tum

tum mujhe pasand isī liye kuchh kuchh

duur rahtā huuñ tum se duur hī se

rang dikhā.ī dete haiñ tumhāre ehsās hotā hai tumhāre hone kā

samajh saktā huuñ tumheñ behtar tarīqe par cinema kī gut.tham gutthā qatāreñ

dekh kar ġhussa nahīñ aatā ek sīlan bharī kholī meñ

fōtpath par daftar ke saḌe hue bil meñ

kyā kare koī is se to film hī behtar hai

gudāz sīnoñ vaalī adākāra achchhī lagtī hai scrēn par

is ke baa'd biivī bhī achchhī lagtī hai ghar par

tum rote ho ḳhush hote ho shādī karte ho

bachche paidā karte ho taqrīboñ meñ jaate ho qabristānoñ meñ jaate ho

ThasāThas bharī local train meñ rummy khelte ho fōtboard par

thak kar bahas karte ho siyāsī mauzuāt par

'ishq karte ho kabhī kabhī sidq-e-dil se

pyaar yā'nī bosa-bāzī bhī karte ho khul kar

morche nikālte ho nā're lagāte ho magar

ḳhushk nahīñ hotā tumhārā galā kisī lamhe bhī

chane chabāte ho goliyāñ khāte ho shahīd hote ho

phir tumhārī yādgāroñ par

kavve biiT karte haiñ aur kāmyāb siyāsī netā

haar chaḌhāte haiñ tumheñ chunāv se pahle

tum jeb kāTte ho bhāshan sunte ho

hukūmat aur sharāb ke aDDe chalāte ho mandir jaate ho

chāqū dikhāte ho boycott karte ho lafḌe karte ho

tumhāre paas aatmā qayāsāt-o-nazariyāt ke

kūlhoñ par laat mārne vaalī aatmā

tum bahte chale jaate ho musalsal bahte rahte ho

raftār ulTī sīdhī uupar nīche aaḌī tirchhī raftār

karnā hogā hogā honā hī hogā

sochne kā bhī vaqt nahīñ pas lagātār jiite rahte ho

tumhārī nasleñ dafan ho jaatī haiñ yahī tumhārī rivāyat hai

tum daadā ho galī se lekar dillī tak ke

tum vote dete ho saḌak par peshāb karte ho

tumheñ baavā bhī chāhiye aur bevḌā bhī

aur phir tum hī us kī jayantī manāte ho

bhūke nāḳhunoñ se noch lete ho

vo saare sapne jo mahātmāoñ ne tumhārī ḳhātir dekhe the

aur jab tumhārī biivī bachcha jantī hai

tab tum be-qarārī se Tahalte ho

intizār karte ho ek 'ajīb bechainī ke saath

ek na.ī nannhī sī aane vaalī duniyā kā

aur jab laal miTī bhare Tiin ke zañg-ḳhurda Dibboñ ko

tum gamloñ kī sūrat laTkāte ho

un meñ phuul ugāte ho tab tum aise lagte ho

jaise chehroñ kā ek gahrā be-ant sāgar

jaise ek dhaḌaktā huā dil bahut hī vishāl

aise bharpūrpan meñ apnī vishāltā tum ḳhud ho

tab mujhe miltā hai apnā bharpūr ādamiyoñ

tumhāre vajūd kā ehsās karte hue apne lahū meñ

tumhārepan kī kokh meñ paltā huā mahsūs hotā hai mujhe

merāpan aur ruuh meñ utar jaane vaale mere naġhme

tum mujhe pasand isi liye kuchh kuchh

dur rahta hun tum se dur hi se

rang dikhai dete hain tumhaare ehsas hota hai tumhaare hone ka

samajh sakta hun tumhein behtar tariqe par cinema ki guttham guttha qataren

dekh kar ghussa nahin aata ek silan bhari kholi mein

footpath par daftar ke saDe hue bil mein

kya kare koi is se to film hi behtar hai

gudaz sinon wali adakara achchhi lagti hai screen par

is ke ba'd biwi bhi achchhi lagti hai ghar par

tum rote ho KHush hote ho shadi karte ho

bachche paida karte ho taqribon mein jate ho qabristanon mein jate ho

ThasaThas bhari local train mein rummy khelte ho footboard par

thak kar bahas karte ho siyasi mauzuat par

'ishq karte ho kabhi kabhi sidq-e-dil se

pyar ya'ni bosa-bazi bhi karte ho khul kar

morche nikalte ho na're lagate ho magar

KHushk nahin hota tumhaara gala kisi lamhe bhi

chane chabaate ho goliyan khate ho shahid hote ho

phir tumhaari yaadgaron par

kawwe biT karte hain aur kaamyab siyasi neta

haar chaDhate hain tumhein chunaw se pahle

tum jeb kaTte ho bhashan sunte ho

hukumat aur sharab ke aDDe chalate ho mandir jate ho

chaqu dikhate ho boycott karte ho lafDe karte ho

tumhaare pas aatma qayasat-o-nazariyat ke

kulhon par lat marne wali aatma

tum bahte chale jate ho musalsal bahte rahte ho

raftar ulTi sidhi upar niche aaDi tirchhi raftar

karna hoga hoga hona hi hoga

sochne ka bhi waqt nahin pas lagatar jite rahte ho

tumhaari naslen dafan ho jati hain yahi tumhaari riwayat hai

tum dada ho gali se lekar dilli tak ke

tum wote dete ho saDak par peshab karte ho

tumhein bawa bhi chahiye aur bewDa bhi

aur phir tum hi us ki jayanti manate ho

bhuke naKHunon se noch lete ho

wo sare sapne jo mahatmaon ne tumhaari KHatir dekhe the

aur jab tumhaari biwi bachcha janti hai

tab tum be-qarari se Tahalte ho

intizar karte ho ek 'ajib bechaini ke sath

ek nai nannhi si aane wali duniya ka

aur jab lal miTi bhare Tin ke zang-KHurda Dibbon ko

tum gamlon ki surat laTkate ho

un mein phul ugate ho tab tum aise lagte ho

jaise chehron ka ek gahra be-ant sagar

jaise ek dhaDakta hua dil bahut hi wishaal

aise bharpurpan mein apni wishaalta tum KHud ho

tab mujhe milta hai apna bharpur aadamiyon

tumhaare wajud ka ehsas karte hue apne lahu mein

tumhaarepan ki kokh mein palta hua mahsus hota hai mujhe

merapan aur ruh mein utar jaane wale mere naghme