zindagii

zindagī zindagī ye maiñ huuñ hanūz

sar-ba-sar tujh se aaj tak labrez

na ye sochā ki rishte paara karūñ

na ye chāhā karūñ maiñ tujh se gurez

saare zarrāt jism-e-ḳhākī ke

ai mire she'r-e-garm tujh se Dhale

jis tarah bādaloñ se paak falak

bāda-e-roz se labālab hai

an-ginat koñpaloñ se chheḌtā hai

būta-e-nastaran surūd tirā

baaġh meñ jab havā.eñ chaltī haiñ

us ko pahuñchātī haiñ durūd tirā

maiñ ne tujh ko tujhī meñ DhūñDā hai

kisī ḳhvāb-o-ḳhayāl meñ tū nahīñ

maiñ Dhalī tere saḳht hāthoñ se

dekh le merī shān-e-zebā.ī

mujh meñ haiñ an-ginat tarāne siyāh

mujh meñ haiñ an-ginat tarāne sapīd

haiñ hazāroñ sharāra-hā-e-niyāz

aur hazāroñ sitārgān-e-umīd

haif us roz par ki ġhusse meñ

tujh pe Daalī thī dushmanī kī nazar

jab ki jaanā tirā fareb fuzūl

thak ga.ī tujh se kar rahī thī hazar

ġhāfil is se ki tū to qaa.em hai

maiñ guzartī huuñ misl-e-āb-e-ravāñ

maiñ ġhubār-e-zavāl meñ Dhaltī

rah-e-tārīk-e-marg par huuñ davāñ

aah ai zindagī maiñ aa.ina huuñ

merī āñkhoñ meñ hai tujhī se nigāh

varna gar marg mujh pe Daale nazar

kyoñ na fauran ye aa.ina ho siyāh

'ishq hai sub.h ke sitāre se

uḌte bādal se 'ishq hai mujh ko

mujh ko bārish se 'ishq hai aur har

aisī shai se jo tere naam pe ho

zindagi zindagi ye main hun hanuz

sar-ba-sar tujh se aaj tak labrez

na ye socha ki rishte para karun

na ye chaha karun main tujh se gurez

sare zarraat jism-e-KHaki ke

ai mere she'r-e-garm tujh se Dhale

jis tarah baadalon se pak falak

baada-e-roz se labaalab hai

an-ginat konpalon se chheDta hai

buta-e-nastaran surud tera

bagh mein jab hawaen chalti hain

us ko pahunchati hain durud tera

main ne tujh ko tujhi mein DhunDa hai

kisi KHwab-o-KHayal mein tu nahin

main Dhali tere saKHt hathon se

dekh le meri shan-e-zebai

mujh mein hain an-ginat tarane siyah

mujh mein hain an-ginat tarane sapid

hain hazaron sharara-ha-e-niyaz

aur hazaron sitargan-e-umid

haif us roz par ki ghusse mein

tujh pe Dali thi dushmani ki nazar

jab ki jaana tera fareb fuzul

thak gai tujh se kar rahi thi hazar

ghafil is se ki tu to qaem hai

main guzarti hun misl-e-ab-e-rawan

main ghubar-e-zawal mein Dhalti

rah-e-tarik-e-marg par hun dawan

aah ai zindagi main aaina hun

meri aankhon mein hai tujhi se nigah

warna gar marg mujh pe Dale nazar

kyon na fauran ye aaina ho siyah

'ishq hai subh ke sitare se

uDte baadal se 'ishq hai mujh ko

mujh ko barish se 'ishq hai aur har

aisi shai se jo tere nam pe ho