bikharte katbe

(avval)

rag-o-pai meñ jakḌe hue jism ke us taraf

jis jagah āsmānoñ kī had se pare

ḳhvāb hī ḳhvāb hoñ

zehn jo nā-rasā hai

jahāñ dil kī duniyāoñ kā rāsta hai

kitnī tārīkiyoñ meñ hameñ

āftāboñ kā koī gumāñ tak nahīñ hai

mire jism ke post aur haDDiyoñ

se vare

ek pal hai ki jo

āsmānoñ kī jānib ga.e rāstoñ

ko milātā hai

(do.am)

muqayyad hue haiñ

ham ik aisī chāñdnī kī zanjīr meñ

jaise jismoñ meñ phailī rageñ

āsmāñ aur zamīñ

kitne betāb haiñ

aa.eñ ik dūsre se mileñ

āsmānoñ se nikle haiñ ham der se

aa.eñ phir ghar chaleñ

(som)

haDDiyāñ kab se paivast haiñ gosht meñ

aur phir us ghane jaal se ye nikal ā.eñgī

āsmānoñ se nīche utar kar faqat

rizq DhūñDā kiye tum

magar ḳhāk-o-ḳhūñ

har taraf hai

(chahārum)

zehn kī gutthiyoñ meñ ulajhtā huā

merā qalb-e-tapāñ

raat ke ġhaar meñ sūrajoñ kā gumāñ

āsmānoñ bahishtoñ kī socheñ

mirā jism pattoñ meñ bikhrā huā

ġham kī andhī guphā meñ

bahut der se maiñ paḌā huuñ

kahāñ jā.ūñ

rahbar huuñ maiñ

yā koī kārvāñ huuñ

(panjum)

ġham kī andhī guphā meñ

sarā.e meñ bistar pe tanhā

ga.e daur ke marqadoñ meñ

kahāñ jism haiñ

chand katbe haiñ bikhre hue

vaqt kab aa.egā

jism āzād hogā

(awwal)

rag-o-pai mein jakDe hue jism ke us taraf

jis jagah aasmanon ki had se pare

KHwab hi KHwab hon

zehn jo na-rasa hai

jahan dil ki duniyaon ka rasta hai

kitni tarikiyon mein hamein

aaftabon ka koi guman tak nahin hai

mere jism ke post aur haDDiyon

se ware

ek pal hai ki jo

aasmanon ki jaanib gae raston

ko milata hai

(doam)

muqayyad hue hain

hum ek aisi chandni ki zanjir mein

jaise jismon mein phaili ragen

aasman aur zamin

kitne betab hain

aaen ek dusre se milen

aasmanon se nikle hain hum der se

aaen phir ghar chalen

(som)

haDDiyan kab se paiwast hain gosht mein

aur phir us ghane jal se ye nikal aaengi

aasmanon se niche utar kar faqat

rizq DhunDa kiye tum

magar KHak-o-KHun

har taraf hai

(chahaarum)

zehn ki gutthiyon mein ulajhta hua

mera qalb-e-tapan

raat ke ghaar mein surajon ka guman

aasmanon bahishton ki sochen

mera jism patton mein bikhra hua

gham ki andhi gupha mein

bahut der se main paDa hun

kahan jaun

rahbar hun main

ya koi karwan hun

(panjum)

gham ki andhi gupha mein

sarae mein bistar pe tanha

gae daur ke marqadon mein

kahan jism hain

chand katbe hain bikhre hue

waqt kab aaega

jism aazad hoga