ek taviil nazm se iqtibaas

aadmī mahaz un āñtoñ kā naam nahīñ jo anaaj hazm kartī haiñ

aadmī apnī himmat-o-salāhiyat se

fitrat aur apnī haivāniyat par fat.h paatā hai

aadmī kā safar jaarī hai

añdhere se raushnī kī jānib

aadmī āzādī kī samt jā rahā hai

duniyā kī tāqat raushnī aur āzādī hai

aur shā.erī duniyā kā dil hai

vo ehsāsāt ko gahrā.iyāñ

aur jazbāt ko vus.ateñ detī hai

ḳhuun meñ se khile hamdardī ke phūloñ par lalchātī hai

vo nasḳh kartī hai

buzurgoñ kī ġhalatiyoñ kī kartūtoñ kī ḳhāmiyoñ kī

zavāl kī fat.h kī aur zulm kī tārīḳh

maiñ nazm likhne ke liye baiThā huuñ

jo kabhī mujhe chhoḌ kar chale ga.e the vo tamām alfāz bhī

aaj jhuTpuTe ke parindoñ kī tarah ikaTThe ho ga.e haiñ

maiñ tazabzub meñ mubtalā huuñ

taḌap rahā huuñ pasīne se tar-ba-tar ho rahā huuñ

dard-e-zeh mahsūs kar rahā huuñ

kyā kyā likkhūñ

kis kis tarah se likkhūñ

kis naam se likkhūñ

bhuuk ke baare meñ likkhūñ yā ġharībī ke baare meñ

kañgālī ke baare meñ likkhūñ yā ġhulāmī ke baare meñ

zulm ke baare meñ likkhūñ yā alam ke baare meñ

tahzīb

rasm-o-rivāj

pā.edān

devtā maz.hab aur patthar

un ke naam par unhoñ ne hameñ piiTā hai

rauñdā hai aur maar Daalā hai

hamārī haDDī aur gosht ko nochā

hamāre chehroñ ko masḳh kar Daalā hai

unhoñ ne hamāre ādamiyoñ ko zinda jalā diyā hai

unhoñ ne hamāre paak badan darūñ aur pahāḌoñ meñ saḌā Daale haiñ

unhoñne hameñ hamesha luuTā hai

hamāre nanhe-munnoñ ko qatl karāyā hai

hamārā zinda pākīza garm aur tez lahū

jo miTTī ke peT meñ bahāyā gayā

lekin miTTī ne hameñ garmāhaT nahīñ dī

ghoñT diye usī ne hamāre gale

ham ne sochā thā ki vo hameñ pā legī

ham ne sochā thā ki vo hameñ tāqat degī

us kaalī miTTī ne kālakh kā sahārā le kar

lakīr ke faqīroñ kī chāhat ke liye hameñ had se bāhar kar diyā

had se bāhar kar diyā granthoñ kī

had se bāhar kar diyā mandiroñ kī

had se bāhar kar diyā dāḳhle ke darvāzoñ kī

had se bāhar kar diyā jīte-jāgte insānoñ kī

aur de dī sanad puure maaTh maTkoñ ko sañbhālne kī

laash par phaile kafan ko oḌhne kī

hamārī daulat laash par se nichhāvar kī ga.ī ḳhairāt

hamārī paat lag jaatī thī kutte billiyoñ ke saath jūThan uThā.ī ke liye

majbūr kiyā thā unhoñ ne hameñ lauTne ko

mare hue Dhor gidh kī tarah

kutte billiyāñ gidh aur ham aadmī

palte rahe jānvaroñ ke saath

kyā aur kaise likhūñ

jis jangal meñ ḳhuun kā paanī bahā kar

ham ne peḌ paude lagā.e the

vo sab unhoñ ne noch Daale

ham ne sochā thā

kisī ne kisī din in peḌoñ kī ghanī mamtā-bharī chhāñv meñ baiTheñge

peḌoñ ke patte patte tak phailte jā.eñge

un kī oT meñ se mashriq kī surḳh samt phūTegī

aur hamāre diloñ kī andherī guphā.eñ

raushnī se bhar jā.eñgī

himmat baḌh jaane par hamāre siine tan jā.eñge

gardan parcham kī tarah ūñchī uTh jā.egī

aur ham āsmān ko bonā banāte hue

apne pairoñ par khaḌe raheñge

aur apne hāthoñ apnā mustaqbil kho deñge

jo satī kā barat le kar

