Sher on Ishq

ek rishta bhī mohabbat kā agar TuuT gayā

dekhte dekhte shīrāza bikhar jaatā hai

ek rishta bhi mohabbat ka agar TuT gaya

dekhte dekhte shiraaza bikhar jata hai

ab mirī baat jo maane to na le ishq kā naam

tū ne dukh ai dil-e-nākām bahut sā paayā

ab meri baat jo mane to na le ishq ka nam

tu ne dukh ai dil-e-nakaam bahut sa paya

ilāhī ek ġham-e-rozgār kyā kam thā

ki ishq bhej diyā jān-e-mubtalā ke liye

ilahi ek gham-e-rozgar kya kam tha

ki ishq bhej diya jaan-e-mubtala ke liye

koī ai 'shakīl' pūchhe ye junūñ nahīñ to kyā hai

ki usī ke ho ga.e ham jo na ho sakā hamārā

koi ai 'shakil' puchhe ye junun nahin to kya hai

ki usi ke ho gae hum jo na ho saka hamara

mujhe aa gayā yaqīñ sā ki yahī hai merī manzil

sar-e-rāh jab kisī ne mujhe daf.atan pukārā

mujhe aa gaya yaqin sa ki yahi hai meri manzil

sar-e-rah jab kisi ne mujhe dafatan pukara

bhalā aadmī thā pa nādān niklā

sunā hai kisī se mohabbat kare hai

bhala aadmi tha pa nadan nikla

suna hai kisi se mohabbat kare hai

dil thaam ke karvaT pe liye jā.ūñ huuñ karvaT

vo aag lagī hai ki bujhā.e na bane hai

dil tham ke karwaT pe liye jaun hun karwaT

wo aag lagi hai ki bujhae na bane hai

ho gayā jis din se apne dil par us ko iḳhtiyār

iḳhtiyār apnā gayā be-iḳhtiyārī rah ga.ī

ho gaya jis din se apne dil par us ko iKHtiyar

iKHtiyar apna gaya be-iKHtiyari rah gai

hijr ko hausla aur vasl ko fursat darkār

ik mohabbat ke liye ek javānī kam hai

hijr ko hausla aur wasl ko fursat darkar

ek mohabbat ke liye ek jawani kam hai

huā hai tujh se bichhaḌne ke baa'd ye mā'lūm

ki tū nahīñ thā tire saath ek duniyā thī

hua hai tujh se bichhaDne ke ba'd ye ma'lum

ki tu nahin tha tere sath ek duniya thi

aap ke ba.ad har ghaḌī ham ne

aap ke saath hī guzārī hai

aap ke baad har ghaDi hum ne

aap ke sath hi guzari hai

jab tum se mohabbat kī ham ne tab jā ke kahīñ ye raaz khulā

marne kā salīqa aate hī jiine kā shu.ūr aa jaatā hai

jab tum se mohabbat ki hum ne tab ja ke kahin ye raaz khula

marne ka saliqa aate hi jine ka shuur aa jata hai

mohabbat meñ ye kyā maqām aa rahe haiñ

ki manzil pe haiñ aur chale jā rahe haiñ

mohabbat mein ye kya maqam aa rahe hain

ki manzil pe hain aur chale ja rahe hain

ġham-e-ishq hī ne kaaTī ġham-e-ishq kī musībat

isī mauj ne Duboyā isī mauj ne ubhārā

gham-e-ishq hi ne kaTi gham-e-ishq ki musibat

isi mauj ne Duboya isi mauj ne ubhaara

visāl-e-yār se duunā huā ishq

maraz baḌhtā gayā juuñ juuñ davā kī

visal-e-yar se duna hua ishq

maraz baDhta gaya jun jun dawa ki

ishq ne jis dil pe qabza kar liyā

phir kahāñ us meñ nashāt o ġham rahe

ishq ne jis dil pe qabza kar liya

phir kahan us mein nashat o gham rahe

raat terī yādoñ ne dil ko is tarah chheḌā

jaise koī chuTkī le narm narm gāloñ meñ

raat teri yaadon ne dil ko is tarah chheDa

