اکیسویں صدی میں جن ناموں نے اپنی علمی و تخلیقی ریاضت اور باطنی وقار کے باعث ایک نمایاں شناخت قائم کی، اُن میں ڈاکٹر محمد افتخار شفیع کا نام نہایت درخشاں ہے۔ 17 اگست 1973 کو ساہیوال (پاکستان) کے نواحی علاقے نور شاہ میں پیدا ہونے والے افتخار شفیع نے اس خطے کی علمی، تاریخی اور تہذیبی روایت سے وہ فکری رس حاصل کیا جس نے ان کے اسلوب کو ایک گہری جمالیاتی توانائی عطا کی۔ ابتدائی تعلیم سے لے کر پی ایچ ڈی اور پوسٹ ڈاکٹریٹ تک ان کا تعلیمی سفر مسلسل محنت، وسعتِ مطالعہ اور فکری شفافیت کا مظہر ہے۔ شاعر، محقق، نقاد، مترجم اور کالم نگار—یہ تمام اوصاف ان کی شخصیت میں یوں جمع ہیں کہ ہر جہت دوسری کو مضبوط کرتی ہے۔ ان کا طرزِ فکر دھیما، سنجیدہ، اقدار سے وابستہ اور عصری شعور سے ربط رکھنے والا ہے۔ جدید اردو غزل کے اُن شاعروں میں ان کا شمار ہوتا ہے جنہوں نے روایت کی لطافت کو برقرار رکھتے ہوئے نئے انسانی تجربے کو پوری تہہ داری کے ساتھ برتا۔ ان کی شاعری میں داخلی کرب، وجودی سوالات، رویّوں کی شکست و تعمیر اور انسانی کیفیتوں کے تہہ در تہہ مناظر ایک خاص فکری وقار کے ساتھ جلوہ گر ہوتے ہیں۔

تحقیق اور تنقید کے میدان میں افتخار شفیع کے کام کو احمد ندیم قاسمی، منیر نیازی، وزیر آغا، مظہر محمود شیرانی، شمس الرحمٰن فاروقی، ظفر اقبال، ڈاکٹر خورشید رضوی اور اسلم انصاری جیسے اہم ادبی ناموں نے ان کی علمی و ادبی کاوشوں کو قدر کی نگاہ سے دیکھا۔ فلسطینی فکشن کے تراجم اور اس پر تحقیقی کام نے اردو قاری کو ایک اہم عالمی انسانی مسئلے سے نئے زاویے سے روشناس کرایا۔ مجید امجد پر ان کی تحقیق، متون کی درستی اور کلیات کی ازسرِنو ترتیب نے امجد شناسی میں ایک مستند اضافہ کیا، جس سے وہ اس عظیم روایت کے نمایاں معماروں میں شامل ہو گئے۔ بطور کالم نگار وہ “نوائے وقت” میں اپنے علمی، ادبی اور تہذیبی کالم" سرمایۂ افتخار" کے ذریعے سماجی، فکری اور تہذیبی سوالات کو متوازن، بامعنی اور بصیرت افروز لہجے میں پیش کرتے ہیں۔ تدریس کے میدان میں بھی ان کی خدمات قابلِ قدر ہیں؛ وہ ساہیوال کی علمی روایت کو نئی سمت دیتے ہوئے نسلِ نو میں زبان،

 فکر اور تہذیب کا شعور منتقل کر رہے ہیں۔ یوں افتخار شفیع ایسے ادیب کے طور پر سامنے آتے ہیں جس میں روایت کا استحکام بھی ہے اور جدیدیت کے روشن رنگ بھی۔