hosh vāloñ ko ḳhabar kyā be-ḳhudī kyā chiiz hai

ishq kiije phir samajhiye zindagī kyā chiiz hai

hosh walon ko KHabar kya be-KHudi kya chiz hai

ishq kije phir samajhiye zindagi kya chiz hai

kabhī kisī ko mukammal jahāñ nahīñ miltā

kahīñ zamīn kahīñ āsmāñ nahīñ miltā

kabhi kisi ko mukammal jahan nahin milta

kahin zamin kahin aasman nahin milta

har aadmī meñ hote haiñ das biis aadmī

jis ko bhī dekhnā ho ka.ī baar dekhnā

har aadmi mein hote hain das bis aadmi

jis ko bhi dekhna ho kai bar dekhna

dhuup meñ niklo ghaTāoñ meñ nahā kar dekho

zindagī kyā hai kitāboñ ko haTā kar dekho

dhup mein niklo ghaTaon mein naha kar dekho

zindagi kya hai kitabon ko haTa kar dekho

bachchoñ ke chhoTe hāthoñ ko chāñd sitāre chhūne do

chaar kitābeñ paḌh kar ye bhī ham jaise ho jā.eñge

bachchon ke chhoTe hathon ko chand sitare chhune do

chaar kitaben paDh kar ye bhi hum jaise ho jaenge

bachcha bolā dekh kar masjid ālī-shān

allāh tere ek ko itnā baḌā makān

bachcha bola dekh kar masjid aali-shan

allah tere ek ko itna baDa makan

ghar ko khojeñ raat din ghar se nikle paañv

vo rasta hī kho gayā jis raste thā gaañv

ghar ko khojen raat din ghar se nikle panw

wo rasta hi kho gaya jis raste tha ganw

naqsha le kar haath meñ bachcha hai hairān

kaise dīmak khā ga.ī us kā hindostān

naqsha le kar hath mein bachcha hai hairan

kaise dimak kha gai us ka hindostan

vo suufī kā qaul ho yā panDit kā gyaan

jitnī biite aap par utnā hī sach maan

wo sufi ka qaul ho ya panDit ka gyan

jitni bite aap par utna hi sach man

maiñ royā pardes meñ bhīgā maañ kā pyaar

dukh ne dukh se baat kī bin chiTThī bin taar

main roya pardes mein bhiga man ka pyar

dukh ne dukh se baat ki bin chiTThi bin tar