اسے کھلونوں سے بڑھ کر ہے فکر روٹی کی

ہمارے دور کا بچہ جنم سے بوڑھا ہے

کوئی کالم نہیں ہے حادثوں پر

بچا کر آج کا اخبار رکھنا

ان کے لب پر مرا گلہ ہی سہی

یاد کرنے کا سلسلہ تو ہے

جہاں تک پاؤں میرے جا سکے ہیں

وہیں تک راستہ ٹھہرا ہوا ہے

میں بھی تنہا اس طرف ہوں وہ بھی تنہا اس طرف

میں پریشاں ہوں تو ہوں وہ بھی پریشانی میں ہے

وہی قاتل وہی منصف بنا ہے

اسی سے فیصلہ ٹھہرا ہوا ہے

وقت کے دامن میں کوئی

اپنی ایک کہانی رکھ

سب کو دکھلاتا ہے وہ چھوٹا بنا کر مجھ کو

مجھ کو وہ میرے برابر نہیں ہونے دیتا

اب نشانہ اس کی اپنی ذات ہے

لڑ رہا ہے اک انوکھی جنگ وہ

کیوں وہ ملنے سے گریزاں اس قدر ہونے لگے

میرے ان کے درمیاں دیوار رکھ جاتا ہے کون

پتے پتے سے نغمہ سرا کون ہے

اے ہوا تیرے اندر چھپا کون ہے

جفا کے ذکر پہ وہ بد حواس کیسا ہے

ذرا سی بات تھی لیکن اداس کیسا ہے

مری قندیل جاں جلتی ہے شب بھر

ذرا اپنی بھی تو روداد شب لکھ

یہ میں ہوں خود کہ کوئی اور ہے تعاقب میں

یہ ایک سایہ پس رہ گزار کس کا ہے

نہ جانے کون فضاؤں میں زہر گھول گیا

ہرا بھرا سا شجر بے لباس کیسا ہے

کون پتھر اٹھائے

یہ شجر بے ثمر ہے

ہوائے تند کیسی چل پڑی ہے

شجر پر ایک بھی پتا نہیں ہے

وہ بڑا تھا پھر بھی وہ اس قدر بے فیض تھا

اس گھنیرے پیڑ میں جیسے کوئی سایہ نہ تھا

میں نے جو کچھ بھی لکھا ہے

وہ سب حرف آئندہ ہے

کچھ حقائق کے زندہ پیکر ہیں

لفظ میں کیا بیان میں کیا ہے