حسنیٰ سرور کی شاعری

حسنیٰ سرور کے اشعار

دل کے آنگن میں اندھیرا ہے بہت

چاند بن کر اتر آؤ تو سہی

شہر در شہر بھٹکتے ہی رہے عمر تمام

کیا ترے ہاتھ کی ریکھاؤں میں آرام نہیں

بیٹھے بیٹھے یوں ہی تنہائی کے صحراؤں میں

درد کی ریت پہ لکھتے ہیں ترا نام اکثر

جھیل میں چاندنی کا عکس جمیل

یا تری یاد دل سے گزری ہے

میں اپنی ذات میں گم بے خودی میں رہتی ہوں

صبا کی طرح کوئی چھیڑے گدگدائے مجھے

چھن سے اک مورتی کہیں ٹوٹی

ہاتھ یہ کس کے تھرتھرائے ہیں

جاگی کرنیں تو سبزے پر جھلمل آنسو بول اٹھے

رات کو تنہائی میں شبنم چپکے چپکے روئی ہے

دور تک جاگتا ہے سناٹا

کون آتا ہے اتنی رات گئے

تری نگاہ میں یہ جو کرن سی کانپتی ہے

دیار دل میں یہ کیسا چراغ جلتا ہے