nuur ke sindūr se bhar jā.egā

aadmi mahaz un aanton ka nam nahin jo anaj hazm karti hain

aadmi apni himmat-o-salahiyat se

fitrat aur apni haiwaniyat par fath pata hai

aadmi ka safar jari hai

andhere se raushni ki jaanib

aadmi aazadi ki samt ja raha hai

duniya ki taqat raushni aur aazadi hai

aur shaeri duniya ka dil hai

wo ehsasat ko gahraiyan

aur jazbaat ko wusaten deti hai

KHun mein se khile hamdardi ke phulon par lalchati hai

wo nasKH karti hai

buzurgon ki ghalatiyon ki kartuton ki KHamiyon ki

zawal ki fath ki aur zulm ki tariKH

main nazm likhne ke liye baiTha hun

jo kabhi mujhe chhoD kar chale gae the wo tamam alfaz bhi

aaj jhuTpuTe ke parindon ki tarah ikaTThe ho gae hain

main tazabzub mein mubtala hun

taDap raha hun pasine se tar-ba-tar ho raha hun

dard-e-zeh mahsus kar raha hun

kya kya likkhun

kis kis tarah se likkhun

kis nam se likkhun

bhuk ke bare mein likkhun ya gharibi ke bare mein

kangali ke bare mein likkhun ya ghulami ke bare mein

zulm ke bare mein likkhun ya alam ke bare mein

tahzib

rasm-o-riwaj

paedan

dewta mazhab aur patthar

un ke nam par unhon ne hamein piTa hai

raunda hai aur mar Dala hai

hamari haDDi aur gosht ko nocha

hamare chehron ko masKH kar Dala hai

unhon ne hamare aadamiyon ko zinda jala diya hai

unhon ne hamare pak badan darun aur pahaDon mein saDa Dale hain

unhonne hamein hamesha luTa hai

hamare nanhe-munnon ko qatl karaya hai

hamara zinda pakiza garm aur tez lahu

jo miTTi ke peT mein bahaya gaya

lekin miTTi ne hamein garmahaT nahin di

ghonT diye usi ne hamare gale

hum ne socha tha ki wo hamein pa legi

hum ne socha tha ki wo hamein taqat degi

us kali miTTi ne kalakh ka sahaara le kar

lakir ke faqiron ki chahat ke liye hamein had se bahar kar diya

had se bahar kar diya granthon ki

had se bahar kar diya mandiron ki

had se bahar kar diya daKHle ke darwazon ki

had se bahar kar diya jite-jagte insanon ki

aur de di sanad pure maTh maTkon ko sanbhaalne ki

lash par phaile kafan ko oDhne ki

hamari daulat lash par se nichhawar ki gai KHairaat

hamari pat lag jati thi kutte billiyon ke sath juThan uThai ke liye

majbur kiya tha unhon ne hamein lauTne ko

mare hue Dhor gidh ki tarah

kutte billiyan gidh aur hum aadmi

palte rahe jaanwaron ke sath

kya aur kaise likhun

jis jangal mein KHun ka pani baha kar

hum ne peD paude lagae the

wo sab unhon ne noch Dale

hum ne socha tha

kisi ne kisi din in peDon ki ghani mamta-bhari chhanw mein baiThenge

peDon ke patte patte tak phailte jaenge

un ki oT mein se mashriq ki surKH samt phuTegi

aur hamare dilon ki andheri guphaen

raushni se bhar jaengi

himmat baDh jaane par hamare sine tan jaenge

gardan parcham ki tarah unchi uTh jaegi

aur hum aasman ko bona banate hue

apne pairon par khaDe rahenge

aur apne hathon apna mustaqbil kho denge

jo sati ka barat le kar

nur ke sindur se bhar jaega