میں جب پیڑ سے گر کے زمیں کی خاک ہوا

تب اک عالم موہوم سمجھ میں آیا

اس کو کھونا اصل میں اس کو پانا ہے

حاصل کا ہی پرتو ہے لا حاصل میں

سب کا دامن موتیوں سے بھرنے والے

میری آنکھ میں بھی اک آنسو رکھنا تھا

دونوں بہر شعلۂ ذات دونوں اسیر انا

دریا کے لب پر پانی دشت کے لب پر پیاس

خود ہی چراغ اب اپنی لو سے نالاں ہے

نقش یہ کیا ابھرا یہ کیسا زوال ہوا

میں وہم ہوں کہ حقیقت یہ حال دیکھنے کو

گرفت ہوتا ہوں اپنا وصال دیکھنے کو

سفر نہ ہو تو یہ لطف سفر ہے بے معنی

بدن نہ ہو تو بھلا کیا قبا میں رکھا ہے

ساری عمر کسی کی خاطر سولی پہ لٹکا رہا

شاید طورؔ میرے اندر اک شخص تھا زندہ بہت

وہ بھی مجھ کو بھلا کے بہت خوش بیٹھا ہے

میں بھی اس کو چھوڑ کے طورؔ نہال ہوا

اک آگ سی اب لگی ہوئی ہے

پانی میں اثر کہاں سے آیا

ان سے کیا رشتہ تھا وہ کیا میرے لگتے تھے

گرنے لگے جب پیڑ سے پتے تو میں رویا بہت

ایک دیا دہلیز پہ رکھا بھول گیا

گھر کو لوٹ کے آنے والا بھول گیا

میں تو تھا موجود کتاب کے لفظوں میں

وہ ہی شاید مجھ کو پڑھنا بھول گیا

کب تک تو آسماں میں چھپ کے بیٹھے گا

مانگ رہا ہوں میں کب سے دعا باہر آ

بہت کہا تھا کہ تم اکیلے نہ رہ سکو گے

بہت کہا تھا کہ ہم کو یوں در بدر نہ کرنا

کیوں مجھے محسوس یہ ہوتا ہے اکثر رات بھر

سینۂ شب پر چمکتا ہے سمندر رات بھر

یہ اسرار ہے ظاہر اس کے ہونے کا

منظر ہو یا پس منظر گہرا پانی

میں کس سے کرتا یہاں گفتگو کوئی بھی نہ تھا

نہیں تھا میرے مقابل جو تو کوئی بھی نہ تھا

بند پڑے ہیں شہر کے سارے دروازے

یہ کیسا آسیب اب گھر گھر لگتا ہے

یہاں کسی کو کسی کی خبر نہیں درکار

عجب طرح کا یہ سارا جہان ہو گیا ہے