طنز و مزاح پر اشعار

کوٹ اور پتلون جب پہنا تو مسٹر بن گیا

جب کوئی تقریر کی جلسے میں لیڈر بن گیا

جو چاہتا ہے کہ بن جائے وہ بڑا شاعر

وہ جا کے دوستی گانٹھے کسی مدیر کے ساتھ

کلام میر سمجھے اور زبان میرزا سمجھے

مگر ان کا کہا یا آپ سمجھیں یا خدا سمجھے

پہلے ہم کو بہن کہا اب فکر ہمیں سے شادی کی

یہ بھی نہ سوچا بہن سے شادی کر کے کیا کہلائیں گے

خود تیس کا ہے اور دلہن ساٹھ برس کی

گرتی ہوئی دیوار کے سائے میں کھڑا ہے

میں نے ہر فائل کی دمچی پر یہ مصرع لکھ دیا

کام ہو سکتا نہیں سرکار میں روزے سے ہوں

وہاں جو لوگ اناڑی ہیں وقت کاٹتے ہیں

یہاں بھی کچھ متشاعر دماغ چاٹتے ہیں

پریشانی سے سر کے بال تک سب جھڑ گئے لیکن

پرانی جیب میں کنگھی جو پہلے تھی سو اب بھی ہے

یہ رشوت کے ہیں پیسے دن میں کیسے لوں مسلماں ہوں

میں لے سکتا نہیں سر اپنے یہ الزام روزے میں

پایان کار ختم ہوا جب یہ تجزیہ

میں نے کہا حضور تو بولے کہ شکریہ

آ کے بزم شعر میں شرط وفا پوری تو کر

جتنا کھانا کھا گیا ہے اتنی مزدوری تو کر

انورؔ خدا کرے کہ یہ سچی نہ ہو خبر

اکیسویں صدی میں وڈیرے بھی جائیں گے

کہیں گولی لکھا ہے اور کہیں مار

یہ گولی مار لکھا جا رہا ہے

ممکن ہے کہ ہو جائے نشہ اس سے ذرا سا

پھر آپ کا چالان بھی ہو سکتا ہے اس سے

اپنے استاد کے شعروں کا تیا پانچہ کیا

اے رحیم آپ کے فن میں یہ کمال اچھا ہے

بوا کو تو دیکھو نہ گہنا نہ پاتا

بجٹ ہاتھ میں جیسے دھوبن کا کھاتا

آئی صدائے حق کہ یہی بند و بست ہیں

تیرے وطن کے لوگ تو مردہ پرست ہیں

سیاست داں جو طبعی موت مرتے

تو سازش کی ضرورت ہی نہ ہوتی

علم حاصل کر کے بھی ملتی نہیں ہے نوکری

رحم کے قابل ہے بس حالت ہماری ان دنوں

دیا ہے نام کفن چور جب سے تم نے مجھے

پرانی قبروں کے مردے مری تلاش میں ہیں

نہیں ہے بحر میں بے وزن ہے رحیمؔ مگر

ہماری شاعری سر میں ہے اور تال میں ہے

تمہیں خبر نہیں تھی کیسی آن بان کی دم

کٹا کے بیچ لی تم نے تو خاندان کی دم

نرس کو دیکھ کے آ جاتی ہے منہ پہ رونق

وہ سمجھتے ہیں کہ بیمار کا حال اچھا ہے

کہتے تھے میچ دیکھنے والے پکار کے

استاد جا رہے ہیں شب غم گزار کے

ہمارا دوست طفیلی بھی ہے بڑا شاعر

اگرچہ ایک بڑے آدمی کا چمچہ ہے

داڑھی کا نام لے کے ہمیں کیوں ہو ٹوکتی

داڑھی کوئی بریک ہے جو سائیکل کو روکتی

درگت بنے ہے چائے میں بسکٹ کی جس طرح

شادی کے بعد لوگو وہی میرا حال ہے

کر لیجے رضیہؔ سے محبت ہم پر کیجے نظر کرم

وہ بے چاری پھنس جائے گی ہم اس کو سمجھائیں گے

ایک شادی تو ٹھیک ہے لیکن

ایک دو تین چار حد کر دی

کسی تجربے کی تلاش میں مرا عقد ثانوی ہو گیا

مری اہلیہ کو خبر نہیں مری اہلیہ کوئی اور ہے

میں بھی تھا حاضر بزم میں جب تو نے دیکھا ہی نہیں

میں بھی اٹھا کر چل دیا بالکل نیا جوتا ترا

ایک اچھا خاصا مرد زنانے میں گھس پڑا

گویا کہ ایک چور خزانے میں گھس پڑا

ادھر کونے میں جو اک مجلس بیدار بیٹھی ہے

کرائے پر الیکشن کے لیے تیار بیٹھی ہے

تم تو ہو صرف آدمی ہم ہیں پولس کے آدمی

بیٹھے ہیں رہ گزر پہ ہم کوئی گزر کے جائے کیوں

وہ سب آ کے اظہار ماتم کریں گے

وہ بیٹھک میں روئیں گے چائے پئیں گے

ڈھونڈئیے خیر سے جا کر کوئی موٹی سسرال

ہاتھ جو مفت میں آئے تو وہ مال اچھا ہے

اور تو کچھ بھی نہیں حضرت ماچسؔ لیکن

آپ میں آگ لگانے کا کمال اچھا ہے

اس کا کیا ہوگا یہ جو عنوان آدھا رہ گیا

یہ بھی لیتے جائیں جو سامان آدھا رہ گیا

وفور عشق کے جذبے سے ہو گئی سرشار

نکل پڑی ہے مریدن جدید پیر کے ساتھ

دیکھی ہے ایک فلم پرانی تو یوں لگا

جیسے کہ کوئی کام کیا ہے ثواب کا

دیکھے جو قیس حسن تو لیلیٰ کو بھول جائے

ہم کیا ہیں ریش حضرت مولانا جھول جائے

سیاست میں ایسی اچھل کود ہے

کہ ہر ایک نیتا مداری لگے

رہزنوں سے مت ڈرو تم پارساؤں سے بچو

لیڈران قوم کی ظالم اداؤں سے ڈرو

جو بھی ہارے گا وہی گالیاں دے گا اس کو

جس برہمن نے کہا ہے کہ یہ سال اچھا ہے

خودی بلند ہو بے شک یہی تھی میری رائے

یہ کب کہا تھا کہ قوال اس میں ہاتھ لگائے

یہ سن کے بول اٹھا اس سے بے زباں شوہر

سکون بخشے گا تم کو اب آٹھواں شوہر

دستخط تو تمہیں بھی آتے ہیں

ابا تم بھی وزیر بن جاتے

عبث ہے ان سے اک چڑیا کے بچے کی ولادت بھی

کہ ان فیشن زدہ گھر والیوں سے کچھ نہیں ہوگا

ہر ورق پر ہے چھپی غیر مہذب تصویر

کتنے بیہودہ رسالے ہیں خدا خیر کرے

میرا سسرال میں کوئی بھی طرفدار نہیں

ان کے ہونٹوں پہ بھی تالے ہیں خدا خیر کرے