duniyaa

haa.e afsos hameñ jaan se duniyā hai 'azīz

raat din zar kī parastish meñ lage rahte haiñ

ham ko qudrat ke nazāroñ se zarā pyaar nahīñ

kitne bad-zauq haiñ paise ko ḳhudā kahte haiñ

bahr meñ chāñd kī kirnoñ kī jhalak kyā kahnā

kitnī pur-kaif bayābāñ kī havā hotī hai

jo ḳhushī miltī hai is gosha-e-tanhā.ī meñ

ruuh ke vāste jāñ-baḳhsh ġhizā hotī hai

haif-sad-haif hameñ in se zarā pyaar nahīñ

aisī kotāh-nigāhī pe to hairāñ huuñ maiñ

maiñ ne Thānī hai ki qudrat kī karūñgā puujā

ye agar kufr hai is kufr pe nāzāñ huuñ maiñ

maiñ jab āġhosh meñ fitrat kī chalā jā.ūñgā

zarre zarre se 'ayāñ nūr-e-ḳhudā pā.ūñgā

hae afsos hamein jaan se duniya hai 'aziz

raat din zar ki parastish mein lage rahte hain

hum ko qudrat ke nazaron se zara pyar nahin

kitne bad-zauq hain paise ko KHuda kahte hain

bahr mein chand ki kirnon ki jhalak kya kahna

kitni pur-kaif bayaban ki hawa hoti hai

jo KHushi milti hai is gosha-e-tanhai mein

ruh ke waste jaan-baKHsh ghiza hoti hai

haif-sad-haif hamein in se zara pyar nahin

aisi kotah-nigahi pe to hairan hun main

main ne Thani hai ki qudrat ki karunga puja

ye agar kufr hai is kufr pe nazan hun main

main jab aaghosh mein fitrat ki chala jaunga

zarre zarre se 'ayan nur-e-KHuda paunga