ek savaal

bhagvān tum ne jug jug meñ baar baar duut bheje haiñ

be-raham sansār meñ

vo kah ga.e sab ko mu'āf kar do kah ga.e pyaar karo

dil se dushmanī ke zahr ko nikāl kar use ḳhatm kar do

vo 'azīm haiñ yaad rakhne ke qābil haiñ vo phir bhī bāhar ke darvāze se

aaj bure dinoñ meñ unheñ lauTā diyā maiñ ne ek salām-e-rā.egāñ ke saath

maiñ ne dekhā ki tashaddud-e-pinhāñ ne shab-e-kīna ke saa.e meñ

bekas par hamla kiyā hai

maiñ ne dekhā hai tāqat-var shaḳhs ke nā-qābil-e-tadāruk jurm se

insāf kī āvāz chup-chāp tanhā.ī meñ rotī hai

maiñ ne dekhā naujavān bālak pāgaloñ kī tarah bhāgtā hai

kitne karb-o-dard sah kar jaan dī patthar par nāhaq sar paTak kar

merā galā aaj ruñdh gayā hai merī bāñsurī kā sañgīt aaj kho gayā hai

añdherī raat ke zindāñ ne

ġhā.eb kar diyā hai mere sansār ko bure ḳhvāb ke nīche dabā kar

isī liye to tum se pūchhtā huuñ āñkhoñ meñ aañsū bhar ke

jo log tumhārī havā ko zahrīlā banā rahe haiñ tumhārī raushnī ko bujhā rahe haiñ

tum ne kyā unheñ mu'āf kar diyā hai tum ne kyā unheñ pyaar kiyā hai

bhagwan tum ne jug jug mein bar bar dut bheje hain

be-raham sansar mein

wo kah gae sab ko mu'af kar do kah gae pyar karo

dil se dushmani ke zahr ko nikal kar use KHatm kar do

wo 'azim hain yaad rakhne ke qabil hain wo phir bhi bahar ke darwaze se

aaj bure dinon mein unhen lauTa diya main ne ek salam-e-raegan ke sath

main ne dekha ki tashaddud-e-pinhan ne shab-e-kina ke sae mein

bekas par hamla kiya hai

main ne dekha hai taqat-war shaKHs ke na-qabil-e-tadaruk jurm se

insaf ki aawaz chup-chap tanhai mein roti hai

main ne dekha naujawan baalak pagalon ki tarah bhagta hai

kitne karb-o-dard sah kar jaan di patthar par nahaq sar paTak kar

mera gala aaj rundh gaya hai meri bansuri ka sangit aaj kho gaya hai

andheri raat ke zindan ne

ghaeb kar diya hai mere sansar ko bure KHwab ke niche daba kar

isi liye to tum se puchhta hun aankhon mein aansu bhar ke

jo log tumhaari hawa ko zahrila bana rahe hain tumhaari raushni ko bujha rahe hain

tum ne kya unhen mu'af kar diya hai tum ne kya unhen pyar kiya hai