ai sanam kyaa mai.n Gam-e-'ishq kii tadbiir karuu.n

ai sanam kyā maiñ ġham-e-'ishq kī tadbīr karūñ

kab tak is tarh bhalā nāla-e-shab-gīr karūñ

dil-e-dīvāna nasīhat se kahāñ maane hai

kyoñ na zulfoñ meñ tirī is ko maiñ zanjīr karūñ

hijr meñ tere jo ġham maiñ ne uThā.e haihāt

sirf ik ḳhat meñ ye mumkin nahīñ tahrīr karūñ

terī zulfoñ ke sabab jitnī pareshānī hai

nahīñ mumkin ki bayāñ sūrat-e-taqrīr karūñ

jab bhī is dil meñ tirī diid kī ḳhvāhish jaage

rū-e-zebā ko tasavvur hī meñ tasvīr karūñ

gar ye jānūñ ki tire vasl kī hai shart yahī

dil-o-dīñ nazr karūñ aur ba-taufīr karūñ

us ke ġham se nahīñ imkān-e-rihā.ī 'hāfiz'

yahī qismat hai to phir kyā koī tadbīr karūñ

ai sanam kya main gham-e-'ishq ki tadbir karun

kab tak is tarh bhala nala-e-shab-gir karun

dil-e-diwana nasihat se kahan mane hai

kyon na zulfon mein teri is ko main zanjir karun

hijr mein tere jo gham main ne uThae haihat

sirf ek KHat mein ye mumkin nahin tahrir karun

teri zulfon ke sabab jitni pareshani hai

nahin mumkin ki bayan surat-e-taqrir karun

jab bhi is dil mein teri did ki KHwahish jage

ru-e-zeba ko tasawwur hi mein taswir karun

gar ye jaanun ki tere wasl ki hai shart yahi

dil-o-din nazr karun aur ba-taufir karun

us ke gham se nahin imkan-e-rihai 'hafiz'

yahi qismat hai to phir kya koi tadbir karun