sabiil

lagā hī lī hai magar maiñ ne ḳhushk-sālī meñ

sabīl tere liye ai thake hue raahī

talāsh-e-āb meñ phirtā rahā huuñ āvāra

huī hai tab kahīñ tayyār ye sabīl mirī

jahāñ bhī mujh ko dikhā.ī diyā koī chashma

jahāñ bhī aañkh ko aa.ī nazar koī naddī

vahīñ se bhar ke maiñ le aaya apnā mashkīza

hazār-rang hai merī sabīl ka paanī

yahī hai merī tamanna ki apne paanī se

bujhā.ūñ pyaas maiñ is tez dhuup meñ terī

Thahar ke raah meñ merī sabīl ka paanī

maiñ chāhtā huuñ bas itnā ki terī pyaas bujhe

ye aarzū hai ki ho jaa.e terī sairābī

tire thake hue qadmoñ meñ tāzgī aa jaa.e

nasīb tujh ko safar ke liye ho taab na.ī

tū aage baḌhte hue mujh ko jo duā degā

mirī hayāt ka hāsil vahī duā hogī

sabīl maiñ ne ye tere liye lagā.ī hai

sabīl maiñ ne ye sab ke liye lagā.ī hai

nahīñ hai farq yahāñ zaat aur maz.hab ka

laga hi li hai magar main ne KHushk-sali mein

sabil tere liye ai thake hue rahi

talash-e-ab mein phirta raha hun aawara

hui hai tab kahin tayyar ye sabil meri

jahan bhi mujh ko dikhai diya koi chashma

jahan bhi aankh ko aai nazar koi naddi

wahin se bhar ke main le aaya apna mashkiza

hazar-rang hai meri sabil ka pani

yahi hai meri tamanna ki apne pani se

bujhaun pyas main is tez dhup mein teri

Thahar ke rah mein meri sabil ka pani

main chahta hun bas itna ki teri pyas bujhe

ye aarzu hai ki ho jae teri sairabi

tere thake hue qadmon mein tazgi aa jae

nasib tujh ko safar ke liye ho tab nai

tu aage baDhte hue mujh ko jo dua dega

meri hayat ka hasil wahi dua hogi

sabil main ne ye tere liye lagai hai

sabil main ne ye sab ke liye lagai hai

nahin hai farq yahan zat aur mazhab ka