jaise koi chuTki le narm narm galon mein

abhī vo kamsin ubhar rahā hai abhī hai us par shabāb aadhā

abhī jigar meñ ḳhalish hai aadhī abhī hai mujh par itaab aadhā

abhi wo kamsin ubhar raha hai abhi hai us par shabab aadha

abhi jigar mein KHalish hai aadhi abhi hai mujh par itab aadha

āshiqī meñ bahut zarūrī hai

bevafā.ī kabhī kabhī karnā

aashiqi mein bahut zaruri hai

bewafai kabhi kabhi karna

ishq se jā nahīñ koī ḳhālī

dil se le arsh tak bharā hai ishq

ishq se ja nahin koi KHali

dil se le arsh tak bhara hai ishq

dil pe aa.e hue ilzām se pahchānte haiñ

log ab mujh ko tire naam se pahchānte haiñ

dil pe aae hue ilzam se pahchante hain

log ab mujh ko tere nam se pahchante hain

ajiib raat thī kal tum bhī aa ke lauT ga.e

jab aa ga.e the to pal bhar Thahar ga.e hote

ajib raat thi kal tum bhi aa ke lauT gae

jab aa gae the to pal bhar Thahar gae hote

ik safar meñ koī do baar nahīñ luT saktā

ab dobāra tirī chāhat nahīñ kī jā saktī

ek safar mein koi do bar nahin luT sakta

ab dobara teri chahat nahin ki ja sakti

be tere kyā vahshat ham ko tujh bin kaisā sabr o sukūñ

tū hī apnā shahr hai jaanī tū hī apnā sahrā hai

be tere kya wahshat hum ko tujh bin kaisa sabr o sukun

tu hi apna shahr hai jaani tu hi apna sahra hai

kisī sabab se agar boltā nahīñ huuñ maiñ

to yuuñ nahīñ ki tujhe sochtā nahīñ huuñ maiñ

kisi sabab se agar bolta nahin hun main

to yun nahin ki tujhe sochta nahin hun main

bas ek hī balā hai mohabbat kaheñ jise

vo pāniyoñ meñ aag lagātī hai aaj bhī

bas ek hi bala hai mohabbat kahen jise

wo paniyon mein aag lagati hai aaj bhi

ishq hai to ishq kā iz.hār honā chāhiye

aap ko chehre se bhī bīmār honā chāhiye

ishq hai to ishq ka izhaar hona chahiye

aap ko chehre se bhi bimar hona chahiye

ye kin nazroñ se tū ne aaj dekhā

ki terā dekhnā dekhā na jaa.e

ye kin nazron se tu ne aaj dekha

ki tera dekhna dekha na jae

hamesha aag ke dariyā meñ ishq kyuuñ utre

kabhī to husn ko ġharq-e-azāb honā thā

hamesha aag ke dariya mein ishq kyun utre

kabhi to husn ko gharq-e-azab hona tha

kabhī yak-ba-yak tavajjoh kabhī daf.atan taġhāful

mujhe aazmā rahā hai koī ruḳh badal badal kar

kabhi yak-ba-yak tawajjoh kabhi dafatan taghaful

mujhe aazma raha hai koi ruKH badal badal kar

ai ishq tū har-chand mirā dushman-e-jāñ ho

marne kā nahīñ naam kā maiñ apne 'baqā' huuñ

ai ishq tu har-chand mera dushman-e-jaan ho

marne ka nahin nam ka main apne 'baqa' hun

ishq kī raah meñ maiñ mast kī tarah

kuchh nahīñ dekhtā buland aur past

ishq ki rah mein main mast ki tarah

kuchh nahin dekhta buland aur past

kitnī be-rang zindagī hai mirī

'ishq ke rang yaar bhar do nā

kitni be-rang zindagi hai meri

'ishq ke rang yar bhar do na

ishq par faa.ez huuñ auroñ kī tarah lekin mujhe

vasl kā lapkā nahīñ hai hijr se vahshat nahīñ

