Sher on Love

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

ik roz khel khel meñ ham us ke ho ga.e

aur phir tamām umr kisī ke nahīñ hue

ek roz khel khel mein hum us ke ho gae

aur phir tamam umr kisi ke nahin hue

maañg luuñ tujh se tujhī ko ki sabhī kuchh mil jaa.e

sau savāloñ se yahī ek savāl achchhā hai

mang lun tujh se tujhi ko ki sabhi kuchh mil jae

sau sawalon se yahi ek sawal achchha hai

bulbul ke kārobār pe haiñ ḳhanda-hā-e-gul

kahte haiñ jis ko ishq ḳhalal hai dimāġh kā

bulbul ke karobar pe hain KHanda-ha-e-gul

kahte hain jis ko ishq KHalal hai dimagh ka

ai dil tamām naf.a hai saudā-e-ishq meñ

ik jaan kā ziyāñ hai so aisā ziyāñ nahīñ

ai dil tamam nafa hai sauda-e-ishq mein

ek jaan ka ziyan hai so aisa ziyan nahin

is ta.alluq meñ nahīñ mumkin talāq

ye mohabbat hai koī shādī nahīñ

is talluq mein nahin mumkin talaq

ye mohabbat hai koi shadi nahin

ek chehra hai jo āñkhoñ meñ basā rahtā hai

ik tasavvur hai jo tanhā nahīñ hone detā

ek chehra hai jo aankhon mein basa rahta hai

ek tasawwur hai jo tanha nahin hone deta

'qatīl' ab dil kī dhaḌkan ban ga.ī hai chaap qadmoñ kī

koī merī taraf aatā huā mahsūs hotā hai

'qatil' ab dil ki dhaDkan ban gai hai chap qadmon ki

koi meri taraf aata hua mahsus hota hai

vo to ḳhush-bū hai havāoñ meñ bikhar jā.egā

mas.ala phuul kā hai phuul kidhar jā.egā

wo to KHush-bu hai hawaon mein bikhar jaega

masala phul ka hai phul kidhar jaega

us ko judā hue bhī zamāna bahut huā

ab kyā kaheñ ye qissa purānā bahut huā

us ko juda hue bhi zamana bahut hua

ab kya kahen ye qissa purana bahut hua

jo ho sakā na mirā us ko bhuul jā.ūñ maiñ

parā.ī aag meñ kyuuñ uñgliyāñ jalā.ūñ maiñ

jo ho saka na mera us ko bhul jaun main

parai aag mein kyun ungliyan jalaun main

is tarah nigāheñ mat phero, aisā na ho dhaḌkan ruk jaa.e

siine meñ koī patthar to nahīñ ehsās kā mārā, dil hī to hai

is tarah nigahen mat phero, aisa na ho dhaDkan ruk jae

sine mein koi patthar to nahin ehsas ka mara, dil hi to hai

mohabbat kā un ko yaqīñ aa chalā hai

haqīqat bane jā rahe haiñ fasāne

mohabbat ka un ko yaqin aa chala hai

haqiqat bane ja rahe hain fasane

dil mujhe us galī meñ le jā kar

aur bhī ḳhaak meñ milā laayā

dil mujhe us gali mein le ja kar

aur bhi KHak mein mila laya

kitnī lambī ḳhāmoshī se guzrā huuñ

un se kitnā kuchh kahne kī koshish kī

kitni lambi KHamoshi se guzra hun

un se kitna kuchh kahne ki koshish ki

aate aate mirā naam sā rah gayā

us ke hoñToñ pe kuchh kāñptā rah gayā

aate aate mera nam sa rah gaya

us ke honTon pe kuchh kanpta rah gaya

aap daulat ke tarāzū meñ diloñ ko tauleñ

ham mohabbat se mohabbat kā sila dete haiñ

aap daulat ke taraazu mein dilon ko taulen

hum mohabbat se mohabbat ka sila dete hain

mohabbat ek ḳhushbū hai hamesha saath chaltī hai

koī insān tanhā.ī meñ bhī tanhā nahīñ rahtā

