phir vo yuusuf gum-shuda lauTegaa kan'aa.n Gam na kar

phir vo yūsuf gum-shuda lauTegā kan'āñ ġham na kar

hogā phir mātam-kada ik din gulistāñ ġham na kar

ai fasurda qalb sab kuchh Thiik hogā rakh umiid

ai sar āshufta baham phir hogā sāmāñ ġham na kar

meherbāñ do din nahīñ ye āsmāñ to kyā huā

ek sā rahtā nahīñ hai rang-e-daurāñ ġham na kar

haar mat himmat tū sirr-e-ġhaib se vāqif nahīñ

hai pas-e-parda abhī kuchh aur pinhāñ ġham na kar

darpa.e-jāñ hai ye sailāb-e-fanā ai dil to kyā

nuuh terā nāḳhudā hai kaisā tūfāñ ġham na kar

shauq-e-kā'ba meñ qadam sahrā meñ jab rakh hī diyā

laakh talvoñ meñ chubheñ ḳhār-e-muġhīlāñ ġham na kar

koī hujra ho ki 'hāfiz' ḳhalvat-e-tīra-shabī

vird jab tak hai du'ā-o-dars-e-qur.āñ ġham na kar

phir wo yusuf gum-shuda lauTega kan'an gham na kar

hoga phir matam-kada ek din gulistan gham na kar

ai fasurda qalb sab kuchh Thik hoga rakh umid

ai sar aashufta baham phir hoga saman gham na kar

meherban do din nahin ye aasman to kya hua

ek sa rahta nahin hai rang-e-dauran gham na kar

haar mat himmat tu sirr-e-ghaib se waqif nahin

hai pas-e-parda abhi kuchh aur pinhan gham na kar

darpae-jaan hai ye sailab-e-fana ai dil to kya

nuh tera naKHuda hai kaisa tufan gham na kar

shauq-e-ka'ba mein qadam sahra mein jab rakh hi diya

lakh talwon mein chubhen KHar-e-mughilan gham na kar

koi hujra ho ki 'hafiz' KHalwat-e-tira-shabi

wird jab tak hai du'a-o-dars-e-quran gham na kar