ishq par faez hun auron ki tarah lekin mujhe

wasl ka lapka nahin hai hijr se wahshat nahin

ilaaj apnā karāte phir rahe ho jaane kis kis se

mohabbat kar ke dekho nā mohabbat kyuuñ nahīñ karte

ilaj apna karaate phir rahe ho jaane kis kis se

mohabbat kar ke dekho na mohabbat kyun nahin karte

marg hī sehat hai us kī marg hī us kā ilaaj

ishq kā bīmār kyā jaane davā kyā chiiz hai

marg hi sehat hai us ki marg hi us ka ilaj

ishq ka bimar kya jaane dawa kya chiz hai

haa.e re majbūriyāñ mahrūmiyāñ nākāmiyāñ

ishq āḳhir ishq hai tum kyā karo ham kyā kareñ

hae re majburiyan mahrumiyan nakaamiyan

ishq aaKHir ishq hai tum kya karo hum kya karen

hosh vāloñ ko ḳhabar kyā be-ḳhudī kyā chiiz hai

ishq kiije phir samajhiye zindagī kyā chiiz hai

hosh walon ko KHabar kya be-KHudi kya chiz hai

ishq kije phir samajhiye zindagi kya chiz hai

ḳhvāhish-e-sūd thī saude meñ mohabbat ke vale

sar-ba-sar is meñ ziyāñ thā mujhe ma.alūm na thā

KHwahish-e-sud thi saude mein mohabbat ke wale

sar-ba-sar is mein ziyan tha mujhe malum na tha

jāda-e-rāh-e-mohabbat kī darāzī mat pūchh

manzil-e-shauq kā har zarra bayābāñ niklā

jada-e-rah-e-mohabbat ki daraazi mat puchh

manzil-e-shauq ka har zarra bayaban nikla

muddat se ik laḌkī ke ruḳhsār kī dhuup nahīñ aa.ī

is liye mere kamre meñ itnī ThanDak rahtī hai

muddat se ek laDki ke ruKHsar ki dhup nahin aai

is liye mere kamre mein itni ThanDak rahti hai

merā ishq to ḳhair mirī mahrūmī kā parvarda thā

kyā mālūm thā vo bhī degā merā itnā TuuT ke saath

mera ishq to KHair meri mahrumi ka parwarda tha

kya malum tha wo bhi dega mera itna TuT ke sath

ishq kā ghar hai 'mīr' se ābād

aise phir ḳhānamāñ-ḳharāb kahāñ

ishq ka ghar hai 'mir' se aabaad

aise phir KHanaman-KHarab kahan

ham tire shauq meñ yuuñ ḳhud ko gañvā baiThe haiñ

jaise bachche kisī tyauhār meñ gum ho jaa.eñ

hum tere shauq mein yun KHud ko ganwa baiThe hain

jaise bachche kisi tyauhaar mein gum ho jaen

ishq kī ibtidā to jānte haiñ

ishq kī intihā nahīñ mālūm

ishq ki ibtida to jaante hain

ishq ki intiha nahin malum

maiñ us kī dastaras meñ huuñ magar vo

mujhe merī razā se māñgtā hai

main us ki dastaras mein hun magar wo

mujhe meri raza se mangta hai

kis ne ābād kiyā hai mirī vīrānī ko

ishq ne? ishq to bīmār paḌā hai mujh meñ

kis ne aabaad kiya hai meri virani ko

ishq ne? ishq to bimar paDa hai mujh mein

husn aur ishq kā mazkūr na hove jab tak

mujh ko bhātā nahīñ sunñā kisī afsāne kā

husn aur ishq ka mazkur na howe jab tak

mujh ko bhata nahin sunna kisi afsane ka

huī na aam jahāñ meñ kabhī hukūmat-e-ishq

sabab ye hai ki mohabbat zamāna-sāz nahīñ

hui na aam jahan mein kabhi hukumat-e-ishq

sabab ye hai ki mohabbat zamana-saz nahin

koī aayā tirī jhalak dekhī

koī bolā sunī tirī āvāz

koi aaya teri jhalak dekhi

koi bola suni teri aawaz