برج موہن دتا تریہ کیفی دہلوی (1866_1955)، جو عاشق اردو کہلاتے تھے، قادرُ الکلام شاعر، ڈراما نویس، ناول نگار اور انشا پرداز تھے۔ انھوں نے شروع میں اپنے کلام پر نہ صرف مولانا الطاف حسین حالی سے اصلاح لی تھی، بلکہ اپنی تحریروں میں ان کے خیالات کی پیروی بھی کرتے تھے ۔ دتاتریہ کیفی نے مشہور مسدس حالی (مد وجزرِاسلام) کے طرز پر"بھارت درپن" نام سے ایک مسدس بھی لکھی تھی جو "مسدس کیفی" کہلاتی ہے ۔ یہ مسدس آریہ ہندوؤں کی گذشتہ عظمت موجودہ حالت اور آئندہ ترقی پر ایک دلچسپ نظم ہے۔ 
اس مسدس کا ایک شعر ہے : 
گھٹا کفر اور جہل کی سر سے سرکی
کُھلیں برہم ودیا سے آنکھیں بشر کی

دتاتریہ کیفی بڑے عالم فاضل شخص تھے۔ اردو، فارسی، عربی اور انگریزی پر تو عبور رکھتے ہی تھے، سنسکرت اور ہندی میں بھی خاصی استعداد تھی۔
اردو کی پہلی قواعد کی کتاب "دریائے لطافت" جو فارسی زبان میں 1808  میں لکھی گئ تھی اس کا اردو ترجمہ بھی پنڈت برجموہن دتاتریہ کیفی نے کیا تھا۔

پروین شاکر (1952 .1994 ) اپنی مختصر سی عمر میں شہرت اور مقبولیت کی معراج کو پہنچیں۔ 1976 میں جب ان کا پہلا مجموعۂ کلام 'خوشبو' چھپ کر آیا، جس کا سرورق مشہور فنکار صادقین صاحب نے بنایا تھا، اس کو دیکھ کر فیض احمد فیض  نے مسکرا کر کہا تھا: ''میں نے تو عمر بھر میں اتنی نظمیں کہیں ہیں''۔ صادقین صاحب نے جواب دیا ''پروین شاکر زیادہ کہتی ہیں مگر اچھا کہتی ہیں"۔ 'خوشبو' کا پہلا ایڈیشن چھ مہینے میں ہی بک گیا۔ اس کے بعد ان کی کئ اور کتابیں شائع ہوئیں۔
کیا آپ جانتے ہیں کہ پروین شاکر، اردو شاعری کی دلنواز اور محبوب شخصیت، عام طور پر کسی محفل میں ہوتیں، گھر میں ہوتیں تو اپنے پاؤں سے جوتے اتار دیا کرتی تھیں۔ عام طور پر گاڑی بھی ننگے پاؤں چلایا کرتیں تھیں۔

مومن خاں مومن (1800.1852)، وہی جن کے بارے میں کہا جاتا ہے کہ مرزا غالب نے ان کے  شعر 
تم مرے پاس ہوتے ہو گویا
جب کوئی دوسرا نہیں ہوتا  
پر اپنا پورا دیوان دینے کی بات کہی تھی۔
مومن غزلیں تو کمال کی کہتے ہی تھے، علم نجوم میں بھی انھیں بڑی مہارت حاصل تھی۔ اکثر حساب لگا کر کوئی بات بتاتے تھے اور وہ عموماً پوری ہوتی تھی۔ تاریخ گوئی میں بھی مومن کو کمال حاصل تھا۔ نت نئے انداز کی تاریخیں کہتے تھے۔ اپنی موت سے چند مہینے پہلے مومن گھر کی چھت سے گر پڑے، ہاتھ پاؤں ٹوٹ گئے۔ انھوں نے اس حادثہ کی تاریخ  کہی اور پیشن گوئی کی کہ میں  پانچ مہینے بعد مرجاؤں گا۔ اور وہی ہوا، اس حادثے کی تاریخ آخر کار موت کی تاریخ بھی ثابت ہوئی جو ان کے مزار پر کندہ ہے۔
مومن نے کئی عشق کئے، ان کی غزلیں پڑھ کر محسوس ہوتا ہے کہ شاعر کسی خیالی نہیں بلکہ ایک جیتی جاگتی محبوبہ کے عشق میں گرفتار ہے۔  غزلوں کے علاوہ انھوں نے 12مثنویاں بھی لکھیں جن میں سے 6 کا موضوع خود ان ہی کا عشق ہے۔ سولہ سال کی عمر میں پہلی مثنوی "شکایت ستم" لکھی تھی جو ان کے ایک عشق کی ہی داستان تھی۔

عالمی شہرت یافتہ شاعر، فیض احمد فیض کی شادی 1941 میں، برطانوی شہری ایلس جارج سے سری نگر میں ہوئی تھی اور اِن کا نکاح شیخ محمد عبد اللہ نے پڑھایا تھا۔ ان دونوں نے مہاراجا ہری سنگھ کے"پری محل" میں ہنی مون منایا تھا۔ ایلس کا نام کلثوم رکھا گیا تھا، لیکن وہ ایلس فیض ہی کہلاتی تھیں۔ نکاح کے ساتھ ایک معاہدہ بھی ہوا تھا جس میں لکھا گیا تھا:   
"ایلس کو خلع لینے کا حق تھا اور ایلس کے زندہ رہتے ہوئے فیض کو دوسری شادی کرنے کی اجازت نہیں تھی۔ اس کے علاوہ ایلس کے نان و نفقہ کی ذمہ داری فیض کی تھی۔ جبکہ ایلس کی کمائی پر صرف ایلس کا حق تھا۔" 
دونوں کی ازدواجی زندگی بہت کامیاب رہی ۔ ایلس خود بھی سماجی کارکن تھیں، انھوں نے نو عمری میں ہی کمیونسٹ پارٹی میں شمولیت اختیار کی تھی۔ راول پنڈی سازش کیس کے الزام میں 1951 سے 1955 تک  فیض جیل میں رہے۔ اس مشکل دور میں ایلس نے اپنی دونوں بچیوں کی دیکھ بھال اور مالی اخراجات کی ذمہ داری نبھائ۔ اس دوران فیض اور ایلس کے درمیان انگریزی میں جو خط و کتابت ہوئی وہ کتاب کی شکل میں، اردو میں "صلیبیں مرے دریچے میں" کے عنوان سے اور بعد میں انگلش میں  "Dear heart " نام سے شائع ہوئی۔

اکبر الہ بادی مشرقی اطوار اور تہذہب کے بہت بڑے حامی تھے۔ انھوں نے پوری شاعری میں انگریزی کلچر پر سخت طنز و تشنیع سے کام لیا۔ مگر خود اپنے صاحبزادے کو تعلیم کے لئے لندن بھیج دیا، جن کا نام عشرت حسین تھا۔ 
عشرت حسین کو روانہ کرتے وقت کافی عہد و پیمان بھی لئے کہ اپنی مشرقی روایت کو ہرگز نہ بھولنا۔ ایک بار عشرت کا خط آنے میں کافی دیر ہو گئی تو اکبرالہ بادی نے اپنا مشہور قطعہ لکھ بھیجا، جس کے دو شعر ملاحظہ ہوں 

عشرتیؔ گھر کی محبت کا مزا بھول گئے 
کھا کے لندن کی ہوا عہد وفا بھول گئے

پہنچے ہوٹل میں تو پھر عید کی پروا نہ رہی 
کیک کو چکھ کے سوئیوں کا مزا بھول گئے