آنکھ کی پتلی سب کچھ دیکھے دیکھے نہ اپنی ذات

اجلا دھاگا میلا ہووے لگیں جو میلے ہات

سوت کے کچے دھاگے جیسے رشتے پر اتراؤں

ساجن ہاتھ بھی چھو لیں تو میں پھول گلاب بن جاؤں

میں بہری تھی کاگا بولا سن نہ سکی سندیش

دل کہتا ہے کل آئیں گے پیا بدل کے بھیس

تکیہ بھیگا سانس بھی ڈوبی مرجھائی ہر آس

دل کو راہ پہ لانے کی ہر آس بنی سنیاس

پریم کیا اور ساتھ نہ چھوٹا کیسے تھے وہ لوگ

ہم نے پیاروں کا اب تک دیکھا نہ سنجوگ

ٹھنڈی رات اور ٹھنڈا بستر سکھی ری کانٹے آئے

لوگ کہیں جو دکھ سانجھے ہوں دل ہلکا ہو جائے

تپتے لمحے دہکتے چہرے سب کچھ دھیان میں لاؤں

پتی پتی چاہے توڑوں دل کا بوجھ ہٹاؤں

بھائی مرے پردیس سدھارے بہنیں ہوئیں پرائی

کس سے جا کے کہوں کہانی ساجن ہے ہرجائی

صبح ہوئے جگ بیت گئے ہیں کب سے رین اڑی ہے

سوکھ گئے ہیں لب پھولوں کے ایسی اوس پڑی ہے

ناں میں سگھڑ نہ صورت والی کس کا مان کروں ری

جل گندہ ہے اپنے من کا کیا بلیدان کروں ری