kahīñ se aa kar kuchh lahroñ ne Dubo hī Daalā thā aur phir

kahīñ se aa kar kisī ne merī jaan bachā.ī paanī meñ

kahin se aa kar kuchh lahron ne Dubo hi Dala tha aur phir

kahin se aa kar kisi ne meri jaan bachai pani mein

aisā kyā 'ishq jo rusvā.ī 'atā kar na sake

aisī kis kaam kī rusvā.ī ki shohrat bhī nahīñ

aisa kya 'ishq jo ruswai 'ata kar na sake

aisi kis kaam ki ruswai ki shohrat bhi nahin

zaḳhm nahīñ mā'lūm chalā par daaġh kahāñ kho saktā hai

dard usī ke ās-pās hai aur kahāñ ho saktā hai

zaKHm nahin ma'lum chala par dagh kahan kho sakta hai

dard usi ke aas-pas hai aur kahan ho sakta hai

ḳhvāb meñ koī to manzil unheñ dikhtī hogī

jaate to hoñge kahīñ niiñd meñ chalne vaale

KHwab mein koi to manzil unhen dikhti hogi

jate to honge kahin nind mein chalne wale

galī ke moḌ pe beva hai bad-nasīb koī

suhāganoñ ke liye chūḌiyāñ banātī hai

gali ke moD pe bewa hai bad-nasib koi

suhaganon ke liye chuDiyan banati hai

tumhāre hijr ko vo kam-nasīb kyā samjhe

jise ḳhabar hī nahīñ kis qadar hasīñ ho tum

tumhaare hijr ko wo kam-nasib kya samjhe

jise KHabar hi nahin kis qadar hasin ho tum

mustaqbil ab ke tere ta'āqub kī rau meñ dekh

maazī to kyā maiñ haal se aage nikal gayā

mustaqbil ab ke tere ta'aqub ki rau mein dekh

mazi to kya main haal se aage nikal gaya

kisī samundar se ek qatra agar nikal kar nadī kī jānib

qadam uThā le to vo safar ik misāl hogā kamāl hogā

kisi samundar se ek qatra agar nikal kar nadi ki jaanib

qadam uTha le to wo safar ek misal hoga kamal hoga

ḳhushk gul phir bhī kitāboñ meñ bhale lagte haiñ

zang lag jaa.e to talvār burī lagtī hai

KHushk gul phir bhi kitabon mein bhale lagte hain

zang lag jae to talwar buri lagti hai

tujh ko is jism kī raunaq pe bhalā kyoñ hai ġhurūr

jis kī zau qabr kī miTTī ke barābar bhī nahīñ

tujh ko is jism ki raunaq pe bhala kyon hai ghurur

jis ki zau qabr ki miTTi ke barabar bhi nahin

is tabassum ne to baazī hī palaT kar rakh dī

ab mujhe dekh ke rote haiñ rulāne vaale

is tabassum ne to bazi hi palaT kar rakh di

ab mujhe dekh ke rote hain rulane wale

'ishq kī chādar laayā huuñ aur ḳhaas baat ye hai is meñ

jitne pair pasāro ye utnī lambī ho jaatī hai

'ishq ki chadar laya hun aur KHas baat ye hai is mein

jitne pair pasaro ye utni lambi ho jati hai

sar yuuñ jhukte chale jaate haiñ ki gir hī na paḌeñ

aisī 'izzat mire sarkār burī lagtī hai

sar yun jhukte chale jate hain ki gir hi na paDen

aisi 'izzat mere sarkar buri lagti hai

dukh ke bāzār meñ ham zabt kamāne vaale

ashk ko aañkh kā nuqsān kahā karte haiñ

dukh ke bazar mein hum zabt kamane wale

ashk ko aankh ka nuqsan kaha karte hain

ga.e baras to suno ki sūraj ne itnī shiddat se aag uglī

ki chhāoñ dene ke vāste jo shajar ugaa.e the jal ga.e sab

gae baras to suno ki suraj ne itni shiddat se aag ugli

ki chhaon dene ke waste jo shajar ugae the jal gae sab

barsoñ se qatra qatra jo ho rahī thī yakjā

vo muntashir ḳhamoshī ab shor ho ga.ī hai

barson se qatra qatra jo ho rahi thi yakja

wo muntashir KHamoshi ab shor ho gai hai

dil vo parvat ki jo ik samt jhukā jaatā hai

ġham vo dariyā ki jo rahtā hai ravāñ ek taraf

dil wo parwat ki jo ek samt jhuka jata hai

gham wo dariya ki jo rahta hai rawan ek taraf

sard havāoñ kā qabza thā sāgar ke us Taapu par

maiñ ne apnā ashk girā kar aag lagā.ī paanī meñ

sard hawaon ka qabza tha sagar ke us Tapu par

main ne apna ashk gira kar aag lagai pani mein

ham apne pairoñ kā ek kāñTā nikālne ke liye ruke the

bas itne lamhe kā bītnā thā ki ham se aage nikal ga.e sab

hum apne pairon ka ek kanTa nikalne ke liye ruke the

bas itne lamhe ka bitna tha ki hum se aage nikal gae sab

ham logoñ ko samjhe aur na logoñ ne ham ko samjhā

ham logoñ ko aur ham ko samjhā samjhā kar haare log

hum logon ko samjhe aur na logon ne hum ko samjha

hum logon ko aur hum ko samjha samjha kar haare log