gidh

har nukkaḌ par pur-kashish mauqoñ kī

tum sajāte ho kāmyāb dukāneñ

mufāhamat ke taar par chalte hue zindagī ko sañbhālte vaqt

tumhāre be-ġhairat qadam Dagmagāte nahīñ

is chahal-pahal aur bhiiḌ meñ tumhārī āñkhoñ ke us paar tumhāre ifrīt

tumhāre reza-reza vajūd ko uThā.e phirte haiñ

'azāboñ se bharī ḳhār-dār tanhā.ī

pata hī nahīñ chaltā tumheñ ki kab kho ga.e chehre tumhāre

tum to jiye jaate ho gardan par chaḌhā.e hue kāmyābī ke mukhoToñ ke sahāre

ek pal bhī aisā nahīñ jise tum ne boyā ho

tum to har pal ke luTere ho dalāl ho

tumhāre liye kirā.e ke giit gaa.e jaate haiñ

tumhārī ḳhātir kirā.e ke hoñT sharmāte haiñ

kāmyāb chakloñ ke tāqat-var Thekedāro

isī tarah jiite ho tum mafādāt ke moTe moTe gaddoñ par

saste qism ke tez itr ke tahzībī phāhe kānoñ meñ Thūñs kar

mujhe nazar aa rahe haiñ tum par āñkheñ gaḌā.e hue

giddhoñ ke fāqa-zada jhunD pahāḌī ke us paar baiThe ghaat lagā.e hue

har nukkaD par pur-kashish mauqon ki

tum sajate ho kaamyab dukanen

mufahamat ke tar par chalte hue zindagi ko sanbhaalte waqt

tumhaare be-ghairat qadam Dagmagate nahin

is chahal-pahal aur bhiD mein tumhaari aankhon ke us par tumhaare ifrit

tumhaare reza-reza wajud ko uThae phirte hain

'azabon se bhari KHar-dar tanhai

pata hi nahin chalta tumhein ki kab kho gae chehre tumhaare

tum to jiye jate ho gardan par chaDhae hue kaamyabi ke mukhoTon ke sahaare

ek pal bhi aisa nahin jise tum ne boya ho

tum to har pal ke luTere ho dalal ho

tumhaare liye kirae ke git gae jate hain

tumhaari KHatir kirae ke honT sharmate hain

kaamyab chaklon ke taqat-war Thekedaro

isi tarah jite ho tum mafadat ke moTe moTe gaddon par

saste qism ke tez itr ke tahzibi phahe kanon mein Thuns kar

mujhe nazar aa rahe hain tum par aankhen gaDae hue

giddhon ke faqa-zada jhunD pahaDi ke us par baiThe ghat lagae hue