abhī haiñ qurb ke kuchh aur marhale baaqī

ki tujh ko pā ke hameñ phir tirī tamannā hai

abhi hain qurb ke kuchh aur marhale baqi

ki tujh ko pa ke hamein phir teri tamanna hai

chhoTī paḌtī hai anā kī chādar

paañv Dhaktā huuñ to sar khultā hai

chhoTi paDti hai ana ki chadar

panw Dhakta hun to sar khulta hai

shāhoñ kī bandagī meñ sar bhī nahīñ jhukāyā

tere liye sarāpā ādāb ho ga.e ham

shahon ki bandagi mein sar bhi nahin jhukaya

tere liye sarapa aadab ho gae hum

ā.īna jab bhī rū-ba-rū aayā

apnā chehra chhupā liyā ham ne

aaina jab bhi ru-ba-ru aaya

apna chehra chhupa liya hum ne

zarre meñ gum hazār sahrā

qatre meñ muhīt laakh qulzum

zarre mein gum hazar sahra

qatre mein muhit lakh qulzum

hotī hī nahīñ sub.h-e-qayāmat bhī numūdār

jāgeñge shab-e-hijr ke bīmār kahāñ tak

hoti hi nahin subh-e-qayamat bhi numudar

jagenge shab-e-hijr ke bimar kahan tak

har rāste se manzil-e-hastī hai bahut duur

jā.egā mire saath ġham-e-yār kahāñ tak

har raste se manzil-e-hasti hai bahut dur

jaega mere sath gham-e-yar kahan tak

har roz ik āvāza anal-haq kā lagā.eñ

dekheñ to ki hai silsila-e-dār kahāñ tak

har roz ek aawaza anal-haq ka lagaen

dekhen to ki hai silsila-e-dar kahan tak