bahut huuñ jaan se bezār yaaro

huī ta.alīm dil par baar yaaro

mujhe banñā nahīñ fankār yaaro

surayyā se hai mujh ko pyaar yaaro

mujhe karnī hai dil kī baat mention

attention ai dil-e-nādāñ attention

hai bhautik-shāstr meñ ik chiiz light

kareñ gar tajraba jaatī hai sight

ajab hotī hai kuchh rañgoñ meñ fight

ki mil kar saat ho jaate haiñ white

mañgāo magnet dekho detention

attention ai dil-e-nādāñ attention

chalo ab period mehñdī kā aayā

kahīñ darshan kahīñ rūpak kī chhāyā

gurū ne sorThā jam kar paḌhāyā

hamārī to samajh meñ kuchh na aayā

'kabīr' aur 'sūr' meñ rahtā hai tension

attention ai dil-e-nādāñ attention

har ik science kā chhīkā gaḌant hai

baḌā dushman mire jī kā gaḌant hai

tap-e-diq kā nayā Tiikā gaḌant hai

namak bilkul nahīñ phīkā gaḌant hai

baḌhā jaatā hai har step pe tension

attention ai dil-e-nādāñ attention

hai urdu kā bhī lambā piir saaqī

banātī hai haram ko dair saaqī

kahīñ 'momin' kā zikr-e-ḳhair saaqī

kahīñ 'nāsiḳh' kī hālat ġhair saaqī

na dī añgrez ne 'ġhālib' ko pension

attention ai dil-e-nādāñ attention

bahut hun jaan se bezar yaro

hui talim dil par bar yaro

mujhe banna nahin fankar yaro

surayya se hai mujh ko pyar yaro

mujhe karni hai dil ki baat meintion

attention ai dil-e-nadan attention

hai bhautik-shastr mein ek chiz light

karen gar tajraba jati hai sight

ajab hoti hai kuchh rangon mein fight

ki mil kar sat ho jate hain white

mangao magnet dekho detention

attention ai dil-e-nadan attention

chalo ab period mehndi ka aaya

kahin darshan kahin rupak ki chhaya

guru ne sorTha jam kar paDhaya

hamari to samajh mein kuchh na aaya

'kabir' aur 'sur' mein rahta hai tension

attention ai dil-e-nadan attention

har ek science ka chhika gaDant hai

baDa dushman mere ji ka gaDant hai

tap-e-diq ka naya Tika gaDant hai

namak bilkul nahin phika gaDant hai

baDha jata hai har step pe tension

attention ai dil-e-nadan attention

hai urdu ka bhi lamba pir saqi

banati hai haram ko dair saqi

kahin 'momin' ka zikr-e-KHair saqi

kahin 'nasiKH' ki haalat ghair saqi

na di angrez ne 'ghaalib' ko pension

attention ai dil-e-nadan attention