ہار ہو جاتی ہے جب مان لیا جاتا ہے

جیت تب ہوتی ہے جب ٹھان لیا جاتا ہے

اپنی منزل پہ پہنچنا بھی کھڑے رہنا بھی

کتنا مشکل ہے بڑے ہو کے بڑے رہنا بھی

میں سو رہا ہوں ترے خواب دیکھنے کے لئے

یہ آرزو ہے کہ آنکھوں میں رات رہ جائے

خود کو اتنا بھی مت بچایا کر

بارشیں ہوں تو بھیگ جایا کر

جانے کیسا رشتہ ہے رہ گزر کا قدموں سے

تھک کے بیٹھ جاؤں تو راستہ بلاتا ہے

بات سے بات کی گہرائی چلی جاتی ہے

جھوٹ آ جائے تو سچائی چلی جاتی ہے

بھوک میں عشق کی تہذیب بھی مر جاتی ہے

چاند آکاش پہ تھالی کی طرح لگتا ہے

اس بار اس کی آنکھوں میں اتنے سوال تھے

میں بھی سوال بن کے سوالوں میں رہ گیا

ہر گھڑی چشم خریدار میں رہنے کے لیے

کچھ ہنر چاہئے بازار میں رہنے کے لیے

بس اک پکار پہ دروازہ کھول دیتے ہیں

ذرا سا صبر بھی ان آنسوؤں سے ہوتا نہیں

مجھ کو بکھرایا گیا اور سمیٹا بھی گیا

جانے اب کیا مری مٹی سے خدا چاہتا ہے

جب تلک اس نے ہم سے باتیں کیں

جیسے پھولوں کے درمیان تھے ہم

تمہاری موت نے مارا ہے جیتے جی ہم کو

ہماری جان بھی گویا تمہاری جان میں تھی

کچھ دنوں کے لیے منظر سے اگر ہٹ جاؤ

زندگی بھر کی شناسائی چلی جاتی ہے

آج آنکھوں میں کوئی رات گئے آئے گا

آج کی رات یہ دروازہ کھلا رہنے دے

بچھڑ کے بھی وہ مرے ساتھ ہی رہا ہر دم

سفر کے بعد بھی میں ریل میں سوار رہا

میرے ہونٹوں پہ خامشی ہے بہت

ان گلابوں پہ تتلیاں رکھ دے

تمہارے درد سے لے کر ہمارے آنسو تک

بڑی طویل کہانی ہے آگ پانی کی

زمین لے کے وہ آئے تو گھر بنایا جائے

کھڑے ہیں دیر سے ہم لوگ اینٹ گارے لئے

پھر یوں ہوا تھکن کا نشہ اور بڑھ گیا

آنکھوں میں ڈوبتا ہوا جادہ لگا ہمیں

حادثے شہر کا دستور بنے جاتے ہیں

اب یہاں سایۂ دیوار نہ ڈھونڈھیں کوئی

گھر کے دیوار و در پہ شام ہی سے

نظم لکھتا ہوا ہے سناٹا

اسی خطا پہ بجھائے گئے چراغ مرے

میں جانتا تھا بہت کچھ ہوا کے بارے میں

تیرے رونے کی خبر رکھتی ہیں آنکھیں میری

تیرا آنسو مرے رومال میں آ جاتا ہے