باقی احمد پوری نے تمام اصنافِ سخن میں طبع آزمائی کی ہے۔ نظم و غزل، حمد و نعت و سلام، قطعات، رباعیات،مستزاد سبھی اصناف ان کی شاعری میں موجود ہیں۔ شروع کی کتابوں میں غزلوں کے ساتھ ساتھ پابند اور آزاد نظمیں بھی ملتی ہیں لیکن بعد کی کتب میں غزلیں ہی ملتی ہیں۔ باقی احمد پوری نے ”خوشے گوشے“ کے عنوان سے مختلف اخبارات میں ادبی، سیاسی اور معاشرتی موضوعات پر کالم بھی لکھے۔ پاک و ہند میں کئی شعراءباقی احمد پوری کے حلقہ تلامذہ میں شامل ہیں ۔ نئی نسل کے بے شمار نوجوانوں کی کتب پر ان کے دیباچے اور فلیپ بھی نظر آتے ہیں۔ علاوہ ازیں باقی احمد پوری نے شعری انتخاب کی کئی مقبول کتب بھی مرتب کیں جس کے نتیجے میں مضافات میں نئے لکھنے والوں کی گونج اردو کے بڑے مراکز میں بھی سنی جانے لگی۔ان دنوں باقی احمد پوری کی کلیات زیرِ طبع ہے۔ ان کے مجموعوں کا نام ہیں باقیات،نقشِ باقی،صد رشک ،غزالاں، اداسی کم نہیں ہوتی،غزل تم ہو ،اگر آنکھیں چھلک جائیں ،روانی،ہمارا کیا ہے اوروالہانہ۔