دوست

’’آپ ہنستے ہیں تو یہ دنیا آپ کے ساتھ ہنستی ہے۔

آپ روتے ہیں تو یہ آپ پر ہنستی ہے۔‘‘

چارلی چپلن نے کہا۔

میں نے اس کی بات سچ مان لی۔

لوگ واقعی اّس کی ہر حرکت پر ہنستے ہیں۔

میں اس کا انٹرویو کرنے پہنچا تھا۔ وہ ڈریسنگ روم میں تھا۔

تیار ہونے کے بعد وہ دیر تک آئینے کے سامنے کھڑا رہا۔

’’لگتا ہے کہ تم خود پسند ہو۔‘‘ میں نے اسے چھیڑا۔

’’میں خود پسند نہیں، آئینہ میرا سچا دوست ہے۔‘‘ اس نے کہا،

’’جب میں روتا ہوں تو یہ دوسروں کی طرح ہنستا نہیں ہے۔‘‘