Sher on Sun

ye chāñd sā chehra hai ki sūraj kī kiran hai

zulfeñ haiñ tirī raat suhānī hai ki kyā hai

ye chand sa chehra hai ki suraj ki kiran hai

zulfen hain teri raat suhani hai ki kya hai

ufuq pe yādoñ ke zard āñchal meñ lipTā sūraj

aur us pe shāmoñ ke saath Dhaltī 'ajīb sī chup

ufuq pe yaadon ke zard aanchal mein lipTa suraj

aur us pe shamon ke sath Dhalti 'ajib si chup

aap ke shahr meñ sūraj to nikalne se rahā

ek mash.al hī mire haat meñ rahne diije

aap ke shahr mein suraj to nikalne se raha

ek mashal hi mere hat mein rahne dije

sūraj lahūluhān samundar meñ gir paḌā

din kā ġhurūr TuuT gayā shaam ho ga.ī

suraj lahuluhan samundar mein gir paDa

din ka ghurur TuT gaya sham ho gai

aao ab apne dhyān kā sūraj ugā.eñ ham

hai mai-kade meñ shor bapā shaam ho ga.ī

aao ab apne dhyan ka suraj ugaen hum

hai mai-kade mein shor bapa sham ho gai

siyāh rātoñ meñ har shai Dubo chukā huuñ magar

vo ek dard kā sūraj ki Dūbtā bhī nahīñ

siyah raaton mein har shai Dubo chuka hun magar

wo ek dard ka suraj ki Dubta bhi nahin

ye tāqchoñ meñ rakhe sab charāġh sūraj haiñ

agar vo chāñd sā chehra hamārā ho jaa.e

ye taqchon mein rakhe sab charagh suraj hain

agar wo chand sa chehra hamara ho jae