gahraa niilaa dariyaa

kis ko mā'lūm hai ye kahāñ hai

hameñ kuchh ḳhabar hī nahīñ ye kahāñ hai

magar phir bhī mā'lūm hai

ye pahāḌoñ ke pīchhe

ka.ī vādiyoñ se vare

saat aur aaTh se bhī pare

talḳh yādeñ liye

thakte qadmoñ

ga.e din kī

pāgal sī yādeñ liye

jhāḌiyoñ aur daraḳhtoñ kī chhāñv ke us paar

ālām aur qaht ke ġham-zada din kī mānind

dukhte diloñ aur tashkīk ke maare zehnoñ se baḌh kar

dukhī

is zamīñ kī tahoñ meñ bahut duur nīche

kabhī āsmānoñ ke us paar

aa.eñ ki dekheñ

ki murġh-e-sahar kī azaañ

horn bajtā na ho jis jagah par

junūñ bhī udāsī bhī

aur zehn kī kāvishoñ se pare

apne ḳhāliq se bāġhī hue

aa.eñ dekheñ

ki ye gahrā niilā sā dariyā

jo gahrā bhī hai

aur chauḌā bhī hai

ek sau saal chauḌā hai

gahrā.ī meñ

mausamoñ kī ruteñ

jab hazāroñ kaTeñ

is kī lambā.ī meñ

kitnī gambhīr gahrā.iyāñ haiñ

ye gahrā sā niilā sā dariyā hai

jis se guzarnā

hamāre muqaddar meñ likhā huā hai

kis ko ma'lum hai ye kahan hai

hamein kuchh KHabar hi nahin ye kahan hai

magar phir bhi ma'lum hai

ye pahaDon ke pichhe

kai wadiyon se ware

sat aur aaTh se bhi pare

talKH yaaden liye

thakte qadmon

gae din ki

pagal si yaaden liye

jhaDiyon aur daraKHton ki chhanw ke us par

aalam aur qaht ke gham-zada din ki manind

dukhte dilon aur tashkik ke mare zehnon se baDh kar

dukhi

is zamin ki tahon mein bahut dur niche

kabhi aasmanon ke us par

aaen ki dekhen

ki murgh-e-sahar ki azan

horn bajta na ho jis jagah par

junun bhi udasi bhi

aur zehn ki kawishon se pare

apne KHaliq se baghi hue

aaen dekhen

ki ye gahra nila sa dariya

jo gahra bhi hai

aur chauDa bhi hai

ek sau sal chauDa hai

gahrai mein

mausamon ki ruten

jab hazaron kaTen

is ki lambai mein

kitni gambhir gahraiyan hain

ye gahra sa nila sa dariya hai

jis se guzarna

hamare muqaddar mein likha hua hai