mohabbat ek KHushbu hai hamesha sath chalti hai

koi insan tanhai mein bhi tanha nahin rahta

ishq ne 'ġhālib' nikammā kar diyā

varna ham bhī aadmī the kaam ke

ishq ne 'ghaalib' nikamma kar diya

warna hum bhi aadmi the kaam ke

mire saare badan par dūriyoñ kī ḳhaak bikhrī hai

tumhāre saath mil kar ḳhud ko dhonā chāhtā huuñ maiñ

mere sare badan par duriyon ki KHak bikhri hai

tumhaare sath mil kar KHud ko dhona chahta hun main

rone vāloñ se kaho un kā bhī ronā ro leñ

jin ko majbūri-e-hālāt ne rone na diyā

rone walon se kaho un ka bhi rona ro len

jin ko majburi-e-haalat ne rone na diya

ab tak dil-e-ḳhush-fahm ko tujh se haiñ umīdeñ

ye āḳhirī sham.eñ bhī bujhāne ke liye aa

ab tak dil-e-KHush-fahm ko tujh se hain umiden

ye aaKHiri shamen bhi bujhane ke liye aa

shaam hote hī charāġhoñ ko bujhā detā huuñ

dil hī kaafī hai tirī yaad meñ jalne ke liye

sham hote hi charaghon ko bujha deta hun

dil hi kafi hai teri yaad mein jalne ke liye

zindagī yūñhī bahut kam hai mohabbat ke liye

ruuTh kar vaqt gañvāne kī zarūrat kyā hai

zindagi yunhi bahut kam hai mohabbat ke liye

ruTh kar waqt ganwane ki zarurat kya hai

na jaane kaun sī manzil pe aa pahuñchā hai pyaar apnā

na ham ko e'tibār apnā na un ko e'tibār apnā

na jaane kaun si manzil pe aa pahuncha hai pyar apna

na hum ko e'tibar apna na un ko e'tibar apna

apne jaisī koī tasvīr banānī thī mujhe

mire andar se sabhī rañg tumhāre nikle

apne jaisi koi taswir banani thi mujhe

mere andar se sabhi rang tumhaare nikle

chupke chupke raat din aañsū bahānā yaad hai

ham ko ab tak āshiqī kā vo zamānā yaad hai

chupke chupke raat din aansu bahana yaad hai

hum ko ab tak aashiqi ka wo zamana yaad hai

milnā thā ittifāq bichhaḌnā nasīb thā

vo utnī duur ho gayā jitnā qarīb thā

milna tha ittifaq bichhaDna nasib tha

wo utni dur ho gaya jitna qarib tha

mazā jab thā ki mere muñh se sunte dāstāñ merī

kahāñ se lā.egā qāsid dahan merā zabāñ merī

maza jab tha ki mere munh se sunte dastan meri

kahan se laega qasid dahan mera zaban meri

us ko ruḳhsat to kiyā thā mujhe ma.alūm na thā

saarā ghar le gayā ghar chhoḌ ke jaane vaalā

us ko ruKHsat to kiya tha mujhe malum na tha

sara ghar le gaya ghar chhoD ke jaane wala

muddat meñ shām-e-vasl huī hai mujhe nasīb

do-chār saal tak to ilāhī sahar na ho

muddat mein sham-e-wasl hui hai mujhe nasib

do-chaar sal tak to ilahi sahar na ho

har mulāqāt pe siine se lagāne vaale

kitne pyāre haiñ mujhe chhoḌ ke jaane vaale

har mulaqat pe sine se lagane wale

kitne pyare hain mujhe chhoD ke jaane wale

duniyā ke sitam yaad na apnī hī vafā yaad

ab mujh ko nahīñ kuchh bhī mohabbat ke sivā yaad

duniya ke sitam yaad na apni hi wafa yaad

ab mujh ko nahin kuchh bhi mohabbat ke siwa yaad

mire salīqe se merī nibhī mohabbat meñ

tamām umr maiñ nākāmiyoñ se kaam liyā

mere saliqe se meri nibhi mohabbat mein

tamam umr main nakaamiyon se kaam liya

ham ko kis ke ġham ne maarā ye kahānī phir sahī

kis ne toḌā dil hamārā ye kahānī phir sahī

hum ko kis ke gham ne mara ye kahani phir sahi

kis ne toDa dil hamara ye kahani phir sahi

maiñ ḳhayāl huuñ kisī aur kā mujhe sochtā koī aur hai

sar-e-ā.īna mirā aks hai pas-e-ā.īna koī aur hai

main KHayal hun kisi aur ka mujhe sochta koi aur hai

sar-e-aina mera aks hai pas-e-aina koi aur hai

ḳhud-kushī jurm bhī hai sabr kī tauhīn bhī hai

is liye ishq meñ mar mar ke jiyā jaatā hai

KHud-kushi jurm bhi hai sabr ki tauhin bhi hai

is liye ishq mein mar mar ke jiya jata hai

vo jo ham meñ tum meñ qarār thā tumheñ yaad ho ki na yaad ho

vahī yaanī va.ada nibāh kā tumheñ yaad ho ki na yaad ho

wo jo hum mein tum mein qarar tha tumhein yaad ho ki na yaad ho

wahi yani wada nibah ka tumhein yaad ho ki na yaad ho

aur bhī dukh haiñ zamāne meñ mohabbat ke sivā

rāhateñ aur bhī haiñ vasl kī rāhat ke sivā

aur bhi dukh hain zamane mein mohabbat ke siwa

rahaten aur bhi hain wasl ki rahat ke siwa

achchhā ḳhāsā baiThe baiThe gum ho jaatā huuñ

ab maiñ aksar maiñ nahīñ rahtā tum ho jaatā huuñ

achchha KHasa baiThe baiThe gum ho jata hun

ab main aksar main nahin rahta tum ho jata hun

ishq mujh ko nahīñ vahshat hī sahī

merī vahshat tirī shohrat hī sahī

ishq mujh ko nahin wahshat hi sahi

meri wahshat teri shohrat hi sahi

ab judā.ī ke safar ko mire āsān karo

tum mujhe ḳhvāb meñ aa kar na pareshān karo

ab judai ke safar ko mere aasan karo

tum mujhe KHwab mein aa kar na pareshan karo

ranjish hī sahī dil hī dukhāne ke liye aa

aa phir se mujhe chhoḌ ke jaane ke liye aa

ranjish hi sahi dil hi dukhane ke liye aa

aa phir se mujhe chhoD ke jaane ke liye aa

mere ghar ke tamām darvāze

tum se karte haiñ pyaar aa jaao

mere ghar ke tamam darwaze

tum se karte hain pyar aa jao

vafā tum se kareñge dukh saheñge naaz uThā.eñge

jise aatā hai dil denā use har kaam aatā hai

wafa tum se karenge dukh sahenge naz uThaenge

jise aata hai dil dena use har kaam aata hai

hañs ke farmāte haiñ vo dekh ke hālat merī

kyuuñ tum āsān samajhte the mohabbat merī

hans ke farmate hain wo dekh ke haalat meri

kyun tum aasan samajhte the mohabbat meri

koī samjhe to ek baat kahūñ

ishq taufīq hai gunāh nahīñ

koi samjhe to ek baat kahun

ishq taufiq hai gunah nahin

jhukī jhukī sī nazar be-qarār hai ki nahīñ

dabā dabā sā sahī dil meñ pyaar hai ki nahīñ

jhuki jhuki si nazar be-qarar hai ki nahin

daba daba sa sahi dil mein pyar hai ki nahin

mere tāvīz meñ jo kāġhaz hai

us pe likkhā hai mohabbat karnā

mere tawiz mein jo kaghaz hai

us pe likkha hai mohabbat karna

ishq sunte the jise ham vo yahī hai shāyad

ḳhud-baḳhud dil meñ hai ik shaḳhs samāyā jaatā

ishq sunte the jise hum wo yahi hai shayad

KHud-baKHud dil mein hai ek shaKHs samaya jata