aaGaaz-e-bahaar

(1)

maiñ baiTh gayā sabza-e-gulzār par ik roz

murġhān-e-ḳhush-ilhāñ kī har ik taan thī dil-doz

kaifiyyat-e-dil aise meñ hotī hai junūñ-ḳhez

ban jaate haiñ jazbāt ḳhushī ke bhī ġham-angez

(2)

qudrat kī har ik chiiz meñ thā husn-e-dil-ārā

dil shaad huā dekh ke ye jalva-e-zebā

lekin ye zarā soch ke phir ho gayā nāshād

kar rakkhā hai insān ne insān ko barbād

(3)

thā jaal bichhā sumbul-e-pur-pech kā har-sū

the gardan-e-nargis meñ gul-e-zard ke baazū

hotā hai guzar baaġh se jab mauj-e-sabā kā

har phuul pe hotā hai asar us kī adā kā

(4)

murġhān-e-chaman gird mire khel rahe the

kyā jāniye kyā ḳhaas ḳhayālāt the un ke

haañ dil pe mire naqsh huī jaatī thī ye baat

sarshār haiñ sarmast haiñ murġhān-e-ḳhush-auqāt

(5)

ḳhvāhāñ thī karūñ bād-e-bahārī ki giraftār

pankhā sā banī jaatī thī har shāḳh-e-chaman-zār

rah rah ke tasavvur ye mire zehn meñ aayā

kyā lutf hai qudrat ke manāzir meñ ḳhudāyā

(6)

hai mere 'aqīde meñ agar koī sadāqat

aisā hī agar hai ye tarab-ḳhāna-e-qudrat

phir kyoñ na ho ye soch ke dil muztar-o-nāshād

insān ne kar rakkhā hai insān ko barbād

(1)

main baiTh gaya sabza-e-gulzar par ek roz

murghan-e-KHush-ilhan ki har ek tan thi dil-doz

kaifiyyat-e-dil aise mein hoti hai junun-KHez

ban jate hain jazbaat KHushi ke bhi gham-angez

(2)

qudrat ki har ek chiz mein tha husn-e-dil-ara

dil shad hua dekh ke ye jalwa-e-zeba

lekin ye zara soch ke phir ho gaya nashad

kar rakkha hai insan ne insan ko barbaad

(3)

tha jal bichha sumbul-e-pur-pech ka har-su

the gardan-e-nargis mein gul-e-zard ke bazu

hota hai guzar bagh se jab mauj-e-saba ka

har phul pe hota hai asar us ki ada ka

(4)

murghan-e-chaman gird mere khel rahe the

kya jaaniye kya KHas KHayalat the un ke

han dil pe mere naqsh hui jati thi ye baat

sarshaar hain sarmast hain murghan-e-KHush-auqat

(5)

KHwahan thi karun baad-e-bahaari ki giraftar

pankha sa bani jati thi har shaKH-e-chaman-zar

rah rah ke tasawwur ye mere zehn mein aaya

kya lutf hai qudrat ke manazir mein KHudaya

(6)

hai mere 'aqide mein agar koi sadaqat

aisa hi agar hai ye tarab-KHana-e-qudrat

phir kyon na ho ye soch ke dil muztar-o-nashad

insan ne kar rakkha hai insan ko barbaad