خود تیس کا ہے اور دلہن ساٹھ برس کی

گرتی ہوئی دیوار کے سائے میں کھڑا ہے

بے وقوفی کے انوکھے کارنامے دیکھ کر

اچھے خاصے لیڈروں کو بھی گدھا کہنا پڑا

اپنی شہرت کی الگ راہ نکالی ہم نے

کسی دیواں سے غزل کوئی چرا لی ہم نے

نیتا کا دعویٰ سن کے میں یہ سوچنے لگا

قربانی کنکٹے کی تو یارو حرام ہے

کلیات میرؔ و غالبؔ سے غزل لایا تھا میں

آج وہ بھی چھپ نہ پائی آپ کے اخبار میں!

میرا سسرال میں کوئی بھی طرفدار نہیں

ان کے ہونٹوں پہ بھی تالے ہیں خدا خیر کرے

تمہیں بتاؤ گلے باز شاعروں کے بغیر

اگر ہوا بھی تو کیسا مشاعرہ ہوگا

جو بد نصیبی سے کل کو ملازمت نہ رہی

شکم کا اپنے سہارا مشاعرہ ہوگا

اس بھروسے پہ الیکشن میں کھڑا ہوں میں بھی

اک نجومی نے کہا ہے کہ یہ سال اچھا ہے

مجھے نوٹ جب ملا بیس کا تو سمجھ میں خود ہی یہ آ گیا

جہاں دو ہزار کی بات تھی وہ مشاعرہ کوئی اور ہے

دستخط تو تمہیں بھی آتے ہیں

ابا تم بھی وزیر بن جاتے

ناج جتنا تھا وہ سب مکھیا کی بھینسیں چر گئیں

اور کلو رام کا کھلیان آدھا رہ گیا

بیٹے کے منہ پہ دے کے چپت باپ نے کہا

پھر فیل ہو گیا ہے منسٹر بنے گا تو

بیٹی کے ساتھ ماں مجھے تسلیم ہے مگر

لیکن کبھی کبھی اسے تنہا بھی چھوڑ دے

تیرا آدھا کام خود انسان ہی کرنے لگے

کام تیرا اب تو اے شیطان آدھا رہ گیا

ہر ورق پر ہے چھپی غیر مہذب تصویر

کتنے بیہودہ رسالے ہیں خدا خیر کرے

مرے ذوق ادب کو دیر میں آرام آئے گا

کہیں پچھلے پہر تک شاعرہ کا نام آئے گا

رہزنوں سے مت ڈرو تم پارساؤں سے بچو

لیڈران قوم کی ظالم اداؤں سے ڈرو

یہ سن کے بول اٹھا اس سے بے زباں شوہر

سکون بخشے گا تم کو اب آٹھواں شوہر

بولیں بیگم موت کے پنجے میں شوہر آئے گا

اب دوپٹہ کا نہیں ٹوپی کا نمبر آئے گا

چھن گئی کرسی تو لیڈر پر اٹھا لیں کرسیاں

جن پہ تکیہ تھا وہی پتے ہوا دینے لگے

تم کو اس بات کا احساس کوئی ہے کہ نہیں

دل نہ پڑ جائے کسی اور کے چکر میں کہیں

یکایک لاؤڈ اسپیکر سے گونجا فلم کا نغمہ

وطن کی آبرو خطرے میں ہے ہشیار ہو جاؤ

اپنے غنڈوں کی طرف دیکھا اور اس نے یوں کہا

جس دیے میں جان ہوگی وہ دیا رہ جائے گا

میری بیگم نے کبھی یہ نہیں سوچا آخر

''کس کے گھر جائے گا سیلاب بلا میرے بعد''

مردہ بگلا بھی فضاؤں میں اڑا کرتا ہے

پہلی بار آج یہ دیکھی ہے کرامت میں نے

جلد سے جلد اپنے گھر میں نوکری دے دو مجھے

ورنہ بے قیمت کا نوکر ڈھونڈتی رہ جاؤ گی