ehsaas

1

sardiyoñ kī is añdherī raat meñ

ai ḳhush-o-ḳhurram daraḳht

terī shāḳhoñ ko nahīñ ehsās kuchh

'ahd-e-rafta kī bahāreñ kyā huiiñ

mausam-e-sarmā kī tez-o-tar havā

terā kuchh nuqsān kar saktī nahīñ

barf-o-bārāñ kar nahīñ sakte tujhe ġham se niDhāl

dhuup chhāñv se tujhe hotā nahīñ hargiz malāl

2

sardiyoñ kī is añdherī raat meñ

mast-e-rāhat jūebār

tere paanī ko nahīñ ehsās kuchh

'ahd-e-rafta kī ravānī kyā huī

bhuul jaate haiñ tujhe maazī ke din

tere dil ko aah kuchh hotā nahīñ

shab kī tārīkī meñ terī ruuh ghabrātī nahīñ

tujh ko rah rah kar kisī kī yaad taḌpātī nahīñ

3

zindagī kī is añdherī raat meñ

kaash insāñ ko bhī mil jaatā qarār

aah ham ne aaj tak koī bashar dekhā nahīñ

jis kā siina ranj-o-ġham se ho na jaa.e dāġhdār

zindagī kī dhūp-chhāñv meñ jo yaksāñ rah sake

ranj-o-ġham dard-o-alam ko jo ḳhushī se sah sake

jis kā dil qaabū meñ ho begāna-e-ehsās ho

hasratoñ se be-ḳhabar nā-āshnā-e-yās ho

1

sardiyon ki is andheri raat mein

ai KHush-o-KHurram daraKHt

teri shaKHon ko nahin ehsas kuchh

'ahd-e-rafta ki bahaaren kya huin

mausam-e-sarma ki tez-o-tar hawa

tera kuchh nuqsan kar sakti nahin

barf-o-baran kar nahin sakte tujhe gham se niDhaal

dhup chhanw se tujhe hota nahin hargiz malal

2

sardiyon ki is andheri raat mein

mast-e-rahat juebar

tere pani ko nahin ehsas kuchh

'ahd-e-rafta ki rawani kya hui

bhul jate hain tujhe mazi ke din

tere dil ko aah kuchh hota nahin

shab ki tariki mein teri ruh ghabraati nahin

tujh ko rah rah kar kisi ki yaad taDpati nahin

3

zindagi ki is andheri raat mein

kash insan ko bhi mil jata qarar

aah hum ne aaj tak koi bashar dekha nahin

jis ka sina ranj-o-gham se ho na jae daghdar

zindagi ki dhup-chhanw mein jo yaksan rah sake

ranj-o-gham dard-o-alam ko jo KHushi se sah sake

jis ka dil qabu mein ho begana-e-ehsas ho

hasraton se be-KHabar na-ashna-e-yas ho