یہ الگ بات کہ وہ دل سے کسی اور کا تھا

بات تو اس نے ہماری بھی بظاہر رکھی

بجا ہے زندگی سے ہم بہت رہے ناراض

مگر بتاؤ خفا تم سے بھی کبھو ہوئے ہیں

کسی کے راستے کی خاک میں پڑے ہیں ظفرؔ

متاع عمر یہی عاجزی نکلتی ہے

نا خدا چھوڑ گئے بیچ بھنور میں تو ظفرؔ

ایک تنکے کے سہارے نے کہا بسم اللہ

سب بڑے زعم سے آئے تھے نئے صورت گر

سب کے دامن سے وہی خواب پرانے نکلے

اک خوف دشمنی جو تعاقب میں سب کے ہے

اک حرف لطف جو کہیں غائب ہے شہر میں

کاسۂ درد لیے کب سے کھڑے سوچتے ہیں

دست امکان سے کیا چیز نہ جانے نکلے

یہ عہد کیا ہے کہ سب پر گراں گزرتا ہے

یہ کیا طلسم ہے کیا امتحاں گزرتا ہے

خیال تازہ سے کرتے ہیں خواب نو تخلیق

ظفرؔ زمینیں نئی آسماں سے کھینچتے ہیں

اک ایسا وقت بھی سیر چمن میں دیکھا ہے

کلی کے سینے سے جب بے کلی نکلتی ہے