mai-kade me.n ek shaKHs

mai-kade meñ maiñ ne dekhā ek shaḳhs

raakh kā ham-rang jis kā rang thā

aur

hoñToñ par hañsī be-kaif sī

faq thā chehra

donoñ āñkheñ thiiñ savāloñ ke nishāñ

haath meñ thāme thā vo jām-e-sharāb

ik 'adad zaitūn thā jis meñ paḌā

jām-e-mai lab se lagāyā tak nahīñ

haañ magar zaitūn ko us ne hilāyā baar baar

haañ magar zaitūn ko us ne ghumāyā baar baar

gardish-e-zaitūn ke manzar meñ vo Duubā huā

ghūrtā thā jaam ko kuchh is tarah

jaise us ke kul savāloñ ke javāb

jaam kī tah se ubhar kar ā.eñge

mil sakā us ko na koī bhī javāb

uTh rahe the nit na.e lākhoñ savāl

saañp sā bal khā ke saath haibat ke vo pīchhe haTā

jaise us kā jaam thā tanhā.iyoñ kā aa.ina

maiñ ye hālat dekh kar Dar se sikuḌ kar rah gayā

Dar lagā us shaḳhs kī nisbat 'ajab sā Dar lagā

aur kuchh apne ta'alluq se laraz kar rah gayā

uf na pūchho ḳhauf mujh par kis qadar taarī huā

mai-kade mein main ne dekha ek shaKHs

rakh ka ham-rang jis ka rang tha

aur

honTon par hansi be-kaif si

faq tha chehra

donon aankhen thin sawalon ke nishan

hath mein thame tha wo jam-e-sharab

ek 'adad zaitun tha jis mein paDa

jam-e-mai lab se lagaya tak nahin

han magar zaitun ko us ne hilaya bar bar

han magar zaitun ko us ne ghumaya bar bar

gardish-e-zaitun ke manzar mein wo Duba hua

ghurta tha jam ko kuchh is tarah

jaise us ke kul sawalon ke jawab

jam ki tah se ubhar kar aaenge

mil saka us ko na koi bhi jawab

uTh rahe the nit nae lakhon sawal

sanp sa bal kha ke sath haibat ke wo pichhe haTa

jaise us ka jam tha tanhaiyon ka aaina

main ye haalat dekh kar Dar se sikuD kar rah gaya

Dar laga us shaKHs ki nisbat 'ajab sa Dar laga

aur kuchh apne ta'alluq se laraz kar rah gaya

uf na puchho KHauf mujh par kis qadar tari hua