انعام

میں جس سرکاری دفتر میں کام کرتا ہوں،

وہاں خواب خریدے جاتے ہیں۔

کچھ شہری اپنے خواب کوڑیوں کے مول بیچ دیتے ہیں۔

کچھ خوابوں کے بدلے اشرفیاں دی جاتی ہیں۔

گزشتہ ہفتے ایک نوجوان نے سنایا،

’’میں نے خواب دیکھا ہے کہ

وڈیروں کی زمینیں چھین کر غریب ہاریوں میں بانٹ دی گئیں۔‘‘

یہ انعامی خواب قرار پایا۔

کل میں نے اپنے افسر سے پوچھا،

’’اس نوجوان کو کیا انعام ملا؟‘‘

افسر نے کہا،

’’بڑے خواب دیکھنے والوں کو بطور انعام

بڑی تنخواہ پر سرکاری ملازمت دے دی جاتی ہے۔

پھر وہ کبھی خواب دیکھنے کے قابل نہیں رہتے۔‘‘