan kya kya

shabān-e-hijrāñ darāz chuuñ zulf roz-e-vaslat chū umr kotāh

sakhī piyā ko jo maiñ na dekhūñ to kaise kāTūñ añdherī ratiyāñ

shaban-e-hijran daraaz chun zulf roz-e-waslat chu umr kotah

sakhi piya ko jo main na dekhun to kaise kaTun andheri ratiyan

tujh se bichhḌūñ to tirī zaat kā hissa ho jā.ūñ

jis se martā huuñ usī zahr se achchhā ho jā.ūñ

tujh se bichhDun to teri zat ka hissa ho jaun

jis se marta hun usi zahr se achchha ho jaun

us mehrbāñ nazar kī ināyat kā shukriya

tohfa diyā hai eid pe ham ko judā.ī kā

us mehrban nazar ki inayat ka shukriya

tohfa diya hai eid pe hum ko judai ka

tumheñ ḳhayāl nahīñ kis tarah batā.eñ tumheñ

ki saañs chaltī hai lekin udaas chaltī hai

tumhein KHayal nahin kis tarah bataen tumhein

ki sans chalti hai lekin udas chalti hai