kashtii

merā chehra udaas

aur merī kashtī rabtī par

rabtī par baiThī huī ye kashtī liye

maiñ pukār rahā huuñ

us ne mujhe kisī 'azāb se niDhāl

yahāñ lā Daalā hai is sunsān kināre par

is pur-haul rāste meñ

aur yahāñ fāsla paanī hai

merī madad karo ai dosto

lekin un ke tamasḳhur ke phuul khil uThe haiñ

vo mujh par hañs rahe haiñ

merī kashtī par jis kī hālat chandāñ achchhī nahīñ

merī bātoñ par jin kā koī sar pair nahīñ

aur mere iztirāb par jo had se baḌh gayā hai

apne is iztirāb meñ jo had se baḌh rahā hai

mere dil se fariyād uTh rahī hai

maut ke vaqt aur maut ke andar

fanā hone ke ḳhauf-o-ḳhatar ke sivā kuchh nahīñ

hast-o-būd kā masḳhara-pan bāzārī-pan

aur shor-o-ġhauġhā mahaz bhuul hai

aur is bhuul meñ zarar ke sivā kuchh nahīñ

maiñ tumhārī is bhuul ke saath ḳhud bhī bhūltā jā rahā huuñ

aur tumhārī hausla-shikanī bātoñ kā dukh sah rahā huuñ

mere dukhoñ se lahū bahne lagā hai

maiñ is paanī ko kaise ḳhushk karūñ kaise

meñ fariyād kar rahā huuñ

merā chehra udaas hai

merī kashtī ḳhushkī par baiTh ga.ī hai

merī bātoñ kā matlab tum par raushan hai

ek haath se taalī nahīñ bajtī

maiñ merā haath tumhāre haath se madad kā tālib hai

merī fariyād mere gale meñ aTak ga.ī ho

yā duur tak pahuñch rahī ho

maiñ tumhārī or najāt kī ḳhātir fariyād kar rahā huuñ

fariyād kar rahā huuñ

mera chehra udas

aur meri kashti rabti par

rabti par baiThi hui ye kashti liye

main pukar raha hun

us ne mujhe kisi 'azab se niDhaal

yahan la Dala hai is sunsan kinare par

is pur-haul raste mein

aur yahan fasla pani hai

meri madad karo ai dosto

lekin un ke tamasKHur ke phul khil uThe hain

wo mujh par hans rahe hain

meri kashti par jis ki haalat chandan achchhi nahin

meri baaton par jin ka koi sar pair nahin

aur mere iztirab par jo had se baDh gaya hai

apne is iztirab mein jo had se baDh raha hai

mere dil se fariyaad uTh rahi hai

maut ke waqt aur maut ke andar

fana hone ke KHauf-o-KHatar ke siwa kuchh nahin

hast-o-bud ka masKHara-pan bazari-pan

aur shor-o-ghaugha mahaz bhul hai

aur is bhul mein zarar ke siwa kuchh nahin

main tumhaari is bhul ke sath KHud bhi bhulta ja raha hun

aur tumhaari hausla-shikani baaton ka dukh sah raha hun

mere dukhon se lahu bahne laga hai

main is pani ko kaise KHushk karun kaise

mein fariyaad kar raha hun

mera chehra udas hai

meri kashti KHushki par baiTh gai hai

meri baaton ka matlab tum par raushan hai

ek hath se tali nahin bajti

main mera hath tumhaare hath se madad ka talib hai

meri fariyaad mere gale mein aTak gai ho

ya dur tak pahunch rahi ho

main tumhaari or najat ki KHatir fariyaad kar raha hun

fariyaad kar raha hun