gum-shuda

baa'd is dīvāngī ke

kar nahīñ saktī huuñ bāvar

ab maiñ 'āqil ho ga.ī huuñ

is tarah vo mar gayā hai mere andar

ḳhasta-o-ḳhāmosh-o-bātil ho ga.ī huuñ

pūchhtī huuñ aa.ine se har ghaḌī

kaun hai terī nazar meñ kaun hai ye dūsrī

ā.īna kahtā hai lekin

jo maiñ thī ab us kā saaya bhī nahīñ

misl us raqqāsa-e-hindī ke sau sau naaz se

raqs kartī huuñ pa apnī qabr par

aah bā-sad hasrat is vīrāne meñ

raushnī kartī huuñ apnī zaat se

shahr kī jānib nahīñ jaatī kabhī

gor meñ sotī huuñ apnī be-gumāñ

dil meñ hai gauhar magar ik ḳhauf se

kar diyā hai us ko daldal meñ nihāñ

jā rahī huuñ ḳhud se pūchhā tak nahīñ

rah kahāñ manzil kahāñ maqsūd kaun

bose detī huuñ magar ġhāfil huuñ ḳhud

is dil-e-dīvāna kā mā'būd kaun

mar gayā vo mere andar aur phir

jo kuchh ki thā

merī nazroñ meñ badal kar rah gayā

raat ke ThiThure hue hāthoñ ne merī ruuh ko

qaid goyā kar liyā

haañ ye maiñ huuñ maiñ magar kyā fā.eda

vo jo mujh meñ thā nahīñ baaqī rahā

pūchhtī huuñ zer-e-lab dīvāna-vār

vo ki mujh meñ thā

vo āḳhir kaun thā

ba'd is diwangi ke

kar nahin sakti hun bawar

ab main 'aqil ho gai hun

is tarah wo mar gaya hai mere andar

KHasta-o-KHamosh-o-baatil ho gai hun

puchhti hun aaine se har ghaDi

kaun hai teri nazar mein kaun hai ye dusri

aaina kahta hai lekin

jo main thi ab us ka saya bhi nahin

misl us raqqasa-e-hindi ke sau sau naz se

raqs karti hun pa apni qabr par

aah ba-sad hasrat is virane mein

raushni karti hun apni zat se

shahr ki jaanib nahin jati kabhi

gor mein soti hun apni be-guman

dil mein hai gauhar magar ek KHauf se

kar diya hai us ko daldal mein nihan

ja rahi hun KHud se puchha tak nahin

rah kahan manzil kahan maqsud kaun

bose deti hun magar ghafil hun KHud

is dil-e-diwana ka ma'bud kaun

mar gaya wo mere andar aur phir

jo kuchh ki tha

meri nazron mein badal kar rah gaya

raat ke ThiThure hue hathon ne meri ruh ko

qaid goya kar liya

han ye main hun main magar kya faeda

wo jo mujh mein tha nahin baqi raha

puchhti hun zer-e-lab diwana-war

wo ki mujh mein tha

wo aaKHir kaun tha