حضرت غمگینؔ دہلوی اسمِ گرامی میر سید علی، تخلص غمگینؔ، معروف حضرت جی۔  اپنے دور کے ایک جید عالم، باکمال شاعر اور سلسلۂ قادریہ، چشتیہ، نقشبندیہ اور ابوالعلائیہ کے معتمد صوفی ہوئے ہیں۔ اردو زبان کی ارتقاء میں ہندوستان کے صوفی حضرات نے اہمیت کے حامل جو کارنامے انجام دیئے ہیں وہ کسی تعارف کے محتاج نہیں۔ علامہ محمد حسین آزادؔ  دیباچۂ دیوانِ ذوق اور معلوماتی تصنیف ”آبِ حیات“ کے مطابق شیخ ابراہیم ذوق اور نواب الٰہی بخش خاں معروف حضرت غمگینؔ سے مشورۂ سخن کیا کرتے تھے، مرزا اسد اللہ خان غالبؔ نے تو حضرت غمگینؔ کو اُن کی شاعرانہ اور صوفیانہ عظمت کے سبب اپنا پیر و مرشد تسلیم کیا۔