Sher on Kirdar

us kī bhī mirī tarah thī ik apnī kahānī

us ko bhī nibhānā paḌā kirdār mujhe bhī

us ki bhi meri tarah thi ek apni kahani

us ko bhi nibhana paDa kirdar mujhe bhi

maiñ agar ḳhud ko maar Dālūñ to

kyā bachegā tirī kahānī meñ

main agar KHud ko mar Dalun to

kya bachega teri kahani mein

aayā koī sailāb kahānī meñ achānak

aur ghul ga.e paanī meñ vo kirdār namak ke

aaya koi sailab kahani mein achanak

aur ghul gae pani mein wo kirdar namak ke

ham pe ye raaz khulā bhī to bahut der ke baa'd

asl kirdār kahānī meñ kisī aur kā hai

hum pe ye raaz khula bhi to bahut der ke ba'd

asl kirdar kahani mein kisi aur ka hai

kisī bhī hashr se mahrūm hī rahā vo bhī

mirī tarah kā jo kirdār thā kahānī meñ

kisi bhi hashr se mahrum hi raha wo bhi

meri tarah ka jo kirdar tha kahani mein

kisī kī baat kisī ko batānā ġhībat hai

vagarna sab ke ravayye ḳhudā se keh detā

kisi ki baat kisi ko batana ghibat hai

wagarna sab ke rawayye KHuda se keh deta

sūrat-e-ādmī se kyā lenā

sīrat-e-ādmī kī baat kareñ

surat-e-admi se kya lena

sirat-e-admi ki baat karen