Sher on Dard

ai mohabbat tire anjām pe ronā aayā

jaane kyuuñ aaj tire naam pe ronā aayā

ai mohabbat tere anjam pe rona aaya

jaane kyun aaj tere nam pe rona aaya

ishq se tabī.at ne ziist kā mazā paayā

dard kī davā paa.ī dard-e-be-davā paayā

ishq se tabiat ne zist ka maza paya

dard ki dawa pai dard-e-be-dawa paya

zindagī kyā kisī muflis kī qabā hai jis meñ

har ghaḌī dard ke paivand lage jaate haiñ

zindagi kya kisi muflis ki qaba hai jis mein

har ghaDi dard ke paiwand lage jate hain

kab Thahregā dard ai dil kab raat basar hogī

sunte the vo ā.eñge sunte the sahar hogī

kab Thahrega dard ai dil kab raat basar hogi

sunte the wo aaenge sunte the sahar hogi

ab to ḳhushī kā ġham hai na ġham kī ḳhushī mujhe

be-his banā chukī hai bahut zindagī mujhe

ab to KHushi ka gham hai na gham ki KHushi mujhe

be-his bana chuki hai bahut zindagi mujhe

mere ham-nafas mere ham-navā mujhe dost ban ke daġhā na de

maiñ huuñ dard-e-ishq se jāñ-ba-lab mujhe zindagī kī duā na de

mere ham-nafas mere ham-nawa mujhe dost ban ke dagha na de

main hun dard-e-ishq se jaan-ba-lab mujhe zindagi ki dua na de

mujhe chhoḌ de mere haal par tirā kyā bharosa hai chāragar

ye tirī navāzish-e-muḳhtasar merā dard aur baḌhā na de

mujhe chhoD de mere haal par tera kya bharosa hai chaaragar

ye teri nawazish-e-muKHtasar mera dard aur baDha na de

judā.iyoñ ke zaḳhm dard-e-zindagī ne bhar diye

tujhe bhī niiñd aa ga.ī mujhe bhī sabr aa gayā

judaiyon ke zaKHm dard-e-zindagi ne bhar diye

tujhe bhi nind aa gai mujhe bhi sabr aa gaya

ishq kī choT kā kuchh dil pe asar ho to sahī

dard kam ho yā ziyāda ho magar ho to sahī

ishq ki choT ka kuchh dil pe asar ho to sahi

dard kam ho ya ziyaada ho magar ho to sahi

vahī kārvāñ vahī rāste vahī zindagī vahī marhale

magar apne apne maqām par kabhī tum nahīñ kabhī ham nahīñ

wahi karwan wahi raste wahi zindagi wahi marhale

magar apne apne maqam par kabhi tum nahin kabhi hum nahin

dard aisā hai ki jī chāhe hai zinda rahiye

zindagī aisī ki mar jaane ko jī chāhe hai

dard aisa hai ki ji chahe hai zinda rahiye

zindagi aisi ki mar jaane ko ji chahe hai

dostoñ ko bhī mile dard kī daulat yā rab

merā apnā hī bhalā ho mujhe manzūr nahīñ

doston ko bhi mile dard ki daulat ya rab

mera apna hi bhala ho mujhe manzur nahin

be-nām sā ye dard Thahar kyuuñ nahīñ jaatā

jo biit gayā hai vo guzar kyuuñ nahīñ jaatā

be-nam sa ye dard Thahar kyun nahin jata

jo bit gaya hai wo guzar kyun nahin jata

ab ye bhī nahīñ Thiik ki har dard miTā deñ

kuchh dard kaleje se lagāne ke liye haiñ

ab ye bhi nahin Thik ki har dard miTa den

kuchh dard kaleje se lagane ke liye hain

aaj to dil ke dard par hañs kar

dard kā dil dukhā diyā maiñ ne

aaj to dil ke dard par hans kar

dard ka dil dukha diya main ne

agar dard-e-mohabbat se na insāñ āshnā hotā

na kuchh marne kā ġham hotā na jiine kā mazā hotā

agar dard-e-mohabbat se na insan aashna hota

na kuchh marne ka gham hota na jine ka maza hota

jab huā zikr zamāne meñ mohabbat kā 'shakīl'

mujh ko apne dil-e-nākām pe ronā aayā

jab hua zikr zamane mein mohabbat ka 'shakil'

mujh ko apne dil-e-nakaam pe rona aaya

kyuuñ hijr ke shikve kartā hai kyuuñ dard ke rone rotā hai

ab ishq kiyā to sabr bhī kar is meñ to yahī kuchh hotā hai

kyun hijr ke shikwe karta hai kyun dard ke rone rota hai

ab ishq kiya to sabr bhi kar is mein to yahi kuchh hota hai

dard ho dil meñ to davā kiije

aur jo dil hī na ho to kyā kiije

dard ho dil mein to dawa kije

aur jo dil hi na ho to kya kije

vaqt har zaḳhm kā marham to nahīñ ban saktā

dard kuchh hote haiñ tā-umr rulāne vaale

waqt har zaKHm ka marham to nahin ban sakta

dard kuchh hote hain ta-umr rulane wale

kuchh dard kī shiddat hai kuchh pās-e-mohabbat hai

ham aah to karte haiñ fariyād nahīñ karte

kuchh dard ki shiddat hai kuchh pas-e-mohabbat hai

hum aah to karte hain fariyaad nahin karte

aadat ke ba.ad dard bhī dene lagā mazā

hañs hañs ke aah aah kiye jā rahā huuñ maiñ

aadat ke baad dard bhi dene laga maza

hans hans ke aah aah kiye ja raha hun main

dard-e-dil kitnā pasand aayā use

maiñ ne jab kī aah us ne vaah kī

dard-e-dil kitna pasand aaya use

main ne jab ki aah us ne wah ki

dil meñ ik dard uThā āñkhoñ meñ aañsū bhar aa.e

baiThe baiThe hameñ kyā jāniye kyā yaad aayā

dil mein ek dard uTha aankhon mein aansu bhar aae

baiThe baiThe hamein kya jaaniye kya yaad aaya

dil sarāpā dard thā vo ibtidā-e-ishq thī

intihā ye hai ki 'fānī' dard ab dil ho gayā

dil sarapa dard tha wo ibtida-e-ishq thi

intiha ye hai ki 'fani' dard ab dil ho gaya

raas aane lagī duniyā to kahā dil ne ki jā

ab tujhe dard kī daulat nahīñ milne vaalī

ras aane lagi duniya to kaha dil ne ki ja

ab tujhe dard ki daulat nahin milne wali

dil hijr ke dard se bojhal hai ab aan milo to behtar ho

is baat se ham ko kyā matlab ye kaise ho ye kyūñkar ho

dil hijr ke dard se bojhal hai ab aan milo to behtar ho

is baat se hum ko kya matlab ye kaise ho ye kyunkar ho

ek do zaḳhm nahīñ jism hai saarā chhalnī

dard be-chāra pareshāñ hai kahāñ se nikle

ek do zaKHm nahin jism hai sara chhalni

dard be-chaara pareshan hai kahan se nikle

aisā na ho ye dard bane dard-e-lā-davā

aisā na ho ki tum bhī mudāvā na kar sako

aisa na ho ye dard bane dard-e-la-dawa

aisa na ho ki tum bhi mudawa na kar sako

zaḳhm kahte haiñ dil kā gahna hai

dard dil kā libās hotā hai

zaKHm kahte hain dil ka gahna hai

dard dil ka libas hota hai

ye dil kā dard to umroñ kā rog hai pyāre

so jaa.e bhī to pahr do pahr ko jaatā hai

ye dil ka dard to umron ka rog hai pyare

so jae bhi to pahr do pahr ko jata hai

sun chuke jab haal merā le ke añgḌā.ī kahā

kis ġhazab kā dard zālim tere afsāne meñ thā

sun chuke jab haal mera le ke angDai kaha

kis ghazab ka dard zalim tere afsane mein tha

zindagī yuuñ bhī guzar hī jaatī

kyuuñ tirā rāhguzar yaad aayā

zindagi yun bhi guzar hi jati

kyun tera rahguzar yaad aaya

haal tum sun lo mirā dekh lo sūrat merī

dard vo chiiz nahīñ hai ki dikhā.e koī

haal tum sun lo mera dekh lo surat meri

dard wo chiz nahin hai ki dikhae koi

mire laboñ kā tabassum to sab ne dekh liyā

jo dil pe biit rahī hai vo koī kyā jaane

mere labon ka tabassum to sab ne dekh liya

jo dil pe bit rahi hai wo koi kya jaane

bhīgī miTTī kī mahak pyaas baḌhā detī hai

dard barsāt kī būñdoñ meñ basā kartā hai

bhigi miTTi ki mahak pyas baDha deti hai

dard barsat ki bundon mein basa karta hai

zaḳhm hī terā muqaddar haiñ dil tujh ko kaun sambhālegā

ai mere bachpan ke sāthī mere saath hī mar jaanā

zaKHm hi tera muqaddar hain dil tujh ko kaun sambhaalega

ai mere bachpan ke sathi mere sath hi mar jaana

dil par choT paḌī hai tab to aah laboñ tak aa.ī hai

yuuñ hī chhan se bol uThnā to shīshe kā dastūr nahīñ

dil par choT paDi hai tab to aah labon tak aai hai

yun hi chhan se bol uThna to shishe ka dastur nahin

dard ko rahne bhī de dil meñ davā ho jā.egī

maut aa.egī to ai hamdam shifā ho jā.egī

dard ko rahne bhi de dil mein dawa ho jaegi

maut aaegi to ai hamdam shifa ho jaegi

dard ulfat kā na ho to zindagī kā kyā mazā

āh-o-zārī zindagī hai be-qarārī zindagī

dard ulfat ka na ho to zindagi ka kya maza

aah-o-zari zindagi hai be-qarari zindagi

kabhī sahar to kabhī shaam le gayā mujh se

tumhārā dard ka.ī kaam le gayā mujh se

kabhi sahar to kabhi sham le gaya mujh se

tumhaara dard kai kaam le gaya mujh se

yaaro na.e mausam ne ye ehsān kiye haiñ

ab yaad mujhe dard purāne nahīñ aate

yaro nae mausam ne ye ehsan kiye hain

ab yaad mujhe dard purane nahin aate

minnat-e-chāra-sāz kaun kare

dard jab jāñ-navāz ho jaa.e

minnat-e-chaara-saz kaun kare

dard jab jaan-nawaz ho jae

ġham meñ kuchh ġham kā mashġhalā kiije

dard kī dard se davā kiije

gham mein kuchh gham ka mashghala kije

dard ki dard se dawa kije

dard o ġham dil kī tabī.at ban ga.e

ab yahāñ ārām hī ārām hai

dard o gham dil ki tabiat ban gae

ab yahan aaram hi aaram hai

tez hai aaj dard-e-dil saaqī

talḳhī-e-mai ko tez-tar kar de

tez hai aaj dard-e-dil saqi

talKHi-e-mai ko tez-tar kar de

zaḳhm kitne tirī chāhat se mile haiñ mujh ko

sochtā huuñ ki kahūñ tujh se magar jaane de

zaKHm kitne teri chahat se mile hain mujh ko

sochta hun ki kahun tujh se magar jaane de

talḳhiyāñ is meñ bahut kuchh haiñ mazā kuchh bhī nahīñ

zindagī dard-e-mohabbat ke sivā kuchh bhī nahīñ

talKHiyan is mein bahut kuchh hain maza kuchh bhi nahin

zindagi dard-e-mohabbat ke siwa kuchh bhi nahin

mujhe manzūr gar tark-e-ta'alluq hai razā terī

magar TūTegā rishta dard kā āhista āhista

mujhe manzur gar tark-e-ta'alluq hai raza teri

magar TuTega rishta dard ka aahista aahista

pahlū meñ mere dil ko na ai dard kar talāsh

muddat huī ġharīb vatan se nikal gayā

pahlu mein mere dil ko na ai dard kar talash

muddat hui gharib watan se nikal gaya