Today's top 5 Urdu Shayari

'mus.hafī' ham to ye samjhe the ki hogā koī zaḳhm

tere dil meñ to bahut kaam rafū kā niklā

'mushafi' hum to ye samjhe the ki hoga koi zaKHm

tere dil mein to bahut kaam rafu ka nikla

shadīd pyaas thī phir bhī chhuā na paanī ko

maiñ dekhtā rahā dariyā tirī ravānī ko

shadid pyas thi phir bhi chhua na pani ko

main dekhta raha dariya teri rawani ko

zehn meñ yaad ke ghar TūTne lagte haiñ 'shahāb'

log ho jaate haiñ jī jī ke purāne kitne

zehn mein yaad ke ghar TuTne lagte hain 'shahab'

log ho jate hain ji ji ke purane kitne

sune jaate na the tum se mire din raat ke shikve

kafan sarkāo merī be-zabānī dekhte jaao

sune jate na the tum se mere din raat ke shikwe

kafan sarkao meri be-zabani dekhte jao

TuuTe but masjid banī mismār but-ḳhāna huā

jab to ik sūrat bhī thī ab saaf vīrāna huā

TuTe but masjid bani mismar but-KHana hua

jab to ek surat bhi thi ab saf virana hua