baad-e-maGrib se KHitaab

(1)

hotā jo maiñ daraḳht kā pattā girā huā

uḌtā misāl-e-abr tire saath ai havā

ai kaash mauj ban ke tire saath rah sakūñ

parvāz kī jo tujh meñ hai tāqat vo baañT luuñ

maiñ bhī burī tarah hī sar-e-pur-ġhurūr huuñ

go tujh se kam huuñ phir bhī maiñ nāzāñ zarūr huuñ

ab ḳhatm ho chalī hai javānī kī dāstāñ

vo valvale vo zor na jaane ga.e kahāñ

hotā jo ab bhī josh ragoñ meñ shabāb kā

yuuñ bebasī meñ tujh se na kartā ye iltijā

ai bād-e-ġharb mujh ko zarā saath le ke chal

kāñToñ meñ phañs gayā huuñ mujhe haath de ke chal

maiñ dab gayā huuñ bār-e-ġham-e-rozgār se

tang aa gayā huuñ gardish-e-lail-o-nahār se

mujh ko uThā ki maiñ bhī tirā ham-shi'ār huuñ

ḳhud-sar huuñ tund-o-tez huuñ barq-o-sharār huuñ

(2)

ban kī tarah hai mujh meñ bhī pinhāñ navā-e-chang

donoñ pe chhā chukā hai agarche ḳhizāñ kā rang

ġham-āshnā kareñge tirī naġhmagī ko ham

naġhme kī chāshnī ko baḌhātā hai aur ġham

aa mujh se ham-kanār ho ai bād-e-tund-ḳhū

apnā banā mujhe bhī ki hai kārsāz tū

mere ḳhayāl saare jahāñ meñ bikher de

ik inqalāb aa.egā mere hī faiz se

ik aag sī lagā.ūñgā sehr-e-suḳhan se maiñ

ye she'r bhī dabī huī chingāriyāñ to haiñ

Duubī huī hai zulmat-e-shab meñ abhī fazā

ye pesh-goī so.e huoñ ko zarā sunā

go hai ḳhizāñ ke jaur se pāmāl zindagī

ummīd rakh ki aa.egī fasl-e-bahār bhī

(1)

hota jo main daraKHt ka patta gira hua

uDta misal-e-abr tere sath ai hawa

ai kash mauj ban ke tere sath rah sakun

parwaz ki jo tujh mein hai taqat wo banT lun

main bhi buri tarah hi sar-e-pur-ghurur hun

go tujh se kam hun phir bhi main nazan zarur hun

ab KHatm ho chali hai jawani ki dastan

wo walwale wo zor na jaane gae kahan

hota jo ab bhi josh ragon mein shabab ka

yun bebasi mein tujh se na karta ye iltija

ai baad-e-gharb mujh ko zara sath le ke chal

kanTon mein phans gaya hun mujhe hath de ke chal

main dab gaya hun bar-e-gham-e-rozgar se

tang aa gaya hun gardish-e-lail-o-nahaar se

mujh ko uTha ki main bhi tera ham-shi'ar hun

KHud-sar hun tund-o-tez hun barq-o-sharar hun

(2)

ban ki tarah hai mujh mein bhi pinhan nawa-e-chang

donon pe chha chuka hai agarche KHizan ka rang

gham-ashna karenge teri naghmagi ko hum

naghme ki chashni ko baDhata hai aur gham

aa mujh se ham-kanar ho ai baad-e-tund-KHu

apna bana mujhe bhi ki hai karsaz tu

mere KHayal sare jahan mein bikher de

ek inqalab aaega mere hi faiz se

ek aag si lagaunga sehr-e-suKHan se main

ye she'r bhi dabi hui chingariyan to hain

Dubi hui hai zulmat-e-shab mein abhi faza

ye pesh-goi soe huon ko zara suna

go hai KHizan ke jaur se pamal zindagi

ummid rakh ki aaegi fasl-e-bahaar bhi