ترے بغیر گزارا نہیں کسی صورت

اسے یہ بات بتانے سے بات بگڑی ہے

شام ہوتے ہی تیرے ہجر کا دکھ

دل میں خیمہ لگا کے بیٹھ گیا

اپنے لہجے پہ غور کر کے بتا

لفظ کتنے ہیں تیر کتنے ہیں

شہر میں تھی ناساز طبیعت بیٹے کی

گاؤں میں بیٹھی ماں نے کھانا چھوڑ دیا

تیرے قدموں میں آ کے گرنا ہے

جس بلندی پہ بھی اچھال مجھے

ہم زمانہ شناس تھے پھر بھی

داستاں گو پہ اعتبار کیا

میر کے کچھ اشعار ملا کر راشد کی کچھ نظموں میں

وحشت کی آمیزش کر کے اک اسلوب بنانا ہے

بے خطا ہے تو پھر بھی ڈر اے دوست

بے خطا ہی نہ دھر لیا جائے

تب مری آس ٹوٹ جاتی ہے

جب مری آس لوگ ہوتے ہیں

سیٹی کی آواز سنی اور سارا ماضی لوٹ آیا

پس منظر میں ریل نہیں ہے پورا ایک افسانہ ہے

یہ جو تم موت سے ڈراتے ہو

زندگی سب کا مسئلہ نہیں ہے

جتنی فرصت ہے زندگی میں نصیب

اتنی فرصت میں میں سے تو ہو جا

امیدیں باندھ رکھی ہیں ترے لطف و کرم سے

سیہ اعمال ہوں تو گوشوارہ کون دیکھے

عجیب درد سا اس لمحۂ وصال میں تھا

کہ زخم سے بھی بڑا کرب اندمال میں تھا

سو طرح کے وبال ہیں لیکن

پھر بھی زندہ ہیں آن بان کے ساتھ

بجلی گئی تو وہ بھی ہمارے مکان کی

بجلی گری تو وہ بھی ہمارے مکان پر

سانس تازہ ہوا کے چکر میں

سارا گرد و غبار کھینچتی ہے

ایسوں ویسوں کے قصیدے نہیں لکھے جاتے

شعر لکھ لیتا ہوں سہرے نہیں لکھے